Read Quechua Bolivia DC Bible ECLESIÁSTICO 43 Bible Online

ECLESIÁSTICO 43 - Quechua Bolivia DC Bible bible

ECLESIÁSTICO 43

¹May k'acha llimphutaj janaj pachaqa! Ch'askasta rikuspaqa t'ukunchej.

²Inti lliphipin, ruphasqantaj tukuyman chayan. Señorpa ruwasqanqa sumajpuni.

³Chaupi p'unchayta inteqa kay pachata ruphan. Pitaj chay ruphaymanta ayqenmanri?

⁴Imaynachus ninaqa titita unuyachin, ajinallataj inteqa orqosta ruphachin. K'ajaj wausita rikhurichimun inteqa. K'anchaynintaj ñawista wisq'achin.

⁵May jatunmin intita ruwaj Señormin. Señor nisqanrayku inteqa puririn.

⁶Señorqa llojsichimullantaj killata, kamachisqanman jina. Killaqa tiemposta señalampuni.

⁷Paynejta yachanchej mayk'ajchus fiestas jamunku. Purikunan kasqanta tukuytawanqa, pisilla k'anchaynin.

⁸Sapa kinsa chunka p'unchaytaj, killaqa watejmanta rikhurimun. Chayrayku, kinsa chunka p'unchayqa, killallataj sutinchakun. Chay wañusqantaj, chay paqarimusqantaj t'ukunapajmin. Muyuynimpi runas jina sayanku ch'askasqa.

⁹Ch'askasqa k'achitullataj. Ch'askasniyoj cieloqa runaj sonqonta kusirichin. K'anchayninku patapi lliphipin.

¹⁰Diosninchej nisqanrayku chay patapi sayasqankupuni. Chaypipuni kashanku, mana sayk'uspalla.

¹¹K'uwichitapis rikuspa. chay k'uwichita ruwajta yupaychay. K'acha kaynenqa t'ukunapajmin.

¹²Uj puntamantapacha uj puntakama chayan k'uwicheqa lliphirispa. Diosqa chay jinata makinwan mast'aykun.

¹³Diosqa atiyninwan lliuj lliujwampis rikurichin ñanta. Kachaykuntaj phukuyninwan qhon qhonta.

¹⁴Phiñasqa kaspa kicharimullantaj janaj pacha qochasta. Ajinallataj phuyusta phawachin suwintusta jina.

¹⁵Diosqa atiyninwan phuyusta rikhurichimun, urmaykuchintaj chijchista rumista jina.

¹⁶Diosqa orqosta kuyurichin, ikhaykuchintaj jallp'ata.

¹⁷Munayninta kasuspa, ura wayra phukuykun. Ajinallataj, sinch'i pata wayrapis.

¹⁸Rit'itapis urmaykuchillantaj, phawaj p'isqosta jina. Rit'itaj chayamun langosta jina. Rit'ej lliphipiynin ñawita ciegoyachin. Rikuspa rit'ita urmashajta, runaj sonqon wawayarin.

¹⁹Chhullunkataqa t'akaykun kachita jina, t'ikarichintaj lliphipej rumita jina.

²⁰Diosqa phukuykuchin patamanta jamoj chiri wayrata. Qhasamantaj tukuchintaj juturi yakuta. Tukuy qochas patapi qhasaqa rikhurimun, yakuta qhataspa.

²¹Chay qhasaqa nina jina ruphaykuchin ch'akichintaj orqo qhorastataj, pampa ch'ikistataj.

²²Phuyusmanta jamoj chhullataj tukuy imata sumajyachin, joq'ochantaj ch'akisqa jallp'ata.

²³Diosqa yachayninwan thasnuchin jatun qochaj phiñakuyninta, churantaj jallp'asta qochas chaupiman.

²⁴Yakupi rejkuna willanku maymanchus jatun qocha chayasqanta. Nisqankuta uyarispataj t'ukunchej.

²⁵Chaypimá t'ukuna ruwasqasnin. Chaypi tukuy ima laya kausayniyojkuna.

²⁶Diosnejta tukuy ima allinman tukun. Paypa nisqasninrayku tukuy ima pachampi kakushan.

²⁷Mana astawan nisajñachu. Paymin aswan jatun tukuy imamanta nisqaqa.

²⁸Yupaychanapuni Diospa jatun kayninta. Paypa ruwasqasninmantaqa, paymin aswan sumaj.

²⁹Diosmanta manchachikuna. Atiynenqa may jatun.

³⁰Payta yupaychaychej qhaparispa. Sinch'ita qhaparejtiykichejpis, astawampuni yupaychana paytaqa. Watejmanta kallpachakuspa yupaychaychej payta. Ama sayk'uychejchu. Paytaqa yupaychanapuni.

³¹Pitaj payta rikunri willanampaj imaynachus pay kasqanta? Pitaj atinman paypa jatun kayninta yupaychayta maychus kajman jina?

³²Pakasqa kajtaj aswan jatumpuni. Ruwasqasninmantaqa pisillata rikuni noqaqa.

³³Señorqa tukuy imata ruwarqa. Payta qhatikojkunaman yachayta qon.