Read Quechua Bolivia DC Bible ECLESIÁSTICO 48 Bible Online

ECLESIÁSTICO 48 - Quechua Bolivia DC Bible bible

ECLESIÁSTICO 48

¹Chaymantataj jamun uj profeta nina jina. Paypa nisqanqa rupha horno jina karqa.

²Payqa israelitasmanta qechukaporqa t'antasninkuta. Phiñakuyninwanqa pisi runasman tukucherqa.

³Diospa munayninrayku nerqa ama paramunanta. Kinsa kutitataj ninata parachimorqa.

⁴Manchachejpuni karqanki, Elías! Mana ni pi aswan jatunchu karqa qan jinaqa.

⁵Qanqa uj wañusqa runata kausarichimorqanki. Diospa munayninrayku qan chay runataqa wañuy makimanta kacharichimorqanki.

⁶Qanqa sepulturaman pusarqanki may atiyniyoj kamachejkunata puñunankumantapacha, maypichus onqosqas kasharqanku chaymanta.

⁷Qanqa Sinaípi, Horeb orqopi, uyarerqanki Diosta qhaparejta, runasta wañuchinanta, nispa.

⁸Jawiykorqanki reykunata cheqanyachinankupaj. Jawerqankitaj uj profetata, qampa qhepaykipi Diospa sutimpi parlanampaj.

⁹Wayrawan apachikorqanki janaj pachaman. Wicharerqanki uj carropi, nina caballosniyojpi.

¹⁰Librospi escribisqa kashan qan chayamunayki kasqanta ujpacha, Diospa phiñakuyninta thasnuchinaykipaj, manaraj Señorpa dían chayamushajtin allinyachinampaj tata mamasta wawasninkuwan, watejmantataj sayarichinampaj Israel ayllusta.

¹¹Kusisqamin kanqa pichus rikusonqa kausashajtinraj. Qantaj aswan kusisqamin kanki kausayniyojpuni kasqaykirayku. Eliseomanta

¹²Elías ripusqanmantaña, wayrawan pusachikuspa, Eliaspa espiritonqa Eliseoman yaykorqa. Eliseoqa aswan milagrosta ruwarqa Eliasmantaqa. Paypa nisqanqa t'ukunapajpuni karqa. Kausakushajtin mana kharkatiterqachu ni pejpa ñaupaqempi. Mana ni pi paypa patampi sayarerqachu.

¹³Payqa tukuy imatapuni ruwallarqa, mana manchachikuspalla. Uj kuti, uj wañusqa pataman winkukuspa, kausarichimorqa.

¹⁴Kausashajtin Eliseoqa milagrosta ruwarqa. Wañupuspapis milagrosta ruwallarqataj.

¹⁵Jinapis, runasqa mana Diosman kutirerqankuchu. Manachayqa, juchallikojpuni kanku. Chaymanta, chay runasqa kikin llajtankumanta qharqosqas karqanku. Tukuynejpitaj ch'eqerasqas karqanku. Rey Ezequiasmantawan profeta Isaiasmantawan

¹⁶Wakintaj qhepakullarqanku Judá llajtapi. Reyesninkutaj Davidpa ayllunmanta karqanku. Paykunamantaqa wakinkuna cheqanta kausarqanku. Wakinkunataj anchatapuni juchallikorqanku.

¹⁷Rey Ezequiasqa llajtanta perqaswan muyuykucherqa. Kikin llajtamantaj yakuta chayachimorqa. Chaypajqa, qaqasta jusk'uracherqa fierro barretaswan. Chantaqa, lomaspi uj qochata ruwacherqa.

¹⁸Ezequías kamachikushajtin, rey Senaquerib soldadosninwan kachaykukorqa Ezequiaspa llajtanman. Ñaupajta kacharqa uj generalninta mayqenchus ashkha soldadoswan Sión llajtaman yaykumorqa. Chaypitaj, sonqon oqharisqa Diospa contrampi parlarqa.

¹⁹Runasqa waqaj kanku manchachikuywan nanaywantaj, imaynachus onqoj warmi waqan, ajinata.

²⁰Runasqa chaypacha qhaparikoj kanku Diosmanta makisnin oqharisqas. Diostaj mañarikusqankuta uyarerqa. Paykunataqa salvarqa Isaiasnejta.

²¹Isaiasqa uj peste onqoyta apachimorqa asirio jaraman. Chaypitaj runasqa anchata manchachikorqanku.

²²Ezequiasqa sumaj kajta ruwarqa rey Davidta qhatispa, yuyarispataj imatachus payman nej jatun profeta Isaías. Isaiaspa rikusqanqa creenapajpuni karqa.

²³Isaías kausakushajtin inteqa ithirerqa. Ajinamanta reyqa astawanraj kausarqa.

²⁴Isaiasqa yacharqa imachus pasananta. Payqa sonqocharqa Siompi llakisqa kasharqanku chaykunata.

²⁵Nillarqataj imachus pasananta wiñaypaj. Pakasqa kajtapis yachallarqa, mana kashajtinraj.