Read Quechua Bolivia DC Bible ECLESIÁSTICO 38 Bible Online

ECLESIÁSTICO 38 - Quechua Bolivia DC Bible bible

ECLESIÁSTICO 38

¹Onqoymantawan wañuymantawan Medicota respetowan qhaway. Paywan jampichikunayki tiyan. Chantaqa, paypis Diosmanta jamun.

²Medicoqa Diosmanta jap'ikun yachakusqanta. Kamachejmantataj pagonta jap'ikun.

³Yachakusqanrayku medicoqa respetachikun. Chayrayku, uman oqharisqa rikhurimun kurajkunaj ñaupaqenkupi.

⁴Diosqa p'utuchimun jallp'amanta jampina qhorasta. Umayoj runaqa chaykunata mana q'opa jinallatachu qhawan.

⁵Diosqa uj k'ulluwan misk'iyacherqa yakuta, k'ulloj atiyninta rikuchinanrayku.

⁶Diosqa runasta umayojta ruwarqa, payta yupaychanankupaj jatuchaj ruwasqasninmanta.

⁷Chaykunawan medicoqa nanayta thañichin, boticariotaj jampista wakichin.

⁸Ajinamanta, Diospa ruwasqasnin mana chinkanchu. Runastaj sanos kayta atinku.

⁹Wawáy, onqosqa kajtiyki pacienciakullay. Diosmanta mañakuy, paytaj sanoyachisonqa.

¹⁰Sajra kaymanta ayqey. Jinallataj, mana cheqan kajmantapis. Chantaqa, sonqoykipi tukuy juchasta chinkachiy.

¹¹Diosman jayway sumachej rikuchikusta. Tukuy sonqo qollay atisqaykiman jina.

¹²Jinapis, medicotapis wajyallay. Ama qhesachaychu. Paytapis necesitallanki ari.

¹³Ashkha kutis paylla sanoyachisonqa.

¹⁴Paypis Diosmanta mañakun niyta atinampaj imamantachus runa onqosqa kashan, atinampajtaj allinta jampiyta.

¹⁵Chayrayku runaqa Diospa contrampi juchallikun mana munajtin doctorwan rikuchikuyta.

¹⁶Wawáy, pipis wañojtin, paypaj Diosmanta mañakuy. Llakisqa kasqaykita rikuchiy. Ruwaytaj imachus p'ampakupi ruwakun chayta. P'ampaykuytaj costumbreman jina. Chantaqa, runas tantakojtinku waqay, ama ripuychu.

¹⁷Wawáy, waqaspa lutokuspataj p'ampaykuy maychus kajman jina. Uj diata iskay diatachus waqallay. Chaymantataj sonqochakuy.

¹⁸Llakeyqa wañuyman apan. Phuteyqa runata llauch'iyachin.

¹⁹Ama wañojpi piensayñachu. Jamoj p'unchaykunapi yuyay.

²⁰Ama wañojpi piensayñachu. Payqa mana ni imata suyananchu tiyan. Yuyakusqayki payta mana yanapanchu, qantataj dañosunki.

²¹Qampis pay jina wañunki. Qayna pay wañorqa, q'ayaqa qanñataj.

²²Wañusqa samarishanña. Ajinallataj, paymanta yuyakusqanchej samarillachuntaj. Qantaj sonqochakuy. Payqa wañusqaña. Llank'aymantawan yachaytawan

²³Letrasniyojpa yachaynin ashkhayan maypachachus tiempoyoj. Pichus pisi llank'ayniyoj, yachayniyojman tukonqa.

²⁴Pichus llank'allashampuni mana yachayniyoj kanmanchu. Payqa wakata thaskichin. Uywasllawan kashan. Chayllawan pay kusikun.

²⁵Payqa usqhayta rijch'arin corralta pichananrayku. Payqa tarpuyllata yuyashan.

²⁶Ajinallataj, ima laya llank'ajkunapis artesanojpis. Chaykuna tuta p'unchay llank'ashallankupuni. Sellosta ruwashaspa mosoj dibujosta mask'ashankupuni. Rikusqantaqa sumajtapuni ruwayta munashan. Trabajontaqa usqhayta tukuyta munashan.

²⁷Ajinallataj herreropis pichus diantinta tiyashan yunque ladopi. Umanqa fierrollapi churasqa kashan. Q'aran ch'akisqaña q'osñirayku ninaraykutaj. Ruphaytaj jump'ichishan. Ningrisnin uyarishampuni martillo takasqanta. Ñawisnin qhawashan imatachus ruwanan tiyan. Paypis tukuyta munashampuni. Afanwan ruwashan tukunanrayku.

²⁸Ajinallataj pichus llink'imanta k'anallasta ruwan. Payqa chakisninwan tornota muyurichishan. Umanqa chayllapi churasqa kashan. Chay diallataj tukuyta munashan yurusta.

²⁹Payqa llamp'uchan t'uruta makisninwan, saruntaj chakisninwan. Payqa barnizaykun k'anallasta. Tukuytawantaj hornota pichaykun.

³⁰Tukuy chaykunaqa makisninkuwan trabajanku. Sapa ujtaj sumajta oficionta yachan.

³¹Artesanos mana kajtenqa, runasqa mana atinkumanchu kausayta. Nitaj ni pipis waj lugarman kachaykukuyta atinmanchu.

³²Jina kajtimpis, mana wajyasqaschu kanqanku kamachejkuna kanankupaj. Nitaj ni imata niyta atenqankuchu runa tantakuypi. Nitaj jueces jina sayanqankuchu, mana cheqanyachiyta yachasqankurayku.

³³Paykunaqa mana yachayniyojchu kanku. Manapuni cheqanyachiyta atinkumanchu. Nitaj yachay palabrasta parlankuchu. Chaykuna runa masisninkuta yanapanku makisninkuwan trabajaspa.