Read Quechua Bolivia DC Bible ECLESIÁSTICO 35 Bible Online

ECLESIÁSTICO 35 - Quechua Bolivia DC Bible bible

ECLESIÁSTICO 35

¹Diosman ashkha rikuchikusta jaywanki. Kikillantaj kanman sichus Diospa kamachisqasninta junt'awaj. Diosman rikuchikusta jaywanki perdonachikunaykipaj. Kikillantaj kanman sichus nisusqanta ruwawaj.

²Diosman ñut'u jak'uta jaywashanki. Kikillantaj kanman, sichus yanapasojta yanapawaj.

³Diosqa munan sajra kajmanta karunchakunaykita. Cheqan kajllata ruwanki chayqa, Diosqa juchasniykita pampachapusonqa.

⁴Ama Señorman qayllaychu ch'usaj makiyoj. Tukuy chaytaqa ruwanaykipuni tiyan Diosninchej kamachisqanrayku.

⁵Cheqan sonqoyoj runajpata jaywasqanwan, altarqa santoyachisqa qhepakapun. Q'apaynintaj patapi kaj Diosman chayan.

⁶Señorqa jap'ikun cheqan sonqoyojpa jaywasqanta, manataj chaymanta qonqaponqañachu.

⁷Tukuy sonqoykiwan Señorta munakuy. Mishkha poqoyniykita jaywanayki kajtin, ama mich'akuychu.

⁸Imallatapis qonayki kajtin, kusisqa uya qayllay. Kapususqanmanta sapa chunkamanta ujta qonayki kajtin, kusikuywan qollay.

⁹Patapi kaj Diosman qoy, imaynatachus pay qosorqa, ajinata. Tukuy sonqo qollay, atisqaykiman jina.

¹⁰Diosqa mana mich'akunchu. Sapa ujmantataj qanchista qopusonqa.

¹¹Ama niychu: Regalosta qosaj munasqayman jina ruwanampaj, nispa. Payqa chayta manapuni jap'ikunchu. Suwakapusqaykimanta qorqanki chayqa, chay qosqayki qhasilla.

¹²Diosqa cheqampuni. Tukuy runastaqa uj ñawillawan qhawan.

¹³Payqa mana ni pita yanapanchu wajcha runasta llakichispa. Payqa llakisqa runaj qhaparikusqanta uyarin.

¹⁴Payqa wajcha wawaj waqarikusqanta uyarin. Uyarintaj warmi sapaj waqayninta.

¹⁵Warmi sapa waqashan. Waqaynin uyanta joq'ochashan. Qhaparikushantaj waqachisqankumanta yuyarikuspa.

¹⁶Diospa kamachenqa uyarichikonqapuni. Qhaparikusqan cielokama chayan.

¹⁷Wajcha runaj qhapariynin phuyustapis wasarin cielokama. Mana sayk'unchu Diosman chayanankama.

¹⁸Mana sayk'unchu Dioswan uyarichikunankama. Paytaj, allinta cheqanyachej kasqanrayku, maychus kajta qopun.

¹⁹Diostaj mana suyachikunchu. Sumaj maqanakoj jina, mana qhepakunchu.

²⁰Payqa t'unarparichenqa rumi sonqoyoj runata. Payqa, paymanta karunchakojkunata llakichenqa.

²¹Payqa, wapu waputa mana kallpayojman tukuchenqa. Sajra runatapis mana atiyniyojman tukuchenqa.

²²Sapa ujmantaj qonqa kausakusqanman jina. Sapa runa qochikonqa yuyasqanman jina.

²³Diosqa ayllunta allinta cheqanyachenqa. Khuyakuyninwantaj kusirichenqa.

²⁴Imaynachus ch'aki tiempopi paraqa ujta rikhurimullan, ajinallataj llakiypi Diospa khuyakuynin rikhurimullantaj.