Read Quechua Bolivia DC Bible ECLESIÁSTICO 49 Bible Online

ECLESIÁSTICO 49 - Quechua Bolivia DC Bible bible

ECLESIÁSTICO 49

¹Rey Josiasmantawan profeta Jeremiasmantawan Josiaspa sutenqa q'apaj incienso jina. Sichus uj runa ruwanman uj sumaj perfumeta, tukuy perfumesmanta aswan sumaj kajta, chay perfumeman rijch'akun Josiasqa. Paymanta yuyarikusqanchejqa misk'i jina. Yuyarikusqanchejqa uj fiestapi banda jina.

²Josiasqa llakikorqa Diosmanta karunchakusqanchejmanta. Pay t'unacherqa millay lantistaqa.

³Josiasqa tukuy sonqo Diosta munakorqa. Maypachachus runasqa chejninakojpuni kanku, payqa tukuy runasta munakoj.

⁴Tukuy reykunamantaqa, Davidwan, Ezequiaswan, Josiaswantaj sumajta kausakoj kanku. Wajkunarí mana allintachu kausakoj kanku, Diospa leyninmantataj karunchakorqanku.

⁵Chayrayku, Diosqa atiyninkuta wajkunaman qoporqa. Paykunaj atiyninkuta waj nacionman pasacherqa, karumanta jamoj mana yuyayniyoj nacionman.

⁶Chay nacionmanta runasqa Diospa ajllakusqan llajtata larwaricherqanku, tukuynejmantaj llakiyta aparqanku.

⁷Chaytaqa Jeremías ñaupajta willasqaña. Jeremiasqa profetaña karqa manaraj nacekushajtin. Paymin churasqa karqa sik'imunampaj, urmachinampaj, t'unaranampaj, chinkachinampaj ima. Chantaqa, wasichinampaj, mujuta tarpunampaj, mosojyachinampajtaj. Jinapis, runasqa payta llakicherqanku. Ezequielmantawan waj profetasmantawan

⁸Ezequielqa uj rikuyta rikorqa mosqoypi jina. Willakorqataj imaynachus kasqankuta chay kausajkuna pikunachus Diospa carronta purichinku chaykuna.

⁹Payqa Jobmantapis parlarqa, pichus sinch'itapuni sayarqa cheqan sonqoyoj kaynimpi.

¹⁰Kallantaj chay chunka iskayniyoj profetas. Tullusninku llojsimuchunku sepulturasninkumanta, imaynachus t'ikas p'utumunku ajina. Paykunaqa sonqocharqanku Jacobpa ayllunta. Salvarqankutaj runasta sumaj kajta suyachispa. Karu llajtamanta kutimusqankumanta

¹¹Imaynatataj atisunman Zorobabelta alabaytari? Imaynachus aroqa runaj makimpi lliphipin, ajinallataj paypis.

¹²Alabanallataj Josadacpa wawan Josuetapis. Tukuy paykunaqa watejmanta altarta sayaricherqanku. Oqharerqankutaj santo templota, wiñaypaj k'anchayniyoj kanan karqa chayta.

¹³Nehemiasmantapis yuyarikunallataj. Payqa llajtanchejta watejmanta sayaricherqa. Llajtanchejqa raqayman tukusqaña karqa. Paytaj watejmanta perqasta llajtaj muyuynimpi sayaricherqa. Punkustataj churarqa wisq'anasnintinta. Ñaupa tatasninchej

¹⁴Enoc jina pisi runas karqanku. Paypis kay pachamanta pataman pusachikorqa.

¹⁵José jina mana ni uj runallapis karqachoqa. Payqa wauqesnimpa kamachejnin karqa. Payqa tukuy ayllunta pataman pusarqa. Ayantaqa sumajta p'ampaykorqanku.

¹⁶Chantaqa, Semwan, Setwan, Enoswan ima yupaychasqas karqanku. Jinapis, Adanqa aswan gloriayojpuni karqa tukuy kausakojkunamanta nisqaqa.