Read Quechua Bolivia DC Bible ECLESIÁSTICO 44 Bible Online

ECLESIÁSTICO 44 - Quechua Bolivia DC Bible bible

ECLESIÁSTICO 44

¹Ñaupa tatasmanta Kunanqa allinta parlasqaykichej ñaupa tatasninchejmanta, chay k'acha runasmanta, pikunachus unayña kausarqanku, chaykunamanta.

²Paykunataqa patapi kaj Dios jatunyacherqa, sutisninkuta rejsichispa unaymantapacha.

³Paykunamantaqa wakinkuna reyes karqanku, kay pachapitaj kamacherqanku. Wakinkunataj allin rejsisqas karqanku allin ruwasqasninkumanta. Wakinkunataj kurajkunamanqa yachayniyoj cheqan ñanta rikuchej kanku. Wakinkunataj, tukuy imata yachaspaña, Diospa sutimpi runasman parlaj kanku.

⁴Wakinkunataj, yachayniyoj kaspa, kamachej kanku. Paykunaqa allinta unanchakuspa kamacherqanku. Wakinkunataj yachasqankumanta librosta escriberqanku. Wakinkunataj yarawista escribej kanku.

⁵Wakinkunataj takiykunasta ruwaj kanku, maychus kajman jina. Umallikojkunapis unanchakusqankuta escribillarqankutaj.

⁶Kallarqataj qhapajkuna, may kallpayoj runas, pikunachus sonqo tiyasqa kakoj kanku wasisninkupi.

⁷Tukuy paykunataqa mitasninku allin ñawiyoj qhawaj kanku. Kausashajtinku runas ukhupi lliphipej kanku.

⁸Wakinkoj sutisninkumanta runas yuyarikullankutaj. Wawasninkupis chay sutisninkuta waqaychashankuraj.

⁹Kallantaj pikunamantachus mana ni pipis yuyarikunñachu. Wañupusqankumantapacha, paykunamanta qonqapunkuña. Noqanchejpajqa mana kausakoj jina kanku. Kikillantaj wawasninkupis.

¹⁰Chay rejsisqa runasqa allinta kausakorqanku. Suyakusqanku mana qhasichu karqa.

¹¹Kapuyninkoqa wawasninkuman chayarqa, allchhisninkutaj jap'inkorqanku.

¹²Dioswan trato ruwasqankuta junt'asqankurayku, kanraj kunankama paymanta jamojkuna. Paykunapis tratota junt'allankutaj.

¹³Runasqa paykunamanta yuyarikonqankupuni. Mana qonqaponqankuchu allin kajta ruwasqankumanta.

¹⁴Ayasninkuta sonqo tiyasqa kaywan p'ampaykorqanku. Sutisninkutaj wiñaypaj rejsisqa kanqa.

¹⁵Runasqa tantakuspa yachayniyoj kasqankumanta yuyarikonqanku. Tukuynejpi runas paykunamanta parlanqanku. Enocmantawan Noemantawan

¹⁶Enocqa kausakorqa Diospa munayninman jina. Qhepampi jamojkunaman cheqan ñanta rikucherqa.

¹⁷Noetaj cheqan sonqoyoj runa karqa, mana juchayoj. Kay pacha t'unasqa kajtin, Noenejta runasqa watejmanta rikhurimunku. Payrayku kanraj runasqa, Diosninchej paywan uj tratota ruwarqa. Chayrayku, sinch'i para thañerqa.

¹⁸Diosqa, wiñay señalta churaspa nerqa amaña ujtawan kausakojkunata chinkachinanta. Abrahammantawan, Isaacmantawan, Jacobmantawan

¹⁹Abrahammanta ashkha ayllus jamunku. Abrahamqa paypa kikin sutinta mana ch'ichicharqachu.

²⁰Abrahamqa Diospa kamachisqasninta junt'arqa, paywantaj uj tratota ruwarqa. Kikin ukhumpi chay tratomanta señalta churarqa. Dios pruebaman payta churajtintaj, payqa mana urmarqachu.

²¹Chayrayku, Diosqa juraspa prometerqa wawasninnejta bendicinanta tukuy runasta. Nerqataj paymanta jamojkuna runas ashkhayanankuta t'iyu jina, qoyllurkuna jinallataj. Nerqataj chayaqenku chayananta jatun qochaj cantonmantapacha ujnin cantonkama, Eufrates mayumantapacha kay pachaj tukukuyninkama.

²²Jinallataj, Isaacmampis kikin promesasta prometeykorqa, Abraham tatanmanta yuyarikuspa.

²³Ñaupajta trato ruwasqanta watejmanta valecherqa. Ajinamanta, Diospa bendicionnin Israelpaj karqa. Señorqa qopullarqa Israelman jap'ikunan kananta kuraj wawa jina. Nerqataj imachus chayaqen. Paypa wawasnin chunka iskayniyoj ayllusman tukorqanku. Karqataj jallp'a sapa ayllupaj.