Read Quechua Bolivia DC Bible ECLESIÁSTICO 47 Bible Online

ECLESIÁSTICO 47 - Quechua Bolivia DC Bible bible

ECLESIÁSTICO 47

¹Natanmanta Davidmantawan Samuelpa qhepampi jamorqa Natán, pichus Davidpa wasinman yaykorqa, payta sirvej.

²Israel ukhupi mana ni pi karqachu David jina sumaj. Imaynatachus wiraqa aswan sumaj Diosman jaywasqankumanta, ajinallataj Davidpis.

³Davidqa leoneswan phujllakoj cabraspis kankuman jina. Phullakojllataj jukumariswan corderospis kankuman jina.

⁴Lloqallaraj kashaspa, uj may jatun runata wañucherqa. Ajinamanta, ayllumpa p'enqayninta chinkacherqa. Payqa warak'anta muyuykuchispa makinwan ujta pampaman k'umuykucherqa chay jatun runaj wapu kayninta.

⁵Davidqa Diosmanta mañakusqa tukuy sonqo. Chayrayku Diosqa, makinta kallpachaykusqa wañuchinampaj chay runata, maqanakupaj allin wakichikusqata. Ajinamantaqa, Israel aylluta atipacherqa.

⁶Chayraykullataj, sipaskuna paypaj takiriporqanku kusikuspa chunka waranqa runasta wañuchisqanmanta.

⁷Davidqa atiparqa muyuynimpi kaj enemigosninta. Perqachasqa jark'anasta oqharicherqa filisteos ama yaykunankupaj. Paykunaj atiyninkutataj kunankama t'unarparicherqa.

⁸Imallatapis ruwashajtin Davidqa Diosman graciasta qoj. Davidqa tukuy sonqo payta ruwaj Diosta munakorqa. Paypaj sapa día takirikoj.

⁹Davidqa Diospa altarpa ñaupaqempi takirikoj guitarraswan. Davidqa nerqa runas takinankuta arpasta waqachispa.

¹⁰Nillarqataj fiestasqa aswan k'achitus kananta. Nillarqataj imaynatachus fiestas kanan tiyan sapa wata. Chay fiestaspi runasqa Diospa santo sutinta yupaychaj kanku paqarinmantapacha templopi takispa.

¹¹Chantaqa, Señorqa Davidpa juchanta pampacharqa, wiñay atiytataj qorqa. Wajyarqataj rey kanampaj, Jerusalén llajtapitaj tiyakunampaj. Salomonmanta

¹²David sumaj runa kasqanrayku, paypa wawan Salomón, yachaysapa runa, sonqo tiyasqa kausakorqa.

¹³Salomón kamachikushajtin maqanakus mana karqachu. Diostaj payta yanaparqa mana maqanakunampaj vecinosninwan. Salomonqa sayaricherqa uj templota Diospaj. Paypis ruwachillarqataj uj santuariota wiñaypaj sayashajta.

¹⁴Salomón! May yachayniyoj karqankeqa wayna kayniykipi. Yachayniyoj nisqasniyki jich'akamoj Nilo mayu jina.

¹⁵Qanqa, kay pachata junt'aykucherqanki yachayniykiwan. Janaj pachamampis chayamoj yupaychana takisniyki.

¹⁶Sutiyki karu llajtasmampuni chayarqa. Llamp'u sonqoyoj kasqaykirayku runasqa qanta munakusoj kanku.

¹⁷Tukuy ladomanta runasqa t'ukoj kanku mayta uyarispa takikusqaykita, willakusqasniykita, watuchikusqasniykita, yachachisqasniykita ima.

¹⁸Runasqa nisorqanku: Señorpa munakusqan, nispa. Chay suteqa ñaupaj Israel ayllumampuni qosqa karqa. Qoritaqa fierrota jina qotorqanki, qolqetarí titita jina.

¹⁹Jinapis, warmiswan purej kanki. Ukhuykitataj atipaykuchinki paykunawan.

²⁰Sutiykitaqa ch'ichicharqanki, manataj warmiykita respetarqankichu. Diospa phiñakuyninta wawasniyki pataman apachimorqanki. Ayllusniykitataj p'enqaypi rikhuricherqanki.

²¹Chayrayku, Diospa ayllun iskayman t'aqakorqa. Chayraykullataj, Efraín ayllu Diospa contrampi oqharikorqa.

²²Jina kajtimpis, Diosqa mana karunchachinchu qanmanta munakuyninta. Manataj qonqapunchu nisqanta junt'ayta. Chayrayku, Diosqa mana tukucherqachu ajllasqasnimpa wawasninkuta. Nitaj chinkacherqachu pikunatachus jamunku munakusqasninmanta. Manachayqa, munarqa Jacob ayllumanta kanankutapuni runas. Munarqataj Davidpa poqoynin kanantapuni.

²³Salomonqa wañorqa ashkha watasniyoj kaspa. Paypa qhepampi jamorqa wawan Roboam. Chay Roboamqa may wampu karqa, pisi umayoj. Roboamqa, pisi yuyayniyoj kaspa, runasta chinkayman aparqa.

²⁴Chaymanta jamorqa Nabatpa wawan Jeroboam. Paymantaqa ama ni pipis yuyarikuchunchu. Chay Jeroboamqa juchallikorqa. Israelitastapis juchallicherqataj. Payqa Efraín runasta urmaykucherqa. Paykunataj llajtankumanta qharqosqas karqanku. Eliasmanta

²⁵Chay runaspa juchankoqa may jatun karqa. Paykunaqa tukuy ima laya juchawan juchachakorqanku.