Read Quechua Bolivia DC Bible ECLESIÁSTICO 17 Bible Online

ECLESIÁSTICO 17 - Quechua Bolivia DC Bible bible

ECLESIÁSTICO 17

¹Señorqa runata ruwarqa jallp'amanta. Señorqa watejmanta runata jallp'aman kutichillarqataj.

²Nerqataj pisillata kausananta kay pachapi. Nillarqataj watejmanta jallp'aman kutirinanta.

³Señorqa runata kallpawan p'achallicherqa, pay kikinta jina. Atiytataj payman qorqa tukuy ima patapi kay pachapi.

⁴Nerqataj tukuy kausajkuna runata manchachikunankuta. Nerqataj runa atipananta uywastapis p'isqostapis.

⁵Señorqa ruwarqa runaj qallunta, ñawisninta, ningrisninta ima. Paymantaj qorqa unanchakoj sonqota.

⁶Señorqa runata ruwarqa yachayniyojta umayojtataj. Atiytataj qorqa yachanampaj imachus allin, yachanampajtaj imachus sajra.

⁷Señorpa ñawin k'anchaykun runaj sonqonta, rikunampaj Diospa jatuchaj ruwasqasninta.

⁸Runaqa yupaychanqa Diospa santo sutinta, willanqataj jatuchaj ruwasqasninta.

⁹Diosqa runaman yachayta qorqa. Chantapis, kausayta qollarqataj.

¹⁰Diosqa runaswan ruwarqa uj mana tukukoj tratota. Paykunamantaj willanqa paypa kamachisqasninta.

¹¹Runaspa ñawisninku rikorqanku Diospa jatun kayninta. Runaspa ningrisninku uyarerqanku paypa yupaychana nisqasninta.

¹²Señorqa paykunaman nerqa: Amapuni ruwaychejchu ni imallatapis mana allin kajta, nispa. Nerqataj imaynatachus sapa uj kausanan tiyan runa masinwan.

¹³Diosqa rikumpuni runaj puriyninta. Runasqa manapuni ayqenkumanchu ñawisninmanta.

¹⁴Diosqa churan kamachejta sapa nacionman. Señorpa kikin ayllun Israelmin.

¹⁵Runaj ruwasqasnenqa Señorpa ñaupaqempi sut'ipuni inti jina. Señorpa ñawisnin rikun runaj purisqanta.

¹⁶Runaj sajra ruwasqasnenqa mana paymanta pakakunkumanchu. Runaj juchasnin tukuyninku Diospa ñaupaqempi kashanku.

¹⁷Yuyarikumpuni payqa runaj qosqanmanta wajchasman. Imaynachus runaqa ima onqoyllamantapis ñawinta jark'an, ajinata Diosqa munakun cheqan sonqoyoj runata.

¹⁸Uj kuti Señorqa sayarispa, t'inkata qoponqa. Sapa ujmantaj qoponqa kausakusqanman jina. Diosman kutiriychej

¹⁹Juchasninkumanta llakikojkunata saqellan payman kutirinankuta. Sonqochantaj mana ni imataña suyajkunata.

²⁰Señorman kutiriy juchasniykita saqespa. Paymanta mañakuy, amataj juchallikuyñachu.

²¹Kutiriy patapi kajman. Sajrata ruwaymanta karunchakuy. Chejniytaj tukuy sonqoykiwan mana allin kajta.

²²Wañuypachapi mana ni pi alabayta atinñachu patapi kajta. Kausajkunalla agradecekuyta atinku.

²³Wañusqasta manaña atinkuchu Señorta alabayta, manapis kankumanchu jina.

²⁴Señorpa khuyakuynenqa may jatun. Payman kutirimojpa juchasninta pampachallan.

²⁵Runaqa mana atinmanchu tukuy imayoj kayta. Payqa mana wiñay kausayniyojchu.

²⁶Kanchu imallapis aswan atiyniyoj intimanta? Jinapis, k'anchaynin laqhayallan. Runaj yuyasqasnenqa laqhallaqa.

²⁷Diosqa qhawaykun janaj pachapi kajkunata. Runasqa jallp'allataj ushphallataj kanku.