Read Quechua Bolivia DC Bible ECLESIÁSTICO 29 Bible Online

ECLESIÁSTICO 29 - Quechua Bolivia DC Bible bible

ECLESIÁSTICO 29

¹Manukuymanta Khuyakoj runaqa, runa masinman mañallan. Pichus runa masinta yanapan, Diospa kamachisqanta junt'ashan.

²Runa masiykita mañay pisichikushajtin. Qanrí, manukusqaykita runa masiykiman kutichipuy.

³Imatachus ruwanaykita nerqanki, ruwaypuni. Ajina, imachus munanki ruwakullanqa.

⁴Wakinku manukusqankuta jap'ikapullanku. Yanapajtataj llakiynimpi saqellanku.

⁵Qochikunankupaj qolqeyojpa makinta much'aykunku. K'umuykukunkutaj qhapajpa ñaupaqenman. Paganankupajtaj mana tarichikunkuchu. Tarichikojtinkutaj, mayta llakikuspa pacienciakunanta ninku.

⁶Phiñakuspapis, chay mañajqa khuskallanta pagachikonqa. Chaytaj suerten kanqa. Manachayqa, qolqen chinkanqaña, qhasimanta enemigoyojtaj rikhurenqa. Chay runaqa paganqa maldicioneswantaj millay palabraswantaj, mana respetaspalla.

⁷K'acha sonqoyojkunapis mana mañayta munankuchu. Mana sajraschu kanku. Jinapis, mana munankuchoqa mana ni imayoj rikhuriyta. Limosnamanta

⁸Wajchasmanta khuyakuypuni. Ama mich'akuychu.

⁹Diosqa nisunki yanapanaykita wajchasta. Pisichikojtinku, ama wasiykimanta llojsichunkuchu ch'usaj makiyoj.

¹⁰Qolqeykimanta qollay hermanoykimantaj amigoykimantaj. Ama qolqeykitaqa waqaychaychu rumi urapi.

¹¹Kapususqanmanta usota ruway Diospa kamachisqanman jina. Chaytaj qampajqa aswan walej qorimantaqa.

¹²Kachumpuni qolqeyki limosnapaj. Chayqa llakiymanta llojsichisonqa.

¹³Limosna qosqayki yanapasonqa, chejnisojkuna jamojtinku, jark'anamanta astawan, t'ojsinamanta astawampis.

¹⁴Cheqan sonqoyoj runaqa llojsillan runa masinta yanapaj. Mana p'enqakojtaj saqerparillan runa masintaqa.

¹⁵Ama qonqapuychu qolqenwan yanapasojmanta. Payqa qanrayku kausayninta churarqa.

¹⁶Juchasapaqa manukusqan qolqeta chinkachillan. Mana yuyarikunñachu payta yanapajmanta.

¹⁷Ashkha runasqa wajchasman tukunku yanapasqankurayku. Mayuwan apachikusqas jinalla kashanku.

¹⁸Ashkha runasqa mana wasiyoj rikhurinku, ripunkutaj karu llajtasman.

¹⁹Juchasapaqa ganakunanrayku, mana qolqeyoj kajtimpis, mañallan. Chaywanqa pleitosman yaykun.

²⁰Runa masiykita yanapallay atisqaykiman jina. Chaywampis, qhawallay. Pajtataj qampis urmawaj. Kusisqa kaymanta

²¹Runaqa kausakunampajqa kanan tiyan yaku, t'anta, p'acha ima. Chantataj, wasimpis kanan tiyan.

²²Aswan walej runapaj kikin wasimpi tiyakuy mana mikhunayoj, ajeno wasipi ashkha mikhunayoj tiyakuymantaqa.

²³Qhapajpis wajchapis kaspa, kusisqalla kausaykuy, amataj qhasi oqo nichikuychu.

²⁴Wasimanta wasiman rinayki kajtin, chayqa llakiy. Simiykita ni kichariytapis atinkichu.

²⁵Ajeno wasipi mikhusqaykimanta nichikunki.

²⁶Chantapis, nisonqanku: Mesata churay. Mikhunata jaywaway, nispa.

²⁷Chantapis, nillasonqankutaj: Ripullayña. Hermanoy chayamun. Cuartoykita necesitani, nispa.

²⁸Cheqan sonqoyoj runaqa llakikun: Mana wasiykichu. Maytaj qolqeyki?, nejtinku.