Read Quechua Bolivia DC Bible ECLESIÁSTICO 50 Bible Online

ECLESIÁSTICO 50 - Quechua Bolivia DC Bible bible

ECLESIÁSTICO 50

¹Kuraj sacerdote Simeonmanta Yuyarikunallataj kuraj sacerdotemanta, Johanampa wawan Simeonmanta. Pay kausakushajtin, temploqa watejmanta sayarichisqa karqa. Santuariopis sumajyachisqa karqa.

²Ajinallataj, perqastapis mosojyacherqanku chaypacha. Churarqankutaj reypa wasimpi jark'ana torresta.

³Chaypacha uj jatun qochatapis ruwallarqankutaj. Chay qochaqa may jatun karqa, mar jina.

⁴Simeonqa Diospa ayllunta jark'arqa suwasmanta. Sinch'iyacherqataj llajtata ama enemigos yaykunankupaj.

⁵Santuario punkupi rikhurimuspa, cortina wasamanta llojsimuytawanqa, may jatun karqa Simeonqa, respetanapuni.

⁶Imaynachus ch'aska lliphipin phuyus ukhupi, ajinallataj paypis. Imaynachus killa k'anchamun fiestaspi, ajinallataj paypis.

⁷Imaynachus inteqa k'anchaykun reypa wasinta, ajinallataj paypis. Imaynachus k'uwichi rikhurimun phuyus ukhupi, ajinallataj paypis.

⁸Rijch'akullantaj t'ikasman q'omer tiempopi rikhurimojkunaman. Rijch'akullantaj azucena t'ikaman, larq'a cantopi sayajman. Chantapis, rijch'akullantaj cedro sach'aman, ruphay tiempopi q'omeryashajman.

⁹Inciensomampis rijch'akullantaj, q'osñirishan altar patapi chayman. Rijch'akullantaj allin ruwasqa qori copamampis, k'acha rumisniyoj k'achanchasqa chayman.

¹⁰Simeonqa olivo sach'a jinallataj, ashkha aceitunayoj jina. Rijch'akullantaj ashkha ramasniyoj sach'aman.

¹¹Ajina karqa Simeonqa, k'acha p'achayoj p'achallisqa kashajtin. Ajina karqa altarman wicharishajtin. Templo punku jatun kayninwan junt'asqa karqa.

¹²Ajina karqa Simeonqa llant'a ladopi sayashajtin jap'ikunampaj imatachus waj sacerdotes aparqanku chayta. Chaypacha, waynasqa muyuynimpi sayarej kanku, imaynachus laqhes rikhurimunku Líbano cedro sach'amanta, ajina.

¹³Paypa ladompi sayarej kanku, imaynachus sauce sach'as sayanku larq'a cantopi, ajina, tukuy Aarón ayllumanta kajkuna, sumaj p'achallisqas. Paykunaqa makisninkupi apasharqanku rikuchikusta Señorpaj tukuy runaspa ñaupaqempi.

¹⁴Simeonqa rikuchikusta Señorman jaywaytawankamaqa, wakichej ñak'asqa animalkunata Señorman jaywanampaj.

¹⁵Chaymantataj, vinota jich'ayoj altar chakiman. Chayqa sumaj q'apayniyoj karqa Señorpaj, patapi kaj mundontimpi kamachejpaj.

¹⁶Chantaqa, Aarón ayllumanta kaj sacerdotespaj cornetasta waqerichej kanku. Sonachisqankutaj sinch'i karqa. Chaywanqa willaj kanku Señorqa chaypi kasqanta.

¹⁷Chantaqa, tukuy chaypi kajkuna qonqorikoj kanku pampakama k'umuykukuspa, yupaychaspataj Israelpa Señor Diosninta.

¹⁸Chantaqa, takisqankutaj uyarikorqa. Chaytaqa tukuy runas chaypi kashajkuna takisharqanku.

¹⁹Tukuy runaspuni takirikoj kanku, khuyakoj Señormanta mañakuspa. Kuraj sacerdote tukuytawanqa imatachus ruwanan karqa altarpi, uraykamoj.

²⁰Payqa uraykamoj makisnin oqharisqa israelitaspa patankuman, tukuy paykunata Señorpa sutimpi bendiciykuspa, kusikuspa Señorpa sutinta oqharisqanmanta.

²¹Runasqa qonqorikoj kanku paypa makisninmanta bendicionta jap'ikunankupaj.

²²Kunanqa, qankunapis Israelpa Señor Diosninta yupaychaychej. Paymin t'ukunasta ruwan kay pachapi. Payqa runata wiñachin manaraj nacekusqanmantapacha. Paytataj ruwan munayninman jina.

²³Paypuni yachayta qosuchun, qankuna ukhupitaj sonqo tiyasqa kay kachampuni.

²⁴Señorqa yanapachumpuni Simeonta. Junt'achuntaj promesa ruwasqanta Fineesman. Fineesman, wawasninmampis chayta qochumpuni wiñaypaj. Israelta chejnikojkuna nacionesmanta

²⁵Iskay laya nacionesta noqaqa chejnikuni. Chejnikullanitaj waj runastapis, pikunachus mana nación sutiyojchu kananku tiyan.

²⁶Chaykunaqa kanku Seir llajtapi tiyakojkuna. Chantaqa, filisteospis. Chaymantataj, chay mana yuyayniyoj runas, Siquempi tiyakojkuna. Kaywan tukukun

²⁷Tukuy kaytaqa yachayniyoj nej Siraj allchhin, Eleazarpa wawan Jesús. Kay jinatapuni umanmanta llojsimoj.

²⁸Chayta unanchajqa kusikuyniyoj kanqa. Chayta yachajqa yachayniyojllataj kanqa.

²⁹Señorta yupaychajqa kausayniyoj kanqa.