Read Quechua Bolivia DC Bible ECLESIÁSTICO 10 Bible Online

ECLESIÁSTICO 10 - Quechua Bolivia DC Bible bible

ECLESIÁSTICO 10

¹Runasta kamachejkuna Yachayniyoj kamachejqa sumajta purichin runasninta. Kamachisqantaj tukuy imapi allin.

²Imaynachus kamachejqa, ajinallataj runasnimpis. Imaynachus llajtapi kamachejqa, ajinallataj llajtapi tiyakojkunapis.

³Mana yachayniyoj reyqa chinkayman apan runasninta. Llajtaqa ñaupajman rin kamachejkunaj umasninkurayku.

⁴Mundota kamacheyqa Señorpa makisnimpi kashan. Necesitakusqanman jina, pay rikhurichin kamachejta.

⁵Señorpa yanapayninrayku runaqa ñaupajman rin. Paymin kamachejta yanapan ruwasqampi. Ama pataman oqharikuychu

⁶Amapuni phiñanakuychu runa masiykiwan, ima juchayojpis kajtin. Ama ni imata ruwaychu phiñakuywan atipachikuspa.

⁷Diostaj runastaj chejninku wapuykachaj runata. Diostaj runastaj mana munankuchu runas sarusqas kanankuta.

⁸Kunan uj nación atiyniyoj kashan. Q'aya wajñataj atiyniyoj kanqa chejninakuynejta qolqenejtataj.

⁹Imajtin runaqa wapuyapun jallp'alla ushphalla kajtimpis? Kausakusajtinraj ukhun ismuyashanñaqa.

¹⁰Jampejqa mana sinch'i onqoymantaqa asirikullan. Jinapis, kunan rey kajqa q'ayataj aya kanqa.

¹¹Wañusqa runataqa jap'ikapunku ch'uspis, atojkuna khurus ima.

¹²Señormanta qonqapojqa wapuman tukun. Ajinamanta karunchakun payta ruwajninmanta.

¹³Jucharayku runaqa wapuyakun. Juchallikojqa juchantaqa tukuynejpi t'aqan. Chayrayku, Diosqa juchasapata mayta castigaykun, nanaykuchintaj tukuchinankama.

¹⁴Señorqa atiyniyojkunata tiyanasninkumanta urmaykucherqa, chaypitaj tiyaykucherqa llamp'u sonqoyojkunata.

¹⁵Señorqa wapu wapusta saphinkumanta sik'iykorqa, chaypachallapitaj churaykorqa k'acha sonqoyojkunata.

¹⁶Señorqa tukucherqa mana creej nacionesta. Payqa t'unarparicherqa mana ni uj runallatapis saqespa.

¹⁷Payqa kay pachamanta picharqa tukuyninkuta pampachaspa. Sutinkutapis kay pachamanta chinkacherqa.

¹⁸Wapu kayqa mana allinchu runapajqa. Oqharikuypis mana allinchu warmej wawampajqa. Pikuna rejsisqas kananku tiyan

¹⁹Pikunata respetana? Runasta. Pikunata respetana? Señorta yupaychajkunata. Pikunata qhesachana? Runasta. Pikunata qhesachana? Diospa leyninta p'akejkunata.

²⁰Kurajqa respetasqa wauqesnin ukhupi. Señorqa rejsichin payta yupaychajkunata.

²¹Ñaupajtaraj Señorta yupaychay. Chaymantaqa, allinta recibisonqanku. Rumi sonqotaj waputaj kanki chayqa, mana recibisonqankuchu.

²²Runaqa, qhapajchus, sumaj rejsisqachus, wajchachus, kusikuchun Señorta yupaychasqanmanta.

²³Manapuni allinchu qhesachayqa umayoj wajchata. Juchasapatarí mana respetowan qhawanachu.

²⁴Respetana kamachejta, juezta, atiyniyojtataj. Jinapis, paykunaqa mana aswan jatuchejchu kanku Diosta yupaychajmanta.

²⁵Umayoj kamacheqa sirvichikun mana kamachi runaswan. Yachayniyoj runaqa mana ni imamanta waqanchu.

²⁶Ruwanayki kajta ruwajtiyki, ama oqharikuychu. Llakiyniyoj kajtiyki ama pataman oqharikuychu.

²⁷Aswan sumajqa tukuy imayoj llank'aj runa, wapu runamanta mana mikhuytapis atejmanta.

²⁸Wawáy, pisillata jatunyakuy. Maychus kajllata qan kikiykita munakuy.

²⁹Pitaj mana juchayojta tarinman pay kikinta juchachakojtari? Pay kikinta mana respetakojta, pitaj respetanmanri?

³⁰Wajcha runaqa respetachikun yachayninmanta. Qhapajtaj qolqenmanta.

³¹Wajcha respetachikun chayqa, qhapaj kaspaqa astawan respetachikonqa. Qhapaj chejnichikun chayqa, wajcha kaspaqa astawan chejnichikonqa.