Read Quechua Bolivia DC Bible ECLESIÁSTICO 23 Bible Online

ECLESIÁSTICO 23 - Quechua Bolivia DC Bible bible

ECLESIÁSTICO 23

¹Señorniy, tatáy. Kausayniy makisniykipi kashan. Simiy ama atipawachunchu. Yanapaway, mana simiy urmachinawampaj.

²Pitaj yuyasqasniyta jasut'iykunman? Pitaj sonqoyman yachayta yaykuchinman? Pitaj jasut'iwanman, mana ch'inlla qhawaspa juchasniyta?

³Ajinamanta, manaña wist'uta purisajchu, nitaj juchasniy miranqachu. Manataj urmasajchu chejniwajkunaj makisninkuman. Manañataj chaykuna asipayawanqankuchu.

⁴Señorníy, tatáy. Kausayniy makisniykipi kashan. Yanapaway ama ñawisniy patamanta qhawanampaj runa masisniyta.

⁵Karunchay sonqoymanta sajra munapayayta.

⁶Ama sonqoy ch'ichikakuchun millaykunata ruwaspa. Jap'iway ama p'enqaykunata yuyanaypaj. Simimanta

⁷Wawasníy, noqaj yachachisqayta uyariychej, Uyariwankichej chayqa, mana juchawan ch'ipachikunkichejchu.

⁸Juchasapaqa siminnejta jap'ichikun. Wapu wapu oqharikusqa runaqa kikin nisqampi misk'an.

⁹Ama simiyki yachasqachu kachun juramentosman. Amataj qhasillamanta oqhariychu Diospa sutintaqa.

¹⁰Sichus mayllapipis jayk'ajllapis kamachita rikullashankupuni, chay kamacheqa jasut'iymanta mana ayqenqachu. Ajinallataj, pichus sapa kuti Diospa sutinta oqharishampuni, juchachasqa kanqa.

¹¹Anchata jurajqa, anchatataj juchallikun. Chayrayku jasut'iy mana karunchakonqachu wasinmanta. Pantajtin juchallikun. Mana yachashajtimpis imatachus ruwasqanta, iskayta juchallikun. Qhasimanta juranman chayqa, juchachasqapuni kanqa. Imaymana llakiytaj ayllunman chayamonqa.

¹²Khuchi simej nisqan wañuyman apan. Jacobpa ayllun ukhupi ama chaykunataqa nichunkuchu. Diosta munakojkunaqa mana jucha chaupipi lat'aykachankuchu.

¹³Simiyki mana yachasqachu kachun khuchi palabrasman. Yachasqa kanman chayqa, juchaman urmawaj.

¹⁴Qhapajkunawan tiyashajtiyki, tata mamaykimanta yuyarikuy. Pajtataj imallatapis niwaj, mana umayojta jina qhawachikuspa. Maldicinkitaj nacekusqayki diata.

¹⁵Sajra sutista churayta yachajqa, chayllatapuni ruwanqa tukuy kausaynimpi. Qhenchachakuymanta

¹⁶Iskay laya runas juchasninkuta mirachinku. Kallantaj kinsa kaj laya. Chay runasqa Diosta phiñachinku.

¹⁷Imaynachus ninaqa larwarishampuni llant'a tukuchisqa kanankama, ajinallataj runaj millay munapayaynin larwarishampuni, munasqan ruwasqa kanankama. Warmita munapayajqa larwarishampuni, larwaynin wañusqa kanankama. Warmista qhatiykachajqa rijch'akun ima t'antallatapis mikhojman. Mana sajsakonqachu larwaynin tukuchinankama.

¹⁸Warminta wasanchaspa qhenchachakoj qhareqa sonqompi nishan: Pitaj rikuwashanri?, nispa. Laqhapi kashani. Perqaslla muyuyniypi. Ni pi rikuwashanchu. Imamanta manchachikusajri? Patapi kaj Diosqa juchasniymanta mana yuyarikonqachu, nispa nishan.

¹⁹Payqa runaspa ñawisninkullamanta manchachikushan. Mana yachanchu Señorpa ñawin intimanta nisqaqa aswan k'anchayniyoj kasqanta waranqa kutita. Mana yachanchu Señorpa ñawin rikusqanta runaj tukuy purikusqasninta, chayasqantataj aswan pakasqa k'uchusmampis.

²⁰Manaraj tukuy imata ruwashaspa, Señorqa chaykunata rejserqaña. Tukuytawantaj, rejsillashampuni.

²¹Qhenchachakoj runaqa, mana cuentata qokuspalla jap'ichikonqa. Tukuy runas rikushajtinkutaj castigachikonqa.

²²Kikillantaj kanqa warmiwan pichus qhenchachakun qosanta wasanchaspa, nacechikuntaj uj wawata waj qharipaj.

²³Ñaupajtaraj chay warmeqa patapi kaj Diospa kamachisqanta mana junt'arqachu. Chaymantataj, qosampa contranta juchallikorqa. Chantaqa, qhenchachakuspa ch'ichichakorqa, wawatataj nacechikorqa waj qharipaj.

²⁴Chay warmeqa pusasqa kanqa runaspa ñaupaqenkuman. Juchantaj wawasnimpa patankumampis urmanqa.

²⁵Wawasnin mana saphiyoj sach'a jina kanqanku. Manataj poqoyniyojchu.

²⁶Sutin maldicisqa qhepakonqa. P'enqaynintaj mana pichasqachu kanqa.

²⁷Ajinamanta, tukuy runas yachanqanku Señorqa respetanata tukuy imamanta astawan. Yachallanqankutaj kamachisqasninta junt'ayqa aswan misk'i kasqanta tukuy imamanta nisqaqa.