Read Quechua Bolivia DC Bible ECLESIÁSTICO 31 Bible Online

ECLESIÁSTICO 31 - Quechua Bolivia DC Bible bible

ECLESIÁSTICO 31

¹Wajchamantawan qhapajmantawan Qhapajqa, anchatapuni llakikusqanrayku, usqhayta wañupun. Pichus llakikushan imatachá mikhusaj, nispa, mana puñuytapis atinchu.

²Sinch'i onqosqa jina, manapuni puñuyta atishanchu.

³Qhapajqa astawan qhapajchakuyta munashan. Mana ni imata ruwanan kajtin, kusirikullashan.

⁴Wajchaqa llakikun, mana mikhunampaj kasqanrayku. Mana llank'ayta atispaqa, mana ni imata mikhunchu.

⁵Qorita muskhejqa juchayojpuni. Qolqeta munakojqa chaynejta chinkayman chayanqa.

⁶Ashkha runasqa qoriwan watachikorqanku. Chay runasqa sonqonkuta chayman churanku.

⁷Uj kurkupi jina chaypi misk'anku qolqeman k'umuykukojkuna. Mana umayojkunaqa chaynejta urmanku.

⁸Kusikuyniyojmin qhapaj runa pichus mana sonqonta ch'ichichanchu qorej qhepampi thaskispa.

⁹Pitaj chayri? Abrazaykusun, imaraykuchus payqa sumaj kajta ruwarqa runa masisnin chaupipi.

¹⁰Payqa, qhapaj kajtimpis, mana juchachakorqachu. Chayrayku sutenqa pataman churasqa kanqa. Pantayta aterqa, manataj pantarqachu. Mana allin kajta ruwayta aterqa, manataj ruwarqachu.

¹¹Chayrayku kusisqapuni kanqa. Runa masisnintaj sutinta pataman oqharenqanku. Mikhuymanta

¹²Wawáy, mikhunaman wajyasojtinku, ama yarqhayniykiwan atipachikuychu. Ama niychu: Tukuy ima kasqaqa, nispa.

¹³Ama ñawiykita anchatapuni kichariychu. Chayqa mana allinchu. Ñaweqa imallatapis qhawayta munashan. Chantaqa, imallamantapis waqallashan.

¹⁴Ama makiykita chayachiychu maymanchus runa masiyki qhawashan, chayman. Kikin chuwallapi makisniykichej tinkukunkumanchá.

¹⁵Runa masiykita munakuy qan kikiykita jina. Imatachus mana munankichu qampaj, ama wajpaj ruwapuychu.

¹⁶Wajpa wasimpi allinta kakuy. Ama mayllamampis makiykita sat'iychu. Qhawachikuwajtaj.

¹⁷Wajkuna tukojtinkuña, ama qhepakuychu mikhuspallapuneqa. Amataj oqoychu. Qhawachikuwaj.

¹⁸Ashkhapis kajtinku qanwan khuska, ama ñaupajta qallariychu.

¹⁹Sumaj uywasqa runa pisillata mikhun. Puñunampi mana aysaqeyashanchu.

²⁰Anchata mikhojqa wijsanta q'ewichikun. Mana puñuytapis atinchu. Manataj samayta atishanchu. Uyampis q'elluyan. Pisillata mikhojqa sumajta puñukun. Sayarispa, umanqa mana llasachu.

²¹Anchatapuni mikhorqanki chayqa, sayariy. Chantaqa, ajtuy. Chayqa kosa.

²²Uyariway, wawáy. Kasullaway. Chaymanta entiendellanki imatachus nisusqayta. Tukuy imapi maychus kajta ruway. Tukuy imapitaj allin risonqa.

²³Pitachus runasta wajyarillan, tukuy alabanku. Paymanta unayta yuyarikonqanku.

²⁴Mich'amantaqa unayta millayta parlanku. Paymantapis yuyarikonqanku.

²⁵Vinota ujyachaspaqa ama wapuyaychu. Ashkha runas vinonejta urmarqanku.

²⁶Hornopi yachakun ima layamantachus fierro. Vinopi yachakun ima layamantachus wapu runaj sonqon.

²⁷Vinoqa runaj kausaynin, pisillata ujyan chayqa. Kausay imataj kanmanri, mana vino kajtenqa? Vinoqa ruwasqa karqa runata kusichinampaj.

²⁸Vinoqa sonqota mayta kusirichin. Chaymin vinoqa sichus runas maychus kajllata pisillatataj ujyanku chayqa.

²⁹Runasqa anchatapuni vinota ujyajtinkutaj, umasninkuta nanachikunku. Chantaqa, llakiyniyoj p'enqayniyojtaj rikhurinku.

³⁰Mana umayojqa machaykun urmanankama. Runaqa mana kallpayoj rikhurin. Chaymantataj, vinonejta runas maqanakunku.

³¹Ama rimaychu vinota ujyashajtaqa. Kusisqa kashajtin, amaraj k'amiychu. Ama millay palabrasta niychu, amataj trataychu runaspa ñaupaqenkupi.