Read Quechua Bolivia DC Bible ECLESIÁSTICO 33 Bible Online

ECLESIÁSTICO 33 - Quechua Bolivia DC Bible bible

ECLESIÁSTICO 33

¹Señorta munakojqa mana sajra kajwan atipachikonqachu. Diosqa, pruebaman churajtimpis, llakiymanta kacharichenqa.

²Diospa leyninta chejnikojqa mana yachayniyojchu kanqa. Imaynachus barco sinch'ita paramojtin p'ultiyta munashanña, ajinallataj paypis.

³Yachayniyojqa Diospa nisqanta entiendellan. Paypajqa Diospuni leynejta yachachishan.

⁴Parlanaykipajqa, ñaupajtaraj unanchakuy. Chayta ruwanki chayqa, uyarichikullanki.

⁵Sonsoj umanqa carreta ruedaman rijch'akun. Yuyaynin muyurishan.

⁶Pillapis lloq'ajtin, q'oñisqa caballoqa qhaparin. Ajinallataj, asipayaj amigopis. Diospa munaynin

⁷Imajtin uj p'unchay waj p'unchaykunaman mana rijch'akunchuri, kikin inti k'anchashajtimpis?

⁸Diospuni yachaynimpi munarqa mana kikinchu kananta sapa p'unchay. Paymin churarqa watasta killastapis.

⁹Payqa wakin p'unchaykunata ajllakorqa santoyachispa, waj p'unchaykunatataj mana.

¹⁰Tukuy runasqa t'urumantamin. Adanqa llink'imanta ruwasqa karqa.

¹¹Diosqa yachaynimpi munarqa mana kikinchu kananta sapa runaj ñannin.

¹²Wakin runasta bendicispa pataman churaykorqa. Wakintataj ajllakorqa payman qayllanankupaj. Wakinta maldicerqa, pampaman k'umuykuchispataj tiyanasninkumanta urmaykucherqa.

¹³K'anallasta ruwajta imallatapis ruwan llink'iwan munasqanman jina. Ajinallataj runapis Diospa makisnimpi. Sapa ujta sayachin maypichus munashan chaypi.

¹⁴Kaypi kashan imachus mana allin. Chaypitaj imachus allin. Kaypi kashan kausay. Chaypitaj wañuy. Kaypi cheqan sonqoyoj runa. Chaypitaj sajra sonqoyoj. Kaypi k'anchay. Chaypitaj laqha.

¹⁵Qhaway allinta imatachus Diosninchej ruwarqa. Iskay iskaylla kashan. Ujtaj kaypi. Ujtaj jaqaypi.

¹⁶Noqaqa, tukuykunaj qhepankupi kay yachakuyman qokuni, imaynachus palliri chajmakuspa tipejkunaj qhepankupi puririn, ajinata.

¹⁷Diospa yanapayninwan purerqani. Ajinamanta, noqapis pallakorqani.

¹⁸Mana noqallapajchu chayta ruwarqani, manachayqa, yanapayta munaspa yachayniyoj kayta munajkunata.

¹⁹Chayrayku, kamachejkuna, uyariwaychej. Kurajkuna, ningrisniykichejta kichariychej. Kamachismanta

²⁰Kausayniykipi, ama kamachikuychu nitaj wawaykiwan, nitaj warmiykiwan, nitaj amigoykiwan.

²¹Kausashajtiykiraj, ama ni pillawampis saruchikuychu. Kapuyniykitaqa ama ni piman qoychu. Qonki chayqa, llakikuwajtaj. Ichapis wajkunamanta manukunayki kanqa.

²²Wawasniykeqa qanmanta mañakuchunku. Ama qanqa paykunamanta mañakuychu.

²³Imallatapis ruwajtiyki, qampuni kamachiy. Sutiykitaj ama ch'ichichasqachu kachun.

²⁴Pisi watasniyki tukukapushajtinña, wañupunayki hora chayajtintaj, tukuy kapuyniykita wajkunaman saqey.

²⁵Burroykipaj wakichinayki tiyan qhoratawan, k'aspitawan, q'epitawan. Kamachiykipajrí, t'antatawan, jasut'itawan, llank'anatawan.

²⁶Kamachiykita llank'achiy ama samarinampaj. Pajtataj umanta oqhariytawan, contraykipi sayarinman.

²⁷Yugowan riendawan ima k'umuykuchinchej animalta. Qhella kamachitarí, jasut'ispa.

²⁸Kamachiyki llank'achumpuni, ama qhella kanampaj. Qhellakuymantaqa tukuy ima sajra kay jamun.

²⁹Kamachiykita llank'achiy maychus kajta. Mana kasukuyta munajtintaj chakisninta cadenaswan wataykuy.

³⁰Jinapis, ama anchatapuni jasut'iychu. Amataj ruwaychu mana cheqan kajtaqa.

³¹Ujllachus kamachiyki, chay kamachiykitaqa qan kikiykita jina munakuy. Jump'iyniykiwan payta rantikorqankeqa.

³²Ujllachus kamachiyki, kikin wauqeykita jina munakuy. Payta necesitanki ari qan kikiykita jina.

³³Nanaykuchinki chayqa, ayqekaponqa. Qanrí, maymantaj rinki payta mask'aj?