Read Quechua Bolivia DC Bible ECLESIÁSTICO 20 Bible Online

ECLESIÁSTICO 20 - Quechua Bolivia DC Bible bible

ECLESIÁSTICO 20

¹Imaynamanta yachakun pichus yachayniyoj Wakin runasqa mana yachankuchu mayk'ajchus k'amina. Wakin runastaj ch'inlla kakuspa allinta ruwanku.

²K'aminayki kajtin, k'amillay, mana phiñakuspalla.

³Juchanta willakojqa mana juchachasqachu kanqa.

⁴Pichus kallpawan justiciata ruwayta munan, rijch'akun uj eunucoman pichus munanman sipaswan puñukuyta.

⁵Mana parlakojmanta ninchej yachayniyoj kasqanta. Anchata parlajtarí chejninchej.

⁶Wakin ch'inlla kanku mana ni imata niyta yachasqankurayku. Wakintaj ch'in kanku allinta yachaspa mayk'ajchus parlananku tiyan.

⁷Yachayniyojqa yachan mayk'ajchus ch'in kanan tiyan, yachallantaj mayk'ajchus parlanan tiyan. Mana yachayniyojtaj jayk'ajllapis parlallan.

⁸Anchata parlajqa mana munachikunchu. Runa masinta sarojqa chejnichikun.

⁹Llakiypa qhepampi kusikuy jamullan. Kusikuypis llakiyman tukullantaj.

¹⁰Qospapis mana ni imata jap'ikunkichu. Chantapis, waj kuti qonki, ujmantataj iskayta jap'ikunki.

¹¹Wakinku patamanta uraman uraykamunku. Wakinkutaj, urapi kaspa umankuta oqharinku.

¹²Wakinku pisillata rantinapaj ashkha qolqeta qonku, qanchis kutita pagaspa valesqanmanta astawan.

¹³Yachayniyoj runaqa pisillata parlaspa munachikun. Mana yachayniyojtaj, anchata parlasqanmanta mana munachikunchu.

¹⁴Mana umayojpa qosusqanqa mana ni imapaj sirvinchu. Ñawisnimpajqa chay qosqan, kasqanmanta aswan jatun rijch'an.

¹⁵Payqa pisillata qon. Chantapis anchatapuni runaspaj parlan. Payqa siminta jatunta kichan qhaparispa. Kunan qosunki, q'ayataj chay qosusqanta mañakapullasonqataj. Paymanta ayqenapaj jina chay runaqa.

¹⁶Mana umayojqa nishan: Amigosniy mana kapuwanchu, nispa. Mana ni pi agradekceuwanchu, nillantaj.

¹⁷T'antaymanta mikhojkunaqa sajra simis kanku, nispa nishan. Runastaj paymanta asirikunku.

¹⁸Chakiwan misk'ayqa aswan walej misk'aymantaqa simiwan. Sajra runasqa ujllapi misk'anqanku.

¹⁹Q'ayma aycha jina sonsoj parlaynin.

²⁰Allimpis kachun sonsoj nisqanqa, chay nisqanta runas mana uyarinkuchu. Mana ninan kajtillan chayta nerqa ari.

²¹Wakinku ancha wajchas kasqankurayku mana juchallikunkuchu. Sonqonqa mana ni imamanta k'aminchu. Chayrayku paykunaqa allin kaypi samarikullan.

²²Kallantaj pikunachus pisi sonqo kasqankurayku chinkayman rinku. Sonsosta qhatisqankurayku paykunapis urmallankutaj.

²³Kallantaj pichus manchali kaspa, promesata ruwan amigonman. Mana junt'ayta atispataj, chay nisqanman uj enemigotaña tarikun.

²⁴Runaqa llullakuywan ch'ichichakun. Mana umayojkuna llullakushankupuni.

²⁵Suwaqa aswan walej llulla runamanta. Jinapis, iskayninku chinkayman rinku.

²⁶Llulla runa p'enqaypipuni rikhurin. Sutin ch'ichichasqapuni.

²⁷Yachayniyojtaj nisqanmanta munachikumpuni. Umayoj runaqa atiyniyojkunawan munachikumpuni.

²⁸Jallp'ata llank'ajqa qhapaj kanqa. Atiyniyojkunawan munachikojtaj, juchallikonqa chayqa, perdonachikullanqa.

²⁹Regalosqa yachayniyojkunaj ñawisninkuta ciegoyachin. Simisninkutataj qhataykun ama k'aminampaj.

³⁰Yachayqa, pakasqa kajtin, mana rikukoj qoripis, imapaj sirvinkuri?

³¹Aswan walej uj runa locoyasqanta pakajqa, uj runamanta yachayninta pakajmantaqa.