Read Quechua Bolivia DC Bible ECLESIÁSTICO 15 Bible Online

ECLESIÁSTICO 15 - Quechua Bolivia DC Bible bible

ECLESIÁSTICO 15

¹Chayta ruwan Señorta yupaychajqa. Diospa leyninta junt'aspataj yachayniyojman tukun.

²Yachaytaj payta taripamoj llojsin uj mama jina. Makisninta kichariykun imaynachus warmeqa qosanta recibiykun ajinata.

³Yachayqa t'antata mikhuchin, ujyachintaj unanchakoj yakuta.

⁴Runaqa paypi atiykukonqa ama urmanampaj. Paypi sonqonta churaspataj, mana p'enqaypi rikhurenqachu.

⁵Yachaytaj payta oqharenqa uma masisnimpa patanman, runas ukhupi parlanampaj.

⁶Ancha jatun kusiywan junt'aykuchenqa. Paypa sutintaj wiñaypaj rejsisqa kanqa.

⁷Mana umayoj runasqa manapuni yachayman chayayta atenqankuchu. Wapu runastaj yachaytaqa ni rikuytapis atinkuchu.

⁸Yachayqa jatunchakojkunamanta karunchakumpacha. Llullakojkunaqa ni yachankupischu yachay kasqanta.

⁹Sajra runasqa mana yupaychanankupaj jinachu kanku. Diosqa paykunaman mana yachayta qorqachu.

¹⁰Yachayniyojmin yachayta yupaychan. Yachayniyoj kajqa atinman yachayta yachachiyta. Runaqa payllamanta juchallikun

¹¹Ama niychu: Diosqa juchallichiwan, nispa. Diosqa mana ruwanchu imatachus chejnikusqanta.

¹²Amataj niychu: Diosqa urmachiwan, nispa. Payqa mana necesitanchu juchasapasta.

¹³Chejninakunata Señor chejnikun. Señorta munakojkunapis chejninakunata chejnikullankutaj.

¹⁴Maypachachus Diosqa qallariypi runata ruwarqa, atiyta qorqa payllamanta imallatapis ajllayta atinampaj.

¹⁵Munanki chayqa, junt'allanki paypa kamachisqanta. Ruwallankitaj imachus allin paypa ñaupaqempi.

¹⁶Ñaupaqeykipi kashan ninawan yakuwan. Imatachus munanki ajllakullay.

¹⁷Sapa ujpa ñaupaqempi kashan kausaytaj wañuytaj. Sapa uj jap'ikonqa imatachus ajllakusqanta.

¹⁸Señorpa yachaynin jatunmin. Payqa atiyniyojmin. Tukuy imatataj rikun.

¹⁹Diosqa rikun tukuy ruwasqasninta. Yachallan payqa imatachus runas ruwanku.

²⁰Payqa mana ninchu ni pita juchallikunanta. Manataj ni pitapis kamachinchu llullakunanta.