Read Quechua Bolivia DC Bible ECLESIÁSTICO 14 Bible Online

ECLESIÁSTICO 14 - Quechua Bolivia DC Bible bible

ECLESIÁSTICO 14

¹Kusikuyniyoj chay runa pichus siminwan mana juchallikunchu. Paypa sonqonqa mana k'aminchu ruwasqanmantaqa.

²Kusikuyniyoj chay runa pichus pay kikinta mana k'amikunchu, nitaj phutikunchu mana ni imata suyayta atisqanrayku. Qhapajchakuymanta

³Mich'akojqa mana qhapaj kanmanchu. Qoreqa mana sirvinchu qorita munapayajman.

⁴Mich'aqa qolqeta tantaykun wajkunapaj. Kapuyninwanqa ajeno runas qhapajyanqanku.

⁵Pay kikimpaj mich'akojqa, manachu wajkunawampis mich'allataj kanqa? Kapuynenqa paytaqa mana kusichinchu.

⁶Mana aswan rumi sonqo kanchu pay kikimpaj mich'akojmanta. Chay mich'a kaynin castigonqa.

⁷Allin kajtaqa mana yachaspalla ruwan. Jinapis, rikuchillanqa mich'a kasqanta.

⁸Mich'a sonqoyojqa mana k'acha runachu. Payqa, mana yanapananrayku waj ladota qhawarin.

⁹Qolqeta tantajmanqa imallapis pisiman rijch'akun. Wajkunamanta qhechojtin, paypa kapuynintawan chinkachin.

¹⁰Munapayajqa, t'antata ñawin kicharisqa qhawan. Jinapis, wasimpi mana ni ima kanchu mikhunapaj.

¹¹Wawáy, imallapis tiyapusunki chayqa, usota ruway kusikuyniykipaj. Señormantaj jaywallay atisqaykiman jina.

¹²Ama qonqaychu wañuy jamusunanta. Mana ni pi willasunkichu mayk'ajchus wañunaykita.

¹³Manaraj wañupushajtiyki kausaqesniykita yanapay. Atisqaykiman jina paykunaman qollay.

¹⁴Ama karunchakuychu kunan día kusikuymanta. Imachus allin qampaj, chayta jap'ikullay.

¹⁵Manachu waj runaspa makisninman kapuyniyki renqa? Jump'ispa tantasqaykita waj runaspata kanqa.

¹⁶Runa masisniykiman qollay. Qantaj allillanta kausay. Sepulturapeqa manaña kusikuyniyojchu kanki.

¹⁷Tukuy kausayniyojkunaqa mauk'ayanku thanta p'acha jina. Wañunanchejqa wiñaymantapacha kamachisqa kashan.

¹⁸Rakhu sach'aj laqhesnin jina kanchej. Ujkuna ch'akirashan, ujkunataj q'omeryarishan. Runaspis kikillantaj. Ujkuna wañupushanku, ujkunataj naceshanku.

¹⁹Runaj ruwasqan tukukapullanqa. Paypa ruwasqanqa paywan khuskallataj chinkanqa. Imapajtaj yachay

²⁰Kusikuyniyojmin yachayniyoj umayojtaj kayta munajqa.

²¹Kusikuyniyojmin sonqompi unanchakojqa yachaymanta, pakasqa kayninta yachayta munaspa.

²²Ajinamanta, atenqa llojsiyta yachayta mask'aj, maypichus kasqanta qhawaspa.

²³Payqa umanta yaykuchin yachaypa yaykunasninman. Punkumpi sayaspataj uyarikullan.

²⁴Payqa sayakun yachaypa punkunnejpi. Wasi toldontaqa yachaypa wasinman k'askaykuchin.

²⁵Payqa tiyakun yachaypa qallampi, kusikunampaj ladompi kasqanmanta.

²⁶Payqa thapachakun yachaypa makisnimpi. Laqhesnin ukhupitaj ch'isispi puñukun.

²⁷Payqa, ruphaymanta ayqespa yachayman rin llanthuchakoj. Kausakullantaj paywan qhawaynimpi.