Read Quechua Bolivia DC Bible ECLESIÁSTICO 16 Bible Online

ECLESIÁSTICO 16 - Quechua Bolivia DC Bible bible

ECLESIÁSTICO 16

¹Diosqa castigan juchasapasta Ama munaychu ashkha mana sirvej wawasniyoj kayta. Amataj kusikuychu wawasniyki sajra kajtinku.

²Ashkhapis kajtinku, ama paykunamanta kusikuychu, sichus Señorta mana munakunkuchu chayqa.

³Amataj yuyaychu unayta kausakunankuta. Amataj yuyaychu allinta kausanankuta wañunankukama. Waranqa wawasmantaqa aswan walej ujsitulla. Aswan walejtaj mana wawasniyoj wañupoyqa, rumi sonqo wawasniyoj kaymantaqa.

⁴Uj umayoj runalla llajtata mirachin. Sajra ayllutaj llajtata raqayman tukuchin.

⁵Chay jinata kikin ñawisniywan rikoj kani. Aswan millaytataj willawanku.

⁶Juchasapas chaupipi nina larwamun. Diospa phiñakuynintaj ruphaykuchin payta qhesachajkunata.

⁷Diosqa mana khuyakorqachu ñaupa tiempospi kamachejkunata. Paykunaqa, kallpayoj rikukuspa, oqharikorqanku.

⁸Manataj khuyakorqachu Lotpa llajtampi tiyakojkunata. Diosqa paykunata, wapu kayninkumanta chejnikorqa.

⁹Manataj khuyakorqachu Canaán ayllumanta. Chay maldicisqa runasta juchasninkurayku tukuy imata chinkacherqanku.

¹⁰Ajinallataj, sojta pachaj waranqa israelitas rumi sonqonkurayku wañorqanku.

¹¹Ujllapis kachun rumi sonqoqa. Manapuni ayqenmanchu castigomanta. Diosqa khuyakuntaj phiñakuntaj. Payqa pacienciakullan, juchastataj pampachallan. Jinapis, sajra runasta castigaykun.

¹²Phiñakuynenqa khuyakuynin jina jatun. Runasmantaqa cuentata mañan ruwasqankuman jina.

¹³Diosa mana saqenchu runaqa suwakusqanwan ayqenanta. Chantapis, cheqan sonqoyoj runaman qollan, munasqanman jina.

¹⁴Khuyakoyqa t'inkayoj rikhurenqa. Sapa ujtaj jap'ikonqa ruwasqanman jina.

¹⁵Ama niychu: Diosmanta pakakullasaj. Janaj pachapi, pitaj noqamanta yuyarikonqari?, nispa. Amataj niychu: Chay chhika runas ukhupiri, pitaj rejsiwanqari? Imataj kani chay jatun pachapiri?, nispa.

¹⁶Kayta yachay: Dios rikhurejtin, tukuy kharkatitinku, janaj pachapitaj, jatun qochapitaj, kay pachapitaj.

¹⁷Orqospis pampaspis ukhunkumanta kharkatitinku Dios rikojtin.

¹⁸Wakin runas ninku: Diosqa mana qhawawanchu. Pitaj rikunri ruwasqaytaqa?

¹⁹Juchallikojtiy, mana ni pi rikuwanchu. Pakayllamanta llullakojtiypis, pitaj yachanqari?

²⁰Allin kajta ruwayman chayqa, pitaj Diosman willanqari? Allinta ruwasqaymanta, imata qowanqankuri?

²¹Chaytaqa mana umayojkunalla ninku. Mana unanchakojkunaqa chayta yuyanku. Diosqa yachayninwan tukuy imata ruwarqa

²²Uyariwaychej, yachaychejtaj imaynatachus yachayniyoj kankichej. Nisqasniyta sumajta uyariychej.

²³Maychus kajta nisqaykichej, imatachus yuyasqayta. Llamp'u sonqo yachachisaj noqa yachasqayta.

²⁴Maypachachus qallariypi Diosqa ruwasqasninta ruwarqa, kanankuta nispa, nerqa imapajchus ruwasqas kasqankuta.

²⁵Wiñaypajtaj nerqa imatachus ruwananku karqa, qallariymantapacha sapa kuti. Chay ruwasqasnenqa mana yarqhachikunkuchu.

²⁶Mana ujllapis wajwan takakunchu. Diospa nisqantaqa tukuy kasunkupuni.

²⁷Chaymantaqa Dios kay pachata qhawaykorqa, sumaj kayninwantaj junt'aykucherqa.

²⁸Kay pachaj patanmantaj imaymana laya kausakojkunata churaykorqa. Chaykunaqa watejmanta jallp'aman kutirinanku tiyan.