Read Quechua Bolivia DC Bible ECLESIÁSTICO 13 Bible Online

ECLESIÁSTICO 13 - Quechua Bolivia DC Bible bible

ECLESIÁSTICO 13

¹Allinta ajllakuy amigosniykita Alquitranta llankhajqa mach'achakun. Wapu wapuswan purejqa wapu wapullamantaj tukun.

²Ama llasa q'epiwan puriychu. Amataj puriychu aswan atiyniyojwan aswan qhapajwantaj qanmanta. K'analla mankaqa mana kayta atinmanchu fierro mankawan khuska. Takanakuspa k'analla mankaqa p'akikun.

³Qhapajqa mana cheqan kajta ruwaspa, uman oqharisqa purin. Wajchataj saruchikojtin waqaspa khuyakuyta mañakun.

⁴Qhapajqa qanwan yanapachikun. Qantaj kamachinman tukunki. Manaña yanapayta atejtiykirí saqerparisonqa.

⁵Imallapis tiyapusunki? Qhapajqa qanwan khuska tiyakonqa. Mana sonqonta nanachikuspalla kapuyniykita apakaponqa.

⁶Payta yanapayta atisqaykita yuyaspa, k'acha sonqowan parlapayasunki, asirikuy simiwan. Qantaj sonqoykita kicharinki. Payqa misk'ita parlasonqa: Imatataj munanki?, nispa.

⁷Mikhunasnimpi p'enqaypi rukhurichisonqa. Atejtintaj imallatapis qanmanta munanqa. Iskaytachus kinsatachus alabasonqa. Chaymantataj rikususpa phiñakonqa asipayasonqataj.

⁸Pajtataj! Ama sonqoykita kicharillaychu. Ama opas jinachu kay.

⁹Atiyniyoj runa wajyasojtin, ama qayllaychu. Chantaqa, pay ujtawan qhaparisonqa qayllanaykipaj.

¹⁰Ama thaskiychu. Ichapis qhesachasunkiman. Amataj anchata karunchakuychu. Ichapis qonqapusunkiman.

¹¹Ama paywan parlaychu amigoykiwan jina. Amataj uyariychu tukuy nisqantaqa. Payqa anchata parlan pruebaman churasunampaj. Asirikoj jina pay rejsisuyta munashan.

¹²Sichus mana sonqoyoj runa kamachejman tukun chayqa, mana ni pita khuyakonqachu, ashkha runastapis wañuchiyta munanqa.

¹³Allinta kichariy ñawisniykita ningrisniykita ima. Ama puriychu phiña runaswan.

¹⁴Kayta uyarinki chayqa mosqoyniykipi, rijch'arillay. Tukuy kausayniykipi Señorta munakuy, paymantataj mañakuy salvasunampaj.

¹⁵Tukuy kausayniyojkuna masisninkuta munakunku. Ajinallataj, tukuy runaspis runa masisninkuta munakullankutaj.

¹⁶Tukuy kausayniyojkuna masisninkuwan purinku. Ajinallataj, tukuy runaspis runa masisninkuwan purillankutaj.

¹⁷Imaynamantataj atinkuman khuska puriyta lobowan corderowanri? Ajinallataj, mana purinkumanchu sajra runawan k'acha runawanqa.

¹⁸Allintachu kausankuman atojwan alqowan? Allintachu kausankuman qhapajwan wajchawan?

¹⁹Leonqa ch'in pampapi jap'iykun k'ita burrota. Ajinallataj, wajchasqa qhapajkunawan jap'ichikunku. Qhapajkunawan wajchaswan

²⁰Wapu runaqa wajchata chejnikun. Qhapajtaj wajchata chejnikullantaj.

²¹Qhapajchus misk'anman chayqa, amigosnin jap'inku. Wajchachus misk'anman chayqa, amigosnin wijch'uykunku.

²²Qhapaj misk'ajtenqa, amigosnin makisninkuwan jap'inku. Sonserasta parlajtintaj, sumajta nisqanta ninku. Wajcha pantajtin, tukuy payta rimanku. Allinta parlajtintaj mana ni pi uyarikunchu.

²³Qhapaj parlajtintaj, tukuy ch'in kakunku, patamantaj oqharinku nisqasninta. Wajcha parlajtinrí, pitaj chayri?, nispa ninku. Misk'ajtintaj tanqaykunkuraj.

²⁴Mana juchanejta qhapajchakuy, allinmin. Rumi sonqonejta wajchaman tukuy mana allinchu.

²⁵Runaj sonqompi allinchus manachus kasqan, uyampi rikukun.

²⁶Kusisqa uyaqa kusisqa sonqomanta jamun. Llakiy yuyayniyoj runaqa, k'ita uya.