Read Quechua Bolivia DC Bible ECLESIÁSTICO 37 Bible Online

ECLESIÁSTICO 37 - Quechua Bolivia DC Bible bible

ECLESIÁSTICO 37

¹Amigosmanta Tukuy amigosqa nej kanku: Amigoyki kani, nispa. Jinapis, wakinkunaqa amigos kanku simillawan.

²Sinch'i llakiy runapajqa maypachachus kausaqen chejnikojman tukuy.

³Sajra yuyay, imapajtaj kankiri? Kay pachata llullakusqasniykiwan junt'achinaykipajchu?

⁴Simillamanta amigoqa mikhunaykita qhawan. Llakiyniyoj kajtiykitaj karullapi sayan.

⁵Cheqamanta amigoqa chejnikusojwan maqanakun. Pillapis jamusunkiman nanaykuchej, payqa jark'aykun.

⁶Qhapaj kajtiyki, ama qonqapuychu amigoykimanta. Ama saqerpayaychu.

⁷Consejota qojkunaqa ñanta rikuchinku. Jinapis, paykunallapi piensanku.

⁸Sonqoykita karunchay consejota qojmanta. Ñaupajtaraj yachaykuy imatachus mask'asqanta. Ichapis payllapi piensashan, munashantaj qolqechakuyta.

⁹Chaypacha nisunku: Allinta purishanki, nispa. Chantaqa, ririkapun qhawaj imaynamantachus chinkayman purishanki.

¹⁰Chejnikusojkunamanta ama consejota mañakuychu. Amataj pakasqa yuyayniykita envidiakojkunaman willakuychu.

¹¹Iskay warmis uj qharillata munakushajtinku, ama uj warmita tapuychu chay waj warmimanta. Q'ewakoj qharimanta ama consejota mañakuychu maqanakuymanta. Amataj qhaterosmanta consejota mañakuychu vendenamantachus rantinamantachus. Envidiakojkunataqa ama tapuychu imachus agradecekuy. Sajra runataqa ama tapuychu imachus k'acha sonqo kay. Qhellamantaqa ama consejota mañakuychu llank'anamanta. Jark'asirita ama tapuychu tipiymanta.

¹²Diosta respetakojmanta consejota mañakuy. Yachallayraj sichus Diospa kamachisqasninta junt'anchus manachus. Tapukuyraj sonqon sonqoyki jinachu manachu. Sonqon sonqoyki jina kajtenqa llakipayaysisonqa.

¹³Uyariytaj imatachus kikin sonqoyki nisunki chayta. Confiakunaykipajqa mana ni pi kanchu aswan sumaj sonqoykimanta nisqaqa.

¹⁴Runaj sonqonqa runata willakun qanchis jark'asirismanta aswan sumajta.

¹⁵Chantaqa, Diosmanta mañakuy cheqan ñanninta pusasunantapuni. Imataj cheqamanta yachay

¹⁶Imallatapis ruwanayki kajtin, ñaupajta unanchakullayraj.

¹⁷Runaj ruwananqa munayninmanta jamun. Runaj munayninmantataj, kaykuna llojsimunku tawa maki jina:

¹⁸Sumajwan sajrawan. Kausaywan wañuywan. Tawantinkutaj simipi kashan.

¹⁹Wakinkuna wajkunallapaj yachayniyoj kanku. Kikin paykunapajtaj mana umayojchu kanku.

²⁰Tiyan yachayniyojkuna pikunachus chejnichikunku nisqasninkurayku. Chaykunataqa mana ni pi wajyanchu mikhunasman.

²¹Tiyan pikunachus kikin paykunapaj yachayniyoj kanku. Yachakusqankoqa paykunallapaj.

²²Tiyan pikunachus kikin paykunapaj yachayniyoj kanku. Yachakusqankoqa wajkunallapajtaj.

²³Pichus pay kikimpaj yachayniyoj, kusisqa kausakonqa. Tukuy payta rikojkunaqa kusirikunku.

²⁴Pichus runaspaj yachayniyoj, may respetasqa kanqa. Sutin wiñaypaj rejsisqa kanqa. Runaqa pisillata kausan. Israeltaj wiñaypaj kausan. Mikhunamanta

²⁵Wawáy, unanchakuy imachus allin qampaj. Mana allin kajmantaqa karunchakuy.

²⁶Imallapis mana allinchu tukuy runaspaj. Ima mikhunallapis mana allinchu tukuypaj.

²⁷Ama phawaychu oqoj. Amataj anchatapuni mikhuychu.

²⁸Wakinkuna onqonku anchata mikhusqankumanta.

²⁹Wakinkunataj wañunkupis. Pichus maychus kajta mikhun unayta kausan.