Read Quechua Bolivia DC Bible ECLESIÁSTICO 19 Bible Online

ECLESIÁSTICO 19 - Quechua Bolivia DC Bible bible

ECLESIÁSTICO 19

¹Chayta ruwajqa mana ni jayk'aj qhapajman tukonqachu. Pisi kajta mana qhawajqa, wajchaman tukonqa.

²Runasqa vinowantaj warmiswantaj chinkayman chayanku. Juchasapa warmiswan purejqa ni p'enqakuytapis atinñachu.

³Chay runaqa khuruswan mikhuchikonqa. Diosmanta mana manchachikoj runaqa chinkachisqa kanqa. Ama simiykiwan juchallikuychu

⁴Pichus pillawampis imallatapis parlan, mana umayojchu. Juchallikojqa pay kikinta dañota ruwakun.

⁵Sajrata ruwasqanmanta kusikojqa castigasqapuni kanqa.

⁶Ch'ajwamanta ayqejta mana juchawan atipachikonqachu.

⁷Ama ni piman willaychu imatachus nisusqankuta. Ajinamanta, mana ni pi ni imata ruwasonqachu.

⁸Ama ni imatapuni willaychu, ni amigoykimampis ni enemigoykimampis. Sichus mana willaspa juchallikuwaj chayqa, chaypachalla willakunki.

⁹Uyarisojkuna qhawasunkuman. Chantapis, chejnikusunkuman.

¹⁰Imallatapis uyarinkichu? Sepultura jina ch'in kakuy. Ch'in kasqaykimantaqa mana phatankichu.

¹¹Mana umayoj runaqa imallatapis uyariytawan, qhajpacha correshan. Imaynachus onqoj warmi munashanña nacechikuyta, ajina sonso runaqa munashanña yachasqanta willayta.

¹²Imaynachus runaqa munashan wach'inata sik'ikuyta ukhunmanta, ajinataj sonsoqa munashan kachariyta payman willasqankuta pakayllamanta.

¹³Imallatapis nisojtinku amigoykimanta, payta tapuy. Ichapis mana ruwarqachu chay willasusqankuta. Chayta ruwarqa chaypis, tapullayraj amaña ujtawan ruwanampaj.

¹⁴Imallatapis nisojtinku runa masiykimanta, payta tapuy. Ichapis mana nerqachu chay willasusqankuta. Nerqa chaypis, chaytaqa manaña ujtawan nenqachu.

¹⁵Amigoykita watukuy. Paypaj parlaspa llullakunkuchá. Ama creeychu tukuy nisusqankuta.

¹⁶Mana munaspalla runaqa nisqanwan pantan. Pitaj siminwan mana juchallikorqachuri?

¹⁷Amaraj phiñakuychu. Parlakullayraj runa masiykiwan. Ajinamantaqa, patapi kajpa kamachisqasninta junt'anki. Imaynamanta rejsikun cheqamanta kaj yachay

¹⁸Yachayqa Señorta yupaychaymin. Yachaywan junt'asqa pichus Diospa kamachisqanta ruwan.

¹⁹Sajra kajta rejseyqa manaraj yachaychu. Juchasapaspa ukhupeqa mana kanchu unanchakuy.

²⁰Wakin runas, umayoj kaspapis, nisqankupi pantanku. Mana umayojqa nitaj yuyayniyojchu.

²¹Tiyan pisi umayojkuna pikunachus Diosta munakunku. Kallantaj umayojkuna pikunachus Diospa kamachisqasninta mana junt'ankuchu.

²²Wakinku yachasqankuwan runa masisninkuta llakichinku. Wakinkutaj, cheqan kajta mask'aspa paykunapaj llullakunku.

²³Tiyan pikunachus jawamanta k'umuykukusqas purinku, llakisqastaj. Ukhunkupitaj llullakuywan junt'a kanku.

²⁴Paykunaqa umankuta k'umuykuspa joq'araman tukunku. Jinapis, qanta sarusunku.

²⁵Kunanqa manachá atinrajchu mana allin kajta ruwasuyta. Atiytawanqa imallatapis ruwasonqapuni.

²⁶Runataqa rejsinchej uyanmanta. Runaqa yachayniyoj kasqanta rikuytawampacha yachallanchej.

²⁷Imaynachus uj runa kasqanta yachanchej p'achanmanta, asirikuyninmanta, puriyninmantataj.