Read Quechua Bolivia DC Bible ECLESIÁSTICO 21 Bible Online

ECLESIÁSTICO 21 - Quechua Bolivia DC Bible bible

ECLESIÁSTICO 21

¹Juchaqa chinkayman apan runata Wawáy, juchallikorqankichu? Ama ujtawan juchallikuyñachu. Tukuy juchasniykimantataj perdonta mañakuy.

²Juchamanta ayqey katarimanta jina. Qayllanki chayqa, qhanichikuwaj. Leonqa kirusninwan runasta wañuchin.

³Juchaqa uj khuchuna jina, iskay ladomanta filochasqa. Runaqa chaywan khuchuchikunman chayqa, mana thañinmanñachu.

⁴Qhapaj runaqa wajchaman tukun anchata oqharikuspa, wapuman tukuspataj. Wapu wapoj wasanqa t'unarparichisqa kanqa.

⁵Diosqa wajchaj mañakuyninta uyarin, usqhayllatataj maychus kajta qopun.

⁶Mana k'amichikuyta munajqa, juchasapaj qhepampi purishan.

⁷Karumantapacha ch'ajwakuta rejsinchej. Umayojrí kikin juchasninmanta reparakun.

⁸Pichus wasinta ruwan wajpa qolqenwan, rijch'akun pimanchus rumista astan kikin sepulturanman.

⁹Sajra runasqa ch'aki llant'a jina kanku. Ruphaykonqanku.

¹⁰Juchasapaj ñannin sumaj allinchasqa. Jinapis, wañuyman apan. Yachayniyojmanta, mana yachayniyojmantawan

¹¹Señorpa kamachisqasninta junt'ajqa mana juchawan atipachikunchu. Señorta yupaychajqa yachayniyojman tukun.

¹²Mana umayojqa mana yachakuyta atinchu. Wakin runas, umayojkunapis kajtinku, llakisqa sonqolla purinku.

¹³Yachayniyojpa yachakusqanqa mayu jina. Nisqasnin mana tukukoj juturimanta jina p'utumunku.

¹⁴Sonsoj umanqa lajra manka jina. Yachakusqanqa sut'urishan.

¹⁵Umayoj runa uyariytawan k'acha palabrasta, umampi jap'ikun. Chaymanta, waj k'acha palabrastapis yapallantaj. Uj sonsorí, uyariytawantaj q'ellikumpacha, manataj uyarimpischu.

¹⁶Sonsota uyarejqa rijch'akun llasa q'epiwan purej runaman. Umayojta uyarikojrí mayta kusikun.

¹⁷Runasqa tantakuspa yachayniyojpa nisqanta uyarikunku. Uyarisqankuwantaj unanchanku.

¹⁸Sonsoj yachakusqanqa raqayman rijch'akun. Nisqanqa manapuni entiendekunchu.

¹⁹Rikuymá cadenasqa chakista, uj watasqa paña makitawan. Ajina, sonsopis yachayninwan.

²⁰Sonsoqa simin kicharisqa asikun. Umayojtaj asirillan.

²¹Rikuymá imallatapis qorimanta ruwasqata. Rikuytaj uj paña makita qori warawasniyojta. Ajina yachayniyoj runaqa.

²²Sonsoqa wasisman yaykullan. Umayojrí wasi punkupi suyarikullanraj wasiyoj pasachinanta.

²³Sonsoqa, wasiman yaykuspa, tukuy imata rikushanña. Umayojri jawallapi sayan.

²⁴Umayojqa manapuni uyarinmanchu punkumanta wasi ukhupi nisqankuta. P'enqaymanta wañunman.

²⁵Ch'ajwilisqa tukuy uyarisqankuta parlallanku. Umayojkunarí, imallatapis ninankupaj unanchakunkuraj.

²⁶Sonsoqa imachus yuyasqanta nillan. Yachayniyojrí yuyashanraj imatachus ninanta.

²⁷Sonsoqa, millayta parlaspa enemigompaj, kikin paypa contrampi parlashan.

²⁸Qhasimanta parlajqa, pay kikinta dañota ruwakun. Vecinosninwantaj chejnichikun.