Read Quechua Bolivia DC Bible ECLESIÁSTICO 12 Bible Online

ECLESIÁSTICO 12 - Quechua Bolivia DC Bible bible

ECLESIÁSTICO 12

¹Unanchakuyraj pipajchus allin kajta ruwanaykita. Ajinamanta, ruwasqaykeqa mana qhasichu kanqa.

²Cheqan sonqoyojta yanapay. Paytaj kutichipusonqa. Mana chayrí, Diosninchej.

³Sajrata purejman ama ruwaychu allin kajta. Payqa manapuni runa masinmanta khuyakunchoqa.

⁴Cheqan sonqoyojta yanapay. Juchasapatarí ama yanapaychu.

⁵Llamp'u sonqoyojta yanapay. Runa sonqoyojmanrí ama ni imata qoychu. Ama t'antata jaywaychu. Qonki chayqa, qanmanta aswan kallpayoj kanqa. Allin ruwasqasniykimanta payqa sajrata kutichipusonqa iskay kutita.

⁶Patapi kajpis juchasapasmantaqa millachikun. Rumi sonqoyojkunata castigaykonqa.

⁷K'acha runaman kollay. Juchasapamanrí, amapuni. Llakisqata sonqochay, wapu runamantaj ama ni imata qoychu.

⁸Allin risojtin mana atiwajchu yachayta pichus cheqamanta amigoyki. Mana allin risojtintaj, enemigoyki rikhurenqapuni.

⁹Runaqa kusisqa kajtin, enemigosnin llakikunku. Llakiywan kajtintaj, amigosnimpis paymanta karunchakunku.

¹⁰Ama sonqoykita kichariychu enemigoykiman. Sajra kayqa bronce ismusqa jinamin.

¹¹Llamp'u runa jina jamusojtimpis, k'umuykukuspa, ñawisniykita kichariy. Ama sonqoykita payman kichariychu. Imaynatachus espejota khitunki, ajinallatataj paypa ch'ichi kayninta pichaykuy.

¹²Ama paytaqa qanman k'askachiychu. Pajtataj urmachisunkiman tiyanaykipi tiyakunampaj. Mana chayta ruwanki chayqa, qhepantaraj yachanki nisqasniyta. Sonqoyki nananqa palabrasniymanta yuyarikuspa.

¹³Mana ni pi khuyakunchu layqamanta katariwan khanichikojmanta. Ajinallataj mana ni pi khuyakunchu sajra animalman chimpajmanta.

¹⁴Ajinallataj juchasapawan purejmantapis, juchasapawan khuska juchallikojmantapis.

¹⁵Sayashajtiyki paypis ladoykipi kallanqa. Misk'anki chayqa, mana llullakonqañachu.

¹⁶Qanta chejnikojqa misk'i similla rikhurenqa. Sonqompitaj yuyashan pujruman urmachisuyta. Qanta chejnikojqa waqaspa qayllaykusonqa. Atispataj, yawarniykimanta mana sajsakonqachu.

¹⁷Llakiyniykipi rikhurimusonqa. Yanapasqayki, nispa, misk'achisonqa.

¹⁸Asipayakuspa t'ajllakonqa. Thutuspataj waj jinaman tukonqa.