Read Quechua Bolivia DC Bible ECLESIÁSTICO 25 Bible Online

ECLESIÁSTICO 25 - Quechua Bolivia DC Bible bible

ECLESIÁSTICO 25

¹K'acha runasmanta Kinsawan kusikuni noqaqa. Kinsantin kusirichin Diostawan runastawan. Chay kinsaqa kaymin: Hermanospura munanakuy. Amigospura munanakuy. Qhari warmipura munanakuy.

²Kinsa laya runasta sonqoy anchatapuni chejnikun. Chaykunamanta mayta millachikuni. Chay kinsa laya runasqa kaymin: Wapu wapu wajchu runa. Mich'a qhapaj runa. Warmista qhatiykachaj mana umayoj machu runataj.

³Manachus wayna kayniykipi yachayta tantarqanki chayqa, imaynataj machu kayniykipi yachayniyoj kawajri?

⁴Sonqoy kusirikun rikuspa yuraj chujchayoj abuelota, yachayniyojta. Mayta kusirikun rikuspa kurajkunata unanchakojta.

⁵Kusikunchej yachayniyoj machu runata rikuspa. Kusikullanchejtaj rikuspa unanchakoj kurajkunata.

⁶Machu runaqa yachakusqanwan umanta pilluchakun. Pataman oqharisqa kanqa Diosta munakusqanrayku.

⁷Isq'on laya runa sonqoyta kusirichin. Uj laya runataj simiypi kashan. Chaykunaqa kaymin: Chay runa pichus wawasnin ukhupi kusikuyninta tarin. Chay runa pichus kacharichikun chejnikojpa makisninmanta.

⁸Sonqoyta kusirichin chay runa pichus umayoj warmiwan casarakun. Chay runa pichus mana llank'anchu wakawan, burrowan, watasqa yuntawantaj. Chay runa pichus mana ni jayk'aj siminwan juchallikorqachu.

⁹Sonqoyta kusirichin chay runa pichus uj amigota tarikun, pichus mana joq'ara ningrimanchu parlan.

¹⁰Yachayta tarikojqa may jatun. Jinapis, Diosta munakojqa aswan jatunmin.

¹¹Señorta munakoyqa tukuy ima patapi kashan. Señorta munakojqa ni piwan kikinchakunchu. K'acha warmimantawan sajra warmimantawan

¹²Sonqo nanay tukuy nanachikuymanta aswan sinch'i. Warmej chejnikuynin tukuy chejnikuymanta aswan sinch'i.

¹³Chejnikuymanta llakiy tukuy llakiykunamanta aswan sinch'i. Tukuy maqanakuykunamantaqa, chejninakojkunaj maqanakuynin aswan sinch'i.

¹⁴Katarej qhanikuynin tukuy qhanikuykunamanta aswan sinch'i. Warmej phiñakuynin tukuy phiñakuykunamanta aswan sinch'i.

¹⁵Leonwampis sierpewampis kausakullayman noqaqa. phiña warmiwan kausakuymantaqa.

¹⁶Phiña warmej uyanqa waj jinaman tukun. Jukumarichá ninchejman.

¹⁷Chay warmej qosanqa masisninwan khuska kashajtin, munaspapis mana munaspapis, phutiyninta rikuchishan.

¹⁸Warmej sajra kaynin tukuy sajra kaymanta aswan sinch'i. Juchasapa chay jina warmiwan kausachun.

¹⁹Rikuymá uj machu runata t'iyu lomanta purejta. Kikillantajqa ch'ajwaj warmi, sonqo tiyasqa qharipaj.

²⁰Ama jap'ichikuychu warmej k'acha kayninwan. Amataj kapuyninta munapayaychu.

²¹P'enqay qharipaj warminwan mantienechikuspa kausananqa.

²²Sonqon phirisqa, uyan llakisqa, mana animoyoj ima purishan sajra warmej qosanqa. Makisnin mana kallpayojchu. Chakisnintaj llauch'illa. Ajina purishan qhareqa pitachus warmin llakichin.

²³Uj warminejta jucha rikhurimorqa. Paynejta tukuyninchej wañunanchej tiyan.

²⁴Ama larq'ata kichariychu. Yaku kachaykukunman. Ama sajra warmej siminta kichariychu. Parlanman.

²⁵Warmiyki mana munanman chayqa makiykiman pusachikuyta, t'aqakapuy.