Read Quechua Bolivia DC Bible ECLESIÁSTICO 39 Bible Online

ECLESIÁSTICO 39 - Quechua Bolivia DC Bible bible

ECLESIÁSTICO 39

¹Mana jinachu pichus tukuy sonqo yachakun Diospa leyninta. Payqa yachan imatachus ñaupa runas yacharqanku chayta. Profetaspa nisqasninkutapis yachallan.

²Payqa estudian imatachus nerqanku ñaupa yachayniyoj runas. Yachaytataj munan aswan difícil yuyaykunatapis.

³Payqa yachayta munan tukuy palabraspa ukhunta. Aswan difícil tapukunasmampis kutichikuyta munan.

⁴Jatuchaj runasta yanapan payqa. Purikuntaj kurajkunawan khuska. Payqa karu llajtasman kachaykukun. Yachantaj imachus allintapis mana allintapis.

⁵Tutamantapacha mask'an patapi kaj Señorta, payta ruwarqa chayta. Diosman qayllaspa perdonta mañakun juchasninmanta.

⁶Tukuy Atiyniyoj Señor munajtin, yachayniyoj rikhurenqa. Yachayniyoj palabrasqa para jina siminmanta urmamonqa. Mañakusqampitaj Señorqa yupaychanqa.

⁷Sumaj yuyayniyoj consejosta qonqa. Yachaytataj munanqa Diospa nisqasninta.

⁸Wajkunata k'anchaykonqa yachakusqanwan. Sonqon junt'asqa kanqa Diospa leyninwan, Señorwan trato ruwasqanwan.

⁹Ashkha runas yachasqanta yuyarikonqankupuni. Sutin wiñaypaj rejsisqa kanqa.

¹⁰Runasqa paypa yachayninmanta parlanqanku. Ayllumpi payta alabaspa takenqanku.

¹¹Kausaynimpi waranqa runamantaqa aswan rejsisqa kanqa. Wañupuytawanqa, sutenqa rejsisqallapuni kanqa. Diosta yupaychana

¹²Astawanraj tiyan umaypi ninaypaj. Chaywanqa, purapi killa jina junt'asqa kashani.

¹³Uyariwaychej, Diosman k'umuykoj wawasniy. Imaynachus rosa t'ikarin larq'a cantopi, ajinallataj qankunapis.

¹⁴Incienso jina q'apankichej. Lirio jinataj t'ikarinkichej. Qhapariychej ujllapi takinaykichejpaj. Señorta yupaychaychej tukuy ruwasqanmanta.

¹⁵Sutinta jatunman churaychej. Graciasta qoychej alabayachejtaj, takispa, arpasta waqachispa. Niychejtaj kay jinata:

¹⁶Diospa ruwasqan sumajpuni. Payqa tiempompi runaman qon imatachus necesitasqanta.

¹⁷Siminta kicharejtin yakusqa tantakamorqa. Parlajtintaj, qocha kicharikun.

¹⁸Munasqanqa chaypacha ruwakun. Runata salvayta munajtenqa, salvayta atillan.

¹⁹Payqa rikullan runas ruwasqankuta. Ñawisnimpaj mana ni ima pakasqachu.

²⁰Wiñaymantapacha payqa tukuy imata qhawashampuni. Atiynenqa, runata salvanampaj mana tukukunchu. Paypajqa mana ni ima juch'uychu, nitaj ancha jatunchu, nitaj mana atikojqa.

²¹Ama tapuychu: Imapajtaj kay? Imapajtaj jaqay?, nispa. Tukuy ima imallapajpis sirvin.

²²Diospa khuyakuynin Nilo mayu jina wasaykamun, jallp'atataj qarpan Eufrates mayu jina.

²³Jinallataj, phiñakojtin, runasta jallp'asninkumanta qharqon. Chantapis, milluyachintaj sumaj qarpasqa jallp'ata.

²⁴Sumaj sonqoyoj runasman allin ñanta rikuchin. Sajra runasmantaj misk'ana ñanta rikuchin.

²⁵Qallariymantapacha k'acha runaspaj sumaj kajta wakichiporqa. Sajra runasmantaj sumaj kajta mana allin sumaj kajtataj qorqa, chajrusqata.

²⁶Runa kausanampaj kaykuna kanampuni tiyan: Yaku, nina, fierro, kachi, jak'u, leche, lachiwana misk'i, vino, aceite, p'achataj.

²⁷Tukuy chaykunaqa sumajmin k'acha sonqoyojkunapaj. Chaykunataj sajra sonqoyojkunapajqa mana allinman tukun.

²⁸Wakin wayrasta Diosqa ruwarqa runasta llakichinampaj. Chay wayrasqa phiñakuyninkupi orqosta sikinkumanta sik'imunku. Llakichiy tiempo chayamojtin, jatun phiñakuywan urmaykamunku.

²⁹Nina, chijchi, yarqhay, onqoy ima, ruwasqas karqanku runasta llakichinankupaj.

³⁰Phiña animalkuna, alacranes, kataris, sinch'i maqanakus ima, sajra runasta tukuchinku. Chaykunaqa ruwasqa karqa runa llakichisqa kanampaj. Chaytaqa Dios waqaychashan llakichiy tiempopaj.

³¹Dios chaykunata wajyajtin, kusisqas uyarikunku. Ch'inmantataj ruwallanku imatachus ruwananku tiyan chayta.

³²Kaytaqa noqa yachakorqani allinta qallariymantapacha. Umaypi jap'ispataj escribini.

³³Diospa ruwasqan sumajpuni. Payqa, tiempo kajtin runaman qollan imatachus pisichikusqanta.

³⁴Amapuni niychejchu: Kayqa jaqaymanta aswan sumaj, nispa. Tukuy imaqa tiempompi sumaj kanqa.

³⁵Chayrayku, takiychej ari tukuy sonqo, yupaychaychejtaj santo Diospa sutinta.