Read Quechua Bolivia DC Bible ECLESIÁSTICO 24 Bible Online

ECLESIÁSTICO 24 - Quechua Bolivia DC Bible bible

ECLESIÁSTICO 24

¹Yachay takiy Yachayqa pay kikinta alabakun. Runa chaupipi k'anchayninta rikuchin,

²Yachayqa siminta kicharin Diospa ñaupaqempi. Angelkunaj ñaupaqenkupitaj nin kay jinata:

³Patapi kaj Diospa siminmanta llojserqani noqaqa. Wausi jinataj kay pachata qhatarqani.

⁴Janaj pachapi tiyakoj kani. Tiyanayqa uj rakhu aysasqa phuyu.

⁵Noqa sapallay janaj pachata muyuykoj kani. Chayarqanitaj kay pachaj ukhunman.

⁶Jatun qocha yakus patapi kamachej kani. Jinallataj tukuy jallp'aspi. Tukuy aylluspata, tukuy llajtaspatawan kamachejninku karqani.

⁷Tukuynejpi mask'arqani uj cheqata samarikunaypaj, uj wasita tiyakunaypaj.

⁸Chantaqa, tukuy imata ruwajqa, uj ordenta qomuwarqa. Pichus noqaqa ruwawarqa, ajllapuwarqa uj cheqata, chaypi wasi toldoyta sayarichinaypaj. Pay niwarqa: Jacob ayllu ukhupi tiyakunki. Israel aylloqa chayaqeyki kanqa, nispa.

⁹Wiñaymantapacha, qallariypipuni pay ruwawarqa. Wiñaytataj kausakusajpuni.

¹⁰Santo wasipi paypa kamachin karqani. Sión orqopitaj tiyakoj kani.

¹¹Ajina, pay samarichiwarqa ajllakusqan llajtapi. Jerusalempi atiyniyoj karqani.

¹²Kay lliphipiyniyoj ayllupi saphinchakorqani, Señorpa kikin ajllakusqan ayllumpi.

¹³Líbano cedro sach'a jina wiñarqani, Hebrón orqo pino jina.

¹⁴Chantapis, Engadi palma sach'a jina, Jericó rosas jina. Chantapis, pampapi olivo sach'a jina. Mayus cantopi sayashaj castaño sach'a jinapis.

¹⁵Q'apayniytaj canelaj q'apaynin jina karqa. Sumaj t'ikaj q'apaynin jina. Sumaj ajllasqa mirra jina q'apaj kani. Imaynachus incienso q'osñishan santo wasipi, ajinallataj noqapis q'apaj kani.

¹⁶Terebinto sach'a jina makisniyta kicharej kani. Laqhesniytaj t'ikasniytaj ashkha, may k'achitu qhawanapaj.

¹⁷Uva sach'a jina mirarqani. Poqoyniytaj ashkha, may k'acha.

¹⁸Noqata munakuwajkuna, jamuwaychej. Poqoyniywan sajsakuychej.

¹⁹Sutiy aswan misk'i abeja misk'imanta nisqaqa. Pichus jap'iwajqa, aswan qhapaj kanqa abeja panalniyojmanta.

²⁰Mikhuwajqa yarqhachikullanqaraj. Ujyawajqa ch'akichikullanqaraj.

²¹Uyariwajqa mana p'enqaypichu rikhurenqa. Kasuwajqa mana juchaman urmanqachu.

²²Tukuy kay nisqayqa tratomanta libropi tarikun, Dios israelitaswan ruwarqa chay tratomanta yachachej libropi. Chay Diospa leyninta Moisés israelitasman yachacherqa. Chaymin Jacob aylloj chayaqen.

²³Diospa leynin yachaywan junt'a, Pisón mayu jina. Imaynachus Tigris mayunejpi, sach'as sumajta poqonku, poqochiy killas chayamojtin, ajinallataj Diospa leynimpis.

²⁴Diospa leynin yachayniyoj Eufrates mayu jina. Imaynachus Jordán mayunejpi tipiy killaspi trigo ashkhayan, ajinallataj Diospa leynimpis.

²⁵Nilo mayu jina, runasta yachachin. Imaynachus Guijón mayunejpi, uvasta pallay killaspi ashkhata pallanku, ajinallataj Diospa leynimpis.

²⁶Mana ni pi allintapuni rejserqachu yachaytaqa. Ñaupajta payman chayajqa, mana entienderqarajchu as allinta. Ajinallataj, qhepapiña chayajpis nitaj payta entiendeyta qallarerqarajchu.

²⁷Yachaj yuyaynenqa, jatun qochaj aswan junt'a. Munaynintaj ukhu pachamantaqa aswan jatun.

²⁸Noqarí juch'uy mayu jina kani, jatun mayumanta llojsishan ajina. Imaynachus larq'a yakoqa chajrasta qarpamun, ajinallataj noqapis.

²⁹Noqa kikiyta nikorqani: Chajrayta qarpamusaj, jallp'asniyta ch'aranchachisaj, nispa. Ujta, larq'ay mayuman tukorqa, mayuytaj qochaman.

³⁰Yachakusqay k'ancharenqa tutamantapacha. Yachaypa k'anchaynin karuman chayanqa.

³¹Imaynachus profetas ruwarqanku, ajinallataj noqapis yachasqayta yachachimusaj qhepaypi jamoj runasta.

³²Tukuy kaytaqa mana noqallapajchu ruwarqani, manachayqa tukuy yachayniyoj kayta munajkunapajpis.