Read Quechua Bolivia DC Bible ECLESIÁSTICO 36 Bible Online

ECLESIÁSTICO 36 - Quechua Bolivia DC Bible bible

ECLESIÁSTICO 36

¹Diosmanta mañakuy Israelpaj Tukuy mundoj Diosnin, khuyakuwayku. Tukuy runas qanmanta manchachikuchunku.

²Makiykita oqhariy karu runaspa patankuman, yachanankupaj qanqa kallpayoj kasqaykita.

³Qan llakichiwarqayku, paykuna yachanankupaj santo kasqaykita. Paykunatapis llakichiy. Ajinamanta, ñaupaqeykupi rikuchinki jatun kayniykita.

⁴Ajinamanta, paykunaqa yachanqanku qan sapallayki Dios kasqaykita, imaynachus noqayku yachayku, ajinata.

⁵Watejmanta ruwapuwayku milagrosta, t'ukuna imastapis. Rikuchiy jatun kayniykita atiyniykitawan.

⁶Phiñakuyniyki rikhurimuchun. Contrasniykupaj phiñakuy. Paykunata k'umuykuchiy, ch'eqerachiytaj.

⁷Imatachus ruwanayki tiyan, ruwallayña. Ni pi cuentata mañasonqachu ruwasqaykimanta.

⁸Chay runaspa kamachejnin nishan: Mana ni pi noqa jinachu, nispa. Payta t'unarparichiy.

⁹Tukuy Jacob ayllusta tantaykuy, llajtankupi tiyakunankupaj ñaupa tiempospi jina.

¹⁰Khuyakuy ari sutiykita apaj ayllumanta, Israelmanta, pitachus ajllakorqanki kuraj aylluykipaj.

¹¹Khuyakuy ajllasqa llajtaykimanta, Jerusalenmanta, maypichus tiyakunki chaymanta.

¹²Jatun kayniykiwan junt'aykuy Sionta. Kusikuyniykiwantaj junt'aykuy temploykita.

¹³Junt'ay imatachus ruwanaykita nerqanki ñaupa wawasniykiman. Junt'aytaj imatachus profetas sutiykipi willarqanku chayta.

¹⁴T'inkata qoy qampi suyajkunaman. Rikuchiy profetas cheqan kajta parlasqankuta.

¹⁵Kamachisniyki mañakusqankuta uyariy, aylluykita munakusqaykiman jina.

¹⁶Mayllapipis yachakuchun qan Señor kasqaykita, wiñay Dios. Ajllana imatachus aswan sumaj

¹⁷Ima mikhunallapis tonqorinejta yaykullan. Jinapis, wakin mikhunaqa wajkunamanta aswan sumaj.

¹⁸Simi yachallan ima layachus mikhuna. Ajinamanta, sonqoqa yachallan imachus llulla.

¹⁹Sajra sonqoqa runasta llakichin. Runa, kallpayoj kajtenqa, sinch'ita sayallan.

²⁰Mayqen qharillawampis warmi casarakunman. Qharipajqa, wakin warmis aswan sumachej kanku wakinkunamanta.

²¹K'acha warmita rikojqa anchata kusikun. Mana ni ima kanchu aswan sumaj.

²²Sichus warmeqa k'acha sonqoyoj misk'i simiyojtaj kanman chayqa, qosanqa tukuy qharismanta aswan kusikuyniyoj.

²³Warmiyoj runaqa qallarishanña qhapaj kayta. Warmenqa yanapanqataj sayarichenqataj.

²⁴Mana perqachasqa chajramanqa pillapis yaykun suwakoj. Mana warmiyoj runaqa puriykachallan kayman jaqayman, mana yachaspa maymanchus rishasqanta.

²⁵Pitaj confianzanta churanman saltea runaman, llajtamanta llajta purejman?

²⁶Jinallataj, mana thapayoj runa, pichus tutayajtin mayllapipis puñukullan.