Read Quechua Bolivia DC Bible ECLESIÁSTICO 40 Bible Online

ECLESIÁSTICO 40 - Quechua Bolivia DC Bible bible

ECLESIÁSTICO 40

¹Runaj llakiynin Diosqa wakicherqa sinch'i llakiyta runaspaj. Runaqa llakiyniyoj mamampa wijsanmanta llojsisqanmantapacha, tukuy runaspa mamankoj sonqonman kutirimunankukama.

²Llakiywan unanchakun runaqa. Sonqon manchachikuywan junt'a kashan. Phutikuspataj wañupunanta suyan.

³Jatun tiyanapi tiyakojqa llakikun. Jallp'a chaupipi, ushpha chaupipi tiyakojpis llakikullantaj.

⁴Sumaj p'achallisqa pilluyoj runapis llakikullan. Jinallataj, qara p'achayoj kajpis. Tukuyninku llakikunku, envidianakunku, phutisqas purinku wañuymanta manchachikuspa. Phiñanakunkutaj maqanakunkutaj.

⁵Runaqa puñukunampaj sirikuspapis, llakisqallapuni.

⁶Tumpata samariyta munashan. Jinapis, mosqoynimpi ansaqeyashan. Puñusqamanta manchachikushan. Manchachikuspataj ayqeshan.

⁷Salvakushajtinña payta qhatejmanta, rijch'arimpacha. Chantaqa, sonqon samarin rikuspa mosqoylla kasqanta.

⁸Ajina kanku tukuypuni, runastaj uywastaj. Astawanraj, qanchis kutikama juchasapasqa.

⁹Juchasapaj patanman chayman onqoy. Runas wañuchinakunku, phiñanakunku, maqanakunku ima. Runasman chayamuntaj llakiy, yarqhay, wañuy ima.

¹⁰Chaynejta sajra runas chinkayman chayanku.

¹¹Imachus jallp'amanta jamun, jallp'aman kutipullantaj. Cielomantaj kutipun imachus cielomanta jamojpis.

¹²Runasqa mana lluk'enqankuñachu nitaj mana cheqan kajta ruwanqankuñachu. Cheqan kajta ruwayqa mana tukukonqachu.

¹³Wist'u sonqoyojpa imasnin wayq'o jina ririkaponqa. Imaynachus qhon qhon t'ojyan, ajina t'ojyanqa qhapaj runaj kapuynin.

¹⁴Runaqa jap'ikusqanwan kusikun. Jinapis, juchasapaqa chinkaymampuni chayanqa.

¹⁵Mana creejkunaj wawasnin rijch'akunku pisi ramasniyoj sach'aman. Mana allin sapheqa qaqas ukhullapi wiñan. Ajinallataj mana creej runapis.

¹⁶Runasqa ñaupajtaraj soqososta sik'inku, mayu cantopi kashanku chaykunata. Qhepantaraj qhorasta sik'imunku.

¹⁷K'acha sonqoyoj runaqa sinch'ita sayanqa. Cheqan sonqoyoj runa mana kuyurenqachu. Imachus tukuy imamanta aswan sumaj

¹⁸Mana qhellakoj llank'aj runa sumajta kausan. Jinapis, aswan kusisqa kanqa sichus qoritachus qolqetachus tarikunman chayqa.

¹⁹Wawasniyoj runaj sutenqa mana chinkanchu. Chantapis, llajtata sayarichej runaj sutimpis, mana chinkallantajchu. Jinapis, aswan sumaj kanman runapaj yachayniyoj kay.

²⁰Vinotaj takiytaj runaj sonqonta kusichin. Astawanraj kusikun yachayniyoj kayta munaj runa.

²¹Qenataj guitarrataj sumajta yanapanku takejman. Jinapis, aswan sumaj cheqanta parlaj simeqa.

²²Runaj ñawenqa k'acha kajta rikuyta munan. Jinapis, aswan k'acha q'omer pampa.

²³Runaqa, imallatapis ruwanan kajtin, amigonwan yanapachikun. Jinapis, paypajqa, warmimpuni aswan walej.

²⁴Runaqa, pisichikojtin, wauqenmanchus uj yanapajninmanchus k'askakun. Jinapis, paypajqa aswan walej kanman qolqeta qonankuta.

²⁵Qoripis qolqepis sinch'ita sayachinku runata. Jinapis, aswan sinch'itaraj sayachin amigompa allin parlaykusqan.

²⁶Runaqa atiyniyojtaj qhapajtaj kaspa, may kusisqa sonqoyojmin. Jinapis, aswan kusisqa kanman sichus Diosta respetakunman chayqa. Diosta respetakojqa mana ni imamanta pisichikunchu. Mana ni piwan yanapachikunmanñachu.

²⁷Diosta respetakojqa t'ikayoj chajraman rijch'akun. Mana ni pi aswan kusisqachu paymantaqa. Ama wajkunaman k'askakuychu kausanaykipaj

²⁸Wawáy, ama mañarikuychu qolqeta kausanaykipaj. Ajina kausaymantaqa, aswan walej kanman wañupuy.

²⁹Runa masinta mikhunanta qhawaj runa, imapaj kausashanri? Wajpa mikhunanmanta mikhojqa p'enqayniyoj rikhurin. Chayta ruwanan kajtin, umayoj runa sonqonta nanachikun.

³⁰Mana umayoj runaqa pillamantapis mañarikun. Jinapis, wijsampi nina jina k'ajarishan.