Read Quechua Bolivia DC Bible ECLESIÁSTICO 27 Bible Online

ECLESIÁSTICO 27 - Quechua Bolivia DC Bible bible

ECLESIÁSTICO 27

¹Qolqerayku ashkha runas juchallikunku. Qhapajchakuyta munajqa sonqonta rumiyachin.

²Qaqa t'oqopi k'aspi sat'iykukun. Qhatupi jucha sat'iykukun.

³Runachus mana Señorman k'askanman chayqa, wasin t'unarparichisqa kanqa.

⁴Cedazota thalaspa q'opalla qhepakapun. Jinallataj, runa parlajtin, juchan rikhurin.

⁵K'analleroqa ninanejta yachan imaynachus llink'i. Ajinallataj, imaynachus runapis yachakun parlakusqampi.

⁶Sach'aj layanqa yachakun poqoyninnejta. Ajinallataj, runaj layan yachakun siminnejta.

⁷Mana runa parlashajtinraj, ama niychu imaynachus pay. Parlayninnejta ari runaqa rejsichikun.

⁸Cheqan kajta mask'ashanki chayqa, jap'inkipuni. K'acha p'achachus kanman jina, chaywan p'achallikunki.

⁹P'isqosqa masisninkuwan khuska kausanku. Cheqan kajtaj cheqan sonqoyojkunawan kausan.

¹⁰Wateqaj león jina, juchaqa sajra runata awaytashan.

¹¹Diosman k'askasqa runaqa yachay palabrasllata parlan. Diosmanta karunchakojtaj, killa jina, mana kikimpichu sayan.

¹²Ama unaytachu kakuy mana umayojkunawan. Umayojkunawantaj, unayta kakullay.

¹³Sonso runaspa parlayninku phiñachiwanchej. Juchawan t'uruchakuspa asirikushanku paykunaqa.

¹⁴Millayta parlasqankuta uyarispa, kharkatitinchej. Ch'ajwajtinkutaj, mana uyariyta munanki chayqa, makisniykita churanayki tiyan ningrisniykiman.

¹⁵Wapu wapus maqanakojtinkoqa, yawar rikhurimun. Ninakusqankoqa manapuni uyarinapajchu. Pakasqa kajtaqa ama willaychejchu

¹⁶Pakasqa kajta willakojmanqa, runasqa ni imata willankuñachu. Payqa mana tarenqañachu uj qaylla amigota.

¹⁷Amigoykita munakuy, amataj wasanchaychu. Sichus wajkunamampis willarqanki chayqa, imatachus qan sapallaykiman nisorqa chayta, amaña payman riychu.

¹⁸Uj runa wañuchi jina, qanqa chay qankuna ukhu munanakusqaykichejta wañucherqanki.

¹⁹Imaynachus p'isqota jap'iytawantaj, makiykita kicharinki, p'isqotaj phawakapun, ajinallataj amigoykipis phawakaporqaña. Manaña ujtawan rikunkiñachu.

²⁰Ama qhatiyñachu. Karupiña. Imaynachus taruka ayqepun ch'ipamanta, ajinallataj paypis.

²¹Nanachikususqankuta jampichikullanki. Nisusqankumanta qonqapullanki. Pakasqa kajta willajta mana perdonachikunmanchu. Puraj uya kaymanta

²²Chay runaqa ñawinta ch'irmispa imatachá mana allin kajta ruwayta munashan. Mana ni pi jark'anqañachu.

²³Ñaupaqeykipi payqa misk'i simi. Imallatapis nejtiyki, t'ajllan. Wasaykimantataj uj jinaman tukun. Kikin nisqaykiwantaj urmachisuyta munashan.

²⁴Chay runata tukuy imamanta astawan chejnikuni noqaqa. Señorpis payta chejnikullantaj.

²⁵Chhoqaymá pataman uj rumita. Umaykiman urmasonqa. Ajinallataj, wasamanta maqajqa, maqachikullanqataj.

²⁶Jusk'uta ruwajqa chay jusk'uman urmanqa. Ch'ipata ruwajqa, paypis ch'ipaykuchikonqa.

²⁷Sajrata ruwajqa, sajra kajwan jap'iykuchikonqa, manataj yachanqachu maymantachus chayamusqanta.

²⁸Wapu wapoqa rimarintaj asipayantaj. Chayrayku, jasut'iy, león jina payta wateqashan.

²⁹Pikunachus asirikunku cheqan sonqoyoj runa urmasqanmanta, ch'ipawan ch'ipaykuchikonqanku. Manaraj wañushaspa, nanaywan junt'asqas kanqanku. Perdonay, perdonachikunkitaj

³⁰Chejninakuytaj phiñanakuytaj, millay. Juchasapaqa chaykunawan pejtusqa kashan.