Read Quechua Bolivia DC Bible ECLESIÁSTICO 30 Bible Online

ECLESIÁSTICO 30 - Quechua Bolivia DC Bible bible

ECLESIÁSTICO 30

¹Wawasta yachachinamanta Wawanta munakojqa chicoteta mana kacharinchu. Machu kaynimpitaj, chay wawanqa payta kusichenqa.

²Wawanta allinta yachachejqa, kusikuyniyojmin kanqa. Rejsisqasnin ukhupitaj uman oqharisqalla kanqa.

³Sumaj uywasqa wawaqa envidiachin enemigosta. Amigostataj kusichin.

⁴Tatan wañojtenqa, mana wañunchu ninchejman. Wawanqa pay kikin ari.

⁵Kausakushajtin tatanqa, rikuspa kusikun. Wañupojtintaj, mana llakikunchu.

⁶Wañupuytawanqa, wawanñataj sayarenqa enemigospa contranta. Amigostataj agradecekonqa.

⁷Pichus wawantaqa mana allintachu uywarqa, wawampa heridasninta jampinan tiyan. Sonqonta nanachikuspa chayta ruwanqa.

⁸Mana allin yachachisqa caballoqa chucaroman tukun. Mana allin uywasqa wawataj salvajeman tukun.

⁹Wawaykita mana k'aminkichu chayqa, llakichisonqa. Phujllachillanki chayqa, waqachisonqa.

¹⁰Paywan asirikunki chayqa, waqanki, rabiawantaj kharkatitinki.

¹¹Joven kaynimpi ama ruwachunchu munaynillantaqa. Mana allin ruwasqasninmanqa, ama ñawisniykita wisq'aychu.

¹²Joven kajtin, wasanta k'umuykuchiy. Wawallaraj kajtin, wasanta nanaykuchiy. Pajtataj oqharikunman mana kasukuyta munaspa, sonqoykita nanachisuspa.

¹³Wawaykita k'umuykuchiy, ama contraykita oqharikunampaj. Kusikuyniyoj kaymanta

¹⁴Aswan walej sanotaj kallpayojtaj wajcha runa, onqosqa qhapaj runamantaqa.

¹⁵Sanotaj kallpayojtaj kayqa, aswan sumaj tukuy qorimanta. Qolqeyojmantaqa aswan sumaj kallpayojmin.

¹⁶Qolqeyoj runamanta aswan qhapaj sano runaqa. Kusikuyniyoj kaymantaqa, mana ni ima aswan sumaj kanchu.

¹⁷Aswan walej kanman wañupuy, mana kusisqalla kausaymantaqa. Mana sanoyayta atiyman chayqa, wiñaypaj samarikullaymanña.

¹⁸Sichus mikhunata uj wisq'asqa simiman chayachiwaj, rijch'akuwaj lantisman rikuchikusta apaj runaman.

¹⁹Lanteqa manataj rikunchu, manataj muskhirinchu. Imapajtaj rikuchikusta jaywankuri?

²⁰Eunuco qhareqa sipasta abrazaykushan waqaspa. Ajinallataj chay lanteqa.

²¹Ama llakiywan atipachikuychu. Yuyasqaykiwan ama kikiykita llakichikuychu.

²²Kusisqa sonqoqa runata kausachin. Kusisqa kasqanrayku astawan kausanqa.

²³Ama munaychu wañupuyta. Sonqoykita thañiy. Llakiyta sonqoykimanta karunchay. Llakiyrayku ashkha runasqa chinkayman chayarqanku. Phiñakuynejta mana ni ima sumaj jamunchu.

²⁴Envidiakojtaj maqanakojtaj aswan usqhayta wañupun. Anchata llakikojqa aswan usqhayta machuyan.

²⁵Kusisqa kashanki chayqa, mikhullay.