Read Quechua Bolivia DC Bible ECLESIÁSTICO 7 Bible Online

ECLESIÁSTICO 7 - Quechua Bolivia DC Bible bible

ECLESIÁSTICO 7

¹Juchamanta karunchakuy Sajra kajtaqa ama ruwaychu. Ajinamanta, sajra kajqa mana atipasonqachu.

²Karunchakuy sajra runamanta. Sajra runataj qanmanta karunchakonqa.

³Wawáy, ama tarpuychu mana cheqan sinrupi, runata llakichin chaypi. Pajtataj sapa mujumanta qanchista pallawaj.

⁴Ama Señormanta mañakuychu ñaupajpi churasunankuta. Amataj reymanta mañakuychu jatunchasunankuta.

⁵Ama munaychu Señorta ch'aukiyayta. Amataj rikhuriychu yachayniyoj jina reypa ñaupaqempi.

⁶Ama munaychu kamachejman tukuyta, mana atinki chayqa sajra kajta sik'iyta. Ichapis atiyniyojkunaman k'umuykukuwaj, cheqan kayniykitataj qolqerayku chinkachiwaj.

⁷Runaspa ñaupaqempi ama juchayoj rikhuriychu. Ama pampaman k'umuykukuychu runaspa ñaupaqenkupi.

⁸Ama juchaman urmaychu iskay kutita. Uj kutillawanqa jap'ichikunkiña.

⁹Ama niychu: Diosqa yuyarikonqa ashkhata qosqaymanta. Jaywashajtiy rikuchikusniyta patapi kaj Diosman, payqa jap'ikonqa.

¹⁰Diosmanta mañakojtiyki, pacienciakullay. Amapuni qonqaychu qolqeta qoyta wajchasman.

¹¹Amapuni asirikuychu llakisqa runamanta. Yuyarikuy Diosqa atisqanmanta sayarichiytataj k'umuykuchiytataj.

¹²Amapuni runa masiykipaj llullakuychu. Amataj llullakuychu kausaqeykipaj.

¹³Amapuni ni ima llullatapis parlaychu. Llullakuymantaqa tukuy ima llakiy chayamun.

¹⁴Ama ch'ajwaychu machu runaspa ñaupaqenakupi, Diosmanta mañakuspataj ama thautiyakuychu.

¹⁵Ama q'allikuychu sinch'ita llank'aymanta. Amataj qhellakuychu chajraspi llank'aymantaqa. Chay chajrastaqa, patapi kaj Diosninchej ruwarqa.

¹⁶Ama pataman oqharikuychu. Yuyarikuy Diospa phiñakuynin jamunampuni kasqanta.

¹⁷Tukuy sonqo pampaman k'umuykukuy. Rumi sonqoyoj runaqa ninawantaj khuruswantaj mikhuchikonqa. Runa masiykita munakuy

¹⁸Ama amigoykita kachariychu qolqerayku. Munakusqayki wauqeykita ama jaywaychu Ofir qorirayku.

¹⁹Ama qhesachaychu umayoj warmita. Sonqonqa qorimanta aswan sumaj.

²⁰Ama jasut'iychu llank'aj kamachiykita, nitaj mana qhellakoj uywaqeykitapis.

²¹Umayoj kamachiykita qan kikiykita jina munakuy. Saqellay libre runaman tukunanta.

²²Uywasniyojchu kanki? Chay uywasniykitaqa allinta qhaway. Sirvisunku chayqa, waqaychay paykunata.

²³Wawasniyojchu kanki? Educacionta qoy. Wawas kasqankumantapacha kasukuyta yachachunku.

²⁴Ususisniyki kanchu? Qhaway llimphu sonqoyoj purinankuta. K'amispataj rikuchiy imaynatachus kausananku tiyan.

²⁵Ususiykita casarachiy. Chayqa sumajmin. Qosampajqa yuyayniyoj runata ajllay.

²⁶Warmiyki sonqoykiman jina kajtenqa, payta munakuy. Mana payta munakunki chayqa, ama imallatapis willakuychu.

²⁷Tataykita respetay tukuy sonqo. Amapuni qonqaychu mamaykej nanayninta.

²⁸Yuyarikuy paykuna nacechikususqankuta. Imatataj paykunaman qowaj qanrayku ruwasqankumantari?

²⁹Tukuy sonqoykiwan Señorman k'askay. Paypa sacerdotesnintataj respetowan qhaway.

³⁰Tukuy kallpaykiwan munakuy qanta ruwaj Diosta, amataj saqerpariychu payta sirvejkunata.

³¹Diosta yupaychay, sacerdotestataj respetay. Kamachisqa kasqanman jina, qollay imatachus paykunapaj kajta: t'antata, waka uñasta, rikuchikusta atisqaykiman jina, ñak'ana uywasta, santo jaywantapis.

³²Wajchamampis qollay. Ajinamanta, sumaj bendicisqa kanki.

³³K'acha sonqoyki kicharisqa kachun tukuy kausakojkunaman. Wañusqasmantapis yuyarikullay.

³⁴Ama karunchakuychu waqajkunamanta. Llakisqaswan khuska qampis llakikuy.

³⁵Onqosqastapis qhawakullay. Chayta ruwajtiyki, onqosqa runaqa munakusonqa.

³⁶Imallatapis ruwaspa, unanchay maymanchus chayanayki tiyan. Chayta ruwaspaqa, mana juchallikunkichu.