Read Quechua Bolivia DC Bible ECLESIÁSTICO 6 Bible Online

ECLESIÁSTICO 6 - Quechua Bolivia DC Bible bible

ECLESIÁSTICO 6

¹Runa misiykej amigon kaspa, ama enemigonman tukuychu. Chayta ruwanki chayqa, sutiyki chejnisqa kanqa. Ajina ari, puraj uyaqa chejnichikun.

²Ama munapayasqaykiwan atipachikuychu. Atipachikunki chayqa, chay munapayasqayki uj phiña waka jina t'unarparichisonqa.

³Uj sach'aj laqhesnin ismusqa, poqoynin t'akasqa, sach'ataj ch'aki k'ulluman tukusqa. Pajtataj kikillantaj qanwampis kanman.

⁴Sinch'i munapayay runata chinkayman apan. Enemigosnintaj payta asipayanku. Cheqan munakuymanta

⁵K'acha sonqo parlaj runaqa ashkha amigosniyojmin. Allinta parlakojqa allinllatataj kutichikun.

⁶Ashkha kachunku qanman qayllajkuna. Sonqoykita kicharinaykipajtaj, waranqa ukhupi ujsitullata ajllakuy.

⁷Uj runa amigoykiman tukunampaj, ñaupajta yachallayraj imaynachus, amataj chaypachalla sonqoykita kichariychu.

⁸Wakinku mana wiñay amigoschu kanku. Chaykunaqa llakiyniykipi mana qanwanchu kanqanku.

⁹Wakinku, amigos kaspa enemigosniykiman tukunku, p'enqaypitaj rikhurichisonqanku, maqanakusqasniykichejta willaraspa.

¹⁰Wakinkutaj amigosniyki kanku mikhunankurayku. Llakiyniykipitaj mana ladoykipichu sayanku.

¹¹Chaykunaqa allin risojtin qanwan khuska kanku. Mana allin risojtintaj, qanmanta karunchakunku.

¹²Llakiyniykipi wasanchasonqanku. Paykunataqa mana rikunkiñachu.

¹³Enemigosniykiwan amapuni kaychu. Amigosniykiwan kajtiyki, ñawisniykita kichariy.

¹⁴Cheqamanta amigoyki yanapasonqapuni. Pichus tarin chay jina amigota, qorita tarin.

¹⁵Cheqamanta kaj amigotaqa mana rantikuwajchu. Valesqanqa mana qolqewanchu yachakun.

¹⁶Cheqamanta amigoqa amigonta tukuy mana allinmanta jark'an. Diosta munakojqa, chay jina amigota tarenqa.

¹⁷Señorta munakojqa cheqamanta amigosniyoj. Imaynachus qan kanki, ajinallataj amigoykipis. Yachaymanta

¹⁸Wawáy, wawamantapacha yachayniyoj kayta munay. Machuyaspataj may umayoj kanki.

¹⁹Imaynachus llank'aj runaqa tarpuntaj pallantaj sumaj cosechata suyaspa, ajinallataj qampis yachayman qayllay. Kunan pisillata jump'ispa, q'aya poqoyninmanta mikhunki.

²⁰Sonso runaqa yachaymanta millachikun. Mana umayoj runaqa yachayman ni chimpaytapis munanchu.

²¹Chay runapajqa yachay uj llasa rumi jina. Chaypachalla kachaykun.

²²Yachayqa pisi runasllapaj.

²³Uyariway, wawáy, nisusqaytaqa ama qhesachaychu.

²⁴Yachaywan mat'iykuchikuy chakisniykitawan kunkaykitawan.

²⁵Yachayta q'epirikullay. Yachaywan phaskasqa kaspataj, ama phaskarakuychu.

²⁶Yachayman qayllay tukuy sonqo. Ñannintataj jap'iy tukuy kallpaykiwan.

²⁷Cheqampi purillay. Yachayta mask'anki chayqa, tarillanki. Tariytawantaj ama kachariyñachu.

²⁸Yachayqa samarichisonqa, kusikuyniykimantaj tukonqa.

²⁹Watusnin jark'asonqa, walqantaj k'achanchasonqa.

³⁰Yugon qori yugo jina kanqa qampaj. Watusnintaj tukuy watusmanta aswan sumaj.

³¹Yachayqa fiesta p'achayki kanqa. Umaykipajtaj pilluyki kanqa.

³²Munaspaqa, wawáy, yachayniyojman tukunki. Sonqoykita churanki chayqa yachakuyman, tukuy imatapuni entiendenki.

³³Mana sayk'unkichu chayqa uyarikuspa, yachallanki. Ningrisniykita kicharinki chayqa, yachaysapa kanki.

³⁴Machu runas tantakojtinku, qampis qayllallay. Uj yachajta rikuspa, chimpaykamuy.

³⁵Tukuy nisqankuta uyarillay. Allin nisqata ama saqeychu ayqejta.

³⁶Uj yachayniyojta rikuytawanqa, chhaputa sayariy paywan tinkukoj. Chakisniyki yachachisqasña kachunku punkunwan.

³⁷Señorpa kamachisqampi yuyay. Paypa nisqanmanta tuta p'unchay unanchakuy. Paymin sonqoykita kallpachapusonqa. Ajinamanta, chay munasqayki yachayqa qanman jamusonqa.