Read Quechua Bolivia DC Bible ECLESIÁSTICO 51 Bible Online

ECLESIÁSTICO 51 - Quechua Bolivia DC Bible bible

ECLESIÁSTICO 51

¹Diosta yupaychana Noqaqa qanta yupaychayki, Señor, salvadorníy. Agradecekuyki, Diosníy, tatáy. Noqaqa sutiykita qhaparisaj.

²Noqaqa, llakisqa kashajtiy, qanman qayllani. Qanqa wañuymanta kacharichiwarqanki. Qanqa jark'awanki sepulturaman chayanaymanta. Qanqa mana munarqankichu wañuyman jap'ichikunayta. Qanqa mana saqerqankichu sajra simi noqamanta parlananta. Llulla runa tumpajmanta karunchawarqanki.

³Jatun munakuyniykiwan yanapawarqanki. Noqaj ladoypi sayarerqanki chejniwajkuna jamushawajtinku. Chaykunaqa wañuchiwayta munasharqanku. Sinch'i llakiymanta qan librawarqanki.

⁴Llakiytaj phutiytaj muyuyniypi kasharqa nina jina. Chay ninataqa mana thasnuyta atisharqanichu.

⁵Qanqa may ukhumanta llojsichiwarqanki. Jark'awarqankitaj llulla simismanta.

⁶Chejniwajkuna runasqa simisninkuwan t'ojsiwaj kanku wasaymanta. Noqaqa wañuy patapiña kasharqani. May ukhupiña kasharqani noqaqa.

⁷Muyuyniyman rikorqani. Manataj ni pi karqachu yanapawaj. Mask'arqanitaj maymantachus jap'ikunayta, manataj karqachu.

⁸Chaypacha, yuyarikorqani Señor khuyakoj kasqanmanta. Yuyarikorqanitaj paypa munakuynin mana tukukoj kasqanta. Señorqa salvan pikunatachus payman qayllanku chaykunata, tukuy mana allin kajmantataj jark'an.

⁹Noqaqa kay pachamanta qhaparerqani. Sepultura punkumantapacha sinch'ita qhaparerqani.

¹⁰Kay jinatataj Diosmanta mañarikorqani: Señorníy, qan tatay kanki. Qanqa atiyniyoj kanki salvanawaykipaj. Ama saqerpariwaychu llakiy horapi. Ama saqerpariwaychu manchachikuywan junt'asqa kashajtiy, sapallay kasqayta yachaspa. Noqaqa tuta p'unchay yupaychasqayki, qanmantataj mañarikullasaj sapa kuti.

¹¹Chaypachataj Señorqa qhaparikusqayta uyarerqa. Mañakusqayta uyarispa tukuy ima mana allin kajmanta librawarqa. Wañuy patapiña kashajtiy salvawarqa.

¹²Chayrayku, payman graciasta qoni. Señorpa sutintaj yupaychani, bendicinitaj. Señorman graciasta qoychej sumaj sonqoyoj kasqanrayku, imaraykuchus paypa munakuynenqa mana tukukunchu. Agradecekuychej Israel aylluta yanapajta, imaraykuchus paypa munakuynenqa mana tukukunchu. Agradecekuychej kay pachata ruwajta, imaraykuchus paypa munakuynenqa mana tukukunchu. Agradecekuychej Israel aylluta salvajta, imaraykuchus paypa munakuynenqa mana tukukunchu. Agradecekuychej ch'eqerasqa israelitasta tantaykamojta, imaraykuchus paypa munakuynenqa mana tukukunchu. Agradecekuychej watejmanta sayarichejta llajtatawan templotawan, imaraykuchus paypa munakuynenqa mana tukukunchu. Agradecekuychej mosojyachejta David aylloj atiyninta, imaraykuchus paypa munakuynenqa mana tukukunchu. Agradecekuychej Sadoc ayllumanta runasta sacerdotesnimpaj ajllakusqanta, imaraykuchus paypa munakuynenqa mana tukukunchu. Agradekakuychej Abrahamta yanapajta, imaraykuchus paypa munakuynen(...)

¹³Waynallaraj kashajtiy, manaraj mundota rejsej kachaykukojtiy, yachayniyoj kaytaqa anchatapuni munarqani.

¹⁴Yachaytaj jamuwarqa k'acha kaynimpi. Paytaqa mask'aj kani taripanaykama.

¹⁵Yachayta uva jina poqorqaña. Yachaywanqa sonqoy kusikorqa. Noqaqa cheqan sonqoyoj ñanninta jap'ej kani. Noqaqa wawa kasqaymantapacha payman k'askakoj kani.

¹⁶Pisi tiempollanta niwasqanta uyarej kani. Jinapis, anchata yachaj kani.

¹⁷Tukuy sonqo payman k'umuykukoj kani. Chayrayku, graciasta qoni yachayta yachachiwajta.

¹⁸Munarqanipuni yachayniyoj kayta. Nerqanitaj chayta tinkuytawankamataj, ni imawan cambianayta.

¹⁹Yachayta munakoj kani. Yachayllatataj qhawaj kani. Paypa wasinta kicharerqani, ojllanaypaj, qhawanaypajtaj.

²⁰Payta munakorqani tukuy sonqo. K'acha kaynimpitaj yachayta tarerqani. Rikuytawantaj, payta munakorqani. Chayrayku, mana payta saqesajchu.

²¹Sonqoy rupha karqa horno jina payta rikuspa. Chayrayku, payta jap'ikaporqani. Yachayqa noqapaj aswan sumaj qorimanta nisqaqa.

²²Señorqa qowarqa imatachus mañakorqani chayta. Chayrayku, payta agradecekusaj qhaparispa:

²³Mana yachayniyoj runas, noqata watukuwaychej, wasiypitaj tiyakuychej.

²⁴Jayk'ajkama mana yachayniyojchu kankichejri? Jayk'ajkamataj ch'akichikuspa kankichejri?

²⁵Kayta niykichej yachaymanta: Yachayta jap'iychej qhasillamanta.

²⁶Payta kasuychej. Ruwanaykichejta nisqantapis ruwallaychej. Payqa payta mask'ajkunaj qayllampipuni kashan. Payta munakojqa payta tarillanqapuni.

²⁷Kikin ñawisniykichejwan rikuychej pisita ruwasqayta. Rikuychejtaj samarikusqayta.

²⁸Tukuyniykichej uyariychej imatachus yachakorqani waynallaraj kashajtiy. Ajinamantaqa, qoriyojtaj qolqeyojtaj kankichej.

²⁹Yachay wasiypi kusirikuychej. Yachachisusqaykichejmanta ama p'enqakuychejchu.

³⁰Cheqanta kausaychej. Diostaj allin kajta qosonqachej. Señorqa bendicisqa kachun wiñaypaj. Sutenqa yupaychasqapuni kachun.