Read Quechua Bolivia DC Bible ECLESIÁSTICO 34 Bible Online

ECLESIÁSTICO 34 - Quechua Bolivia DC Bible bible

ECLESIÁSTICO 34

¹Mosqoymanta Mana umayojkunaqa qhasillata suyanku. Sonsosqa mosqospalla mayllamampis rinku.

²Mosqoypi creejqa llanthullata jap'iyta munashan, wayratapis qhatishan.

³Mosqoypi rikusqanchejqa uj rijch'aylla. Imaynachus uyanchejta espejopi rikunchej, ajinalla.

⁴Ch'ichimantaqa mana ni ima llimphu kaj jamunmanchu. Ajinallataj, llullakuymanta mana ni ima cheqan kaj jamunmanchu.

⁵Layqaspi creeyqa, mosqoypi creeytaj qhasilla. Chayta creejqa rijch'akun wachakoj warmiman, pichus llakiynimpi imallatapis yuyashan.

⁶Mana patapi kaj Diosmanta jamojtenqa, amapuni chaykunata creeychu.

⁷Ashkha runasqa mosqoykunawan pantachikorqanku. Chayta creesqankurayku, wajchasman tukorqanku.

⁸Diospa leyninta junt'ana, mana ch'aukiyaspalla. Cheqan sonqoyoj runaqa, cheqan yachayta yachachin. Puriymanta

⁹Anchata puriykachajqa anchallatataj yachan. Ashkhata yachajqa sumajta yuyan.

¹⁰Mana llakiyta rejsejqa pisillata yachan. Phutiyta yachajqa umayojman tukun.

¹¹Puriykachakusqasniypi ashkhata rikorqani. Willakusqaymantaqa astawan yachani.

¹²Ashkha kutis wañuy patapi rikukorqani. Yachayniyrayku kausashaniraj. Señorpi suyakunamanta

¹³Señorta respetakojkuna kausanqanku. Paykunata salvayta atejpi suyakunku.

¹⁴Señorta respetakojqa mana ni imamanta manchachikunchu. Mana q'ewakunchu Señorpi suyakusqanrayku.

¹⁵Kusikuyniyojmin Señorta respetakojqa. Yachan payqa pimanchus sonqonta jaywan. Yachallantaj pichus payta yanapaykun.

¹⁶Señorqa qhawaykun payta munakojkunata. Paymin paykunataqa sinch'i kallpanwan sajra kajmanta jark'an, yanapantaj. Payqa q'osñi wayramanta jark'an. Ruphamojtintaj chaupi p'unchaypi llanthuta qon. Runata yanapan ama misk'anampaj. Urmajtintaj yanapaykun.

¹⁷Payqa runata sonqoyachin. Ñawisnimpajtaj k'anchayta qon. Payqa runata sanoyachin, kausachin, bendicintaj. Diosta allinta yupaychanamanta

¹⁸Runasqa Diosman jaywanku chayqa suwakapusqankumanta, chay jaywasqankoqa mana llimphuchu. Payqa mana jap'ikunchu sajra runaj jaywasqanta.

¹⁹Patapi kaj Diosqa mana jap'ikunchu mana creejkunaj rikuchikusninkuta. Ashkha rikuchikusta jaywajtinkupis, payqa juchasninkuta mana pampachanchu.

²⁰Uj runa wañuchishan uj wawata tatampa ñaupaqempi. Ajinallataj, pichus wajchaspa kapuyninkuta Diosman jaywan chayqa.

²¹Wajchaqa pisi t'antanwan kausan. Chay t'antanta qechojqa runa wañuchi.

²²Runa masinmanta mikhunanta qechojqa, runa wañuchi jina. Llank'ajman mana pagonta qojpis, runa wañuchi jinallataj.

²³Uj runaqa wasita ruwan. Ujtaj t'unarparichin. Chaywanqa, llakiylla paykunawan qhepakapun.

²⁴Uj runaqa bendiciykun. Ujtaj maldiciykun. Mayqenta Señor uyarenqari?

²⁵Ayata llankhajqa, llankhaytawanqa makisninta mayllakun. Ujtawan llankhanman chayqa, imapajtaj mayllakorqari?

²⁶Jinallataj pichus juchasninrayku pisillata mikhun. Chantaqa, ujtawan juchallikullantaj. Pitaj mañakusqanta uyarenqari? Imapajtaj k'umuykukorqari?