Read Quechua Bolivia DC Bible ECLESIÁSTICO 26 Bible Online

ECLESIÁSTICO 26 - Quechua Bolivia DC Bible bible

ECLESIÁSTICO 26

¹K'acha sonqo warmiwan casarakojqa kusikuyniyojmin. Watasnin iskay kuti kanqa.

²K'uchi warmi qosanta qhapajyachin. Qosanqa sonqo tiyasqa kausakullanqa.

³Ima sumaj k'acha sonqoyoj warmeqa. Señorta munakojqa chay warmita tarenqa.

⁴Qhapajpis wajchapis, chay qhareqa kusisqa uyallapuni.

⁵Kinsamanta sonqoy manchachikun. Ujtaj kharkatitichiwan. Chayqa kaymin: Cuento q'epis. Runa oqharikuy. Llulla simis. Wañoyqa aswan walej chaykunamanta nisqaqa.

⁶Celosa warmeqa manchayta sonqoyta nanachiwan. Simenqa chicote jina tukuyta jasut'iykun.

⁷Mana allin watasqa yugo jina sajra warmeqa. Payman qayllayqa sajra khuruta jap'iriy jina.

⁸Machasqa warmeqa mayta llakichin. P'enqaynin mana pakasqachu.

⁹Mana allinta purej warmeqa kayman jaqayman qhawaykachallan. Ñawisnimpi yachakun imachus pay.

¹⁰Sipasqa k'anchillataj qhalinchataj kanan chayqa, allinta qhawaykuy. Ichapis llamp'u sonqota rikususpa, imallatapis ruwanman.

¹¹Asirikoj ñawisninta rikuy. Sonqoykita nanachisonqa chayqa, ama t'ukuychu.

¹²Ch'akichikoj purej runa jina, payqa siminta kicharishan. Ima pujyumantapis yakuta ujyallan. Mayqenllawampis tiyarillan. Mayqenllawampis pusachikullan.

¹³K'acha sonqo warmeqa qosanta kusichin. Umayojtaj kanman chayqa, qhapajyachin.

¹⁴Mana ch'ajwaj warmeqa Diosmanta jamun. Sumaj uywasqa warmeqa mana rantikunchu.

¹⁵Respetachikoj warmeqa aswan k'acha. Llimphu sonqoyoj warmeqa, k'achamantaqa aswan sumaj.

¹⁶Señorpa cielompi inti k'anchaykun. Llimphuchasqa wasimpi k'acha warmi k'anchaykun.

¹⁷K'anchay jina k'anchanampi, ajina k'acha warmej uyampis.

¹⁸Qolqe sayanapi qori pilar. Ajinallataj k'acha warmej chakisnin. Llakichiymanta

¹⁹Iskay llakichiwan. Ujtaj phiñachiwan. Chayqa kaymin: Wajchaman tukoj qhapaj runa. Umayoj runas qhesachasqas. Cheqan sonqoyoj runa juchasapaman tukoj. Kaytaqa Señor espadawan wañuchichenqa. Qhatukojkunamanta

²⁰Mana juchayoj qhatukojkunaqa pisilla kanku. Ñak'aymanta tarinchej mana juchayoj comerciantesta.