Read Quechua Bolivia DC Bible ECLESIÁSTICO 28 Bible Online

ECLESIÁSTICO 28 - Quechua Bolivia DC Bible bible

ECLESIÁSTICO 28

¹Sajra kajmanta kutichikojqa, Dioswan kutichikullanqataj. Diosqa allintampuni yuyarikun paypa juchasninmanta.

²Runa masiykej juchasninta perdonapullay. Ajinamanta, Diosmanta mañakojtiyki, juchasniyki pampachasqa kanqa.

³Runaqa, chejnikushajtinraj runa masinta, atinmanchu Diosmanta mañakuyta thañichinanta?

⁴Chay runaqa runa masinmanta mana khuyakunchu. Imajtin mañakushanri paymanta khuyakunankuta?

⁵Runalla kaspa, chejnikushanraj. Pitaj paypa juchasninta perdonanqari?

⁶Yuyarikuy wañupunayki kasqanta. Ama chejnikuyñachu. Wañupunki. Ukhuyki jallp'aman tukonqa. Chayrayku, Diospa kamachisqanta junt'allayña.

⁷Yuyarikuy Diospa kamachisqasninmanta. Ama runa masiykita chejnikuyñachu. Yuyarikuy Dioswan ruwasqa chay tratomanta. Chay juchallikusqankumantataj qonqapullayña. Ama maqanakuychejchu

⁸Runas maqanakushajtinku, ithiriy. Chayta ruwaspaqa, mana qampis juchallikunkichu. Phiña runaqa maqanakusta enqhaykun.

⁹Amigos kajkuna, juchasaparayku, paykunapura maqanakunku. Juchaspa tumpasqanmanta, allinta kausajkunapis phiñanakunku.

¹⁰Llant'ata yapajtinku, nina astawan larwarimun. Astawan ch'ajwajtinkutaj, astawan maqanakonqanku. Astawan maqanakojtinkutaj, astawan phiñanakonqanku. Aswan qhapaj kajtinrí, astawan phiñakonqa.

¹¹Uj ichhullawan nina qallarin. Sinch'ichu maqanaku? Yawar rikhurimonqa.

¹²Phukuymá ninaman. Jatunyachinki. Thoqaymá. Wañuykuchinki. Iskaynintaj simiykimanta llojsin. Sajra parlajkunamanta

¹³Tumpajtaj puraj uyataj maldicisqas kachunku. Chaykunaqa allillanta kausajkunata chinkayman pusarqanku.

¹⁴Jaya simeqa ashkha runasta llakichin. Ayqespa, llajtamanta llajta rinku. Sinch'i perqachasqa llajtapis raqayman tukuy. Qhapaj wasispis t'unarparichisqas kanku.

¹⁵Sajra simirayku, k'acha warmis qosasninkuwan wijch'uchikunku. Llank'asqankutaj wayra apakapun.

¹⁶Sajra simita uyarejqa, manaña sonqo tiyasqa kausanqachu. Allin kausaynin tukukapun.

¹⁷Chicoteqa q'oyuyachin. Simitaj tulluta p'akin.

¹⁸Espadanejta ashkha runas wañorqanku. Siminejtataj aswan ashkha.

¹⁹Runaj siminmanta jark'akojqa kusikuyniyojmin. Phiñakuyninwan mana jap'ichikonqachu. Yugonwampis mana mat'ichikonqachu. Nitaj cadenasninwan watachikonqachu.

²⁰Yugonqa fierro yugo. Cadenasnintaj bronce cadenas.

²¹Nanaykuchisqan manchachikunapaj jina. Aswan walejtaj wañuy.

²²Jinapis, mana atipanqachu cheqan sonqoyojkunata. Paykunata ninaman mana yaykonqankuchu.

²³Señormanta karunchakojkunataj ninanman yaykullanqanku. Chay ninawan jap'ichikonqanku, manataj thasnonqachu. Larwaynin qhepankupi renqa león jina. Puma jinataj oqoykonqa.

²⁴Jallp'aykita khishkaswan muyuykuchiy. Qoriykitawan qolqeykitawan sumajta jallch'ay.

²⁵Jinallataj, simiykita allinta wisq'ay. Punkuta churaspa, llaveykuy. Parlanayki kajtin, unanchakuyraj.

²⁶Ama simiykiwan llusk'aychu. Chejnisojkuna jap'isunkuman.