Read Quechua Bolivia DC Bible ECLESIÁSTICO 4 Bible Online

ECLESIÁSTICO 4 - Quechua Bolivia DC Bible bible

ECLESIÁSTICO 4

¹Wawáy, llakisqa runamantaqa ama asikuychu. Amataj qhesachaychu wajcha runataqa.

²Ama qhawakullaychu pisichikojtaqa. Llakisqa runata rikuspataj, ama pakakuychu.

³Ama ñak'arichiychu llakisqa sonqoyojta. Wajcha runatataj yanapallay.

⁴Ama wakhiyaychu wajcha runata.

⁵Chayta ruwawaj chayqa, pajtataj maldicisunman.

⁶Llakiypi rikukuspa may phutisqa, Señorman qhaparikonqa. Señortaj qhaparikusqanta uyarenqa.

⁷Runa masisniykiwan munachikuy. Kamachejkunatapis respetowan qhaway.

⁸Allinta uyariy wajcha runata. Napaykusojtintaj, tukuy sonqo napaykullaytaj.

⁹Sarusqa runata sarusqa kasqanmanta kacharichiy. Cheqanyachinayki kajtin, cheqanyachiy.

¹⁰Wajcha wawaspata tatanku jina kay. Mamasninkutapis yanapallaytaj. Ajinamanta, Diospa wawan kanki. Pay munakusonqa, ima llakiymantapis jark'asonqa. Yachayta mask'ay

¹¹Yachayta mask'ajkunaqa yachayniyoj rikhurinku. Yachayqa chaykunata pusan wawasninta jina.

¹²Yachayniyoj kayta munajkunaqa kausakuyta munallankutaj. Yachayta mask'ajkunaqa Dioswan munachikunku.

¹³Yachayniyojkuna kusikuyniyoj kanqanku. Señorqa paykunata mayllapipis bendiciykonqa.

¹⁴Yachayman k'umuykukojkuna Santo kajman k'umuykukunku. Señorqa munakun yachayta munakojkunata.

¹⁵Yachayta uyarikojqa, cheqanta unanchan tiyakuntaj paywan khuska.

¹⁶Yachayta uyarikojkuna yachayniyoj kanqanku. Wawasnimpis yachayniyoj kanqanku.

¹⁷Ñaupajtaraj yachayqa chay runaj qhepampi purenqa karullamanta. Chantaqa pruebaman churanqa. Chay runaqa manchachikonqa. Pruebaman churasqa kanqa yachaywan k'amichikuspa. Yachayqa chayta ruwallanqapuni chay runaj sonqon yachaywan junt'asqa kanankama.

¹⁸Yachayqa payman chimpaykonqa kusikuyta jaywanampaj, pakasqa kajtataj willaykunampaj.

¹⁹Jina kajtimpis, sichus payqa yachaymanta karunchakunman chayqa, yachayqa payta saqellanqataj urmajta. Amapuni llullakuychu, cheqan kajtataj ruway

²⁰Mayllapipis jayk'ajllapis maychus kajta ruway. Karunchakuytaj sajra kajmanta. Ajinamanta, mana p'enqaypichu rikhurinki.

²¹Tiyan uj laya p'enqay juchaman k'askasqa. Kallantaj waj laya p'enqay mayqenchus runata astawan respetachin.

²²Ama qan kikiykita dañota ruwakuychu. Pajtataj wajkunamanta manchachikuspa qan kikiykita dañota ruwakuwaj.

²³Nisqaykiwan runa masiykita yanapayta atiwaj chayqa, ama ch'in kakuychu. Amapuni pakaychu yachakusqaykita.

²⁴Yachayqa siminejta runaman chayan. Runaqa parlaspa runa masinta yachachin.

²⁵Ama cheqan kajpaj parlaychu. Yachanayki kajta mana yachanki chayqa, p'enqakuy.

²⁶Juchasniykita willakuymantaqa, ama p'enqakuychu. Ama wayt'aychu mayoj contranta.

²⁷Ama k'umuykukuychu mana umayojman. Atiyniyojkuna pantasqas kajtinku, ama ladonkupi churakuychu.

²⁸Cheqa kaj rejsisqa kanampaj, sayarillay wañupunaykikama. Chayta ruwanki chayqa, Señor Diosniyki yanapasonqa.

²⁹Parlaspa, ama imallatapis niychu mana unanchakuspalla. Imallatapis ruwanayki kajtin, ama q'ewakuychu nitaj qhellakuychu.

³⁰Ama león jina kaychu wasiykipi. Jinapis, ama atipachikuychu kamachisniykiwan.

³¹Imallatapis qosojtinku, ama makisniykita pojtuychu. Qonayki kajtintaj, ama makisniykita mat'iychu.