Read Quechua Bolivia DC Bible ECLESIÁSTICO 8 Bible Online

ECLESIÁSTICO 8 - Quechua Bolivia DC Bible bible

ECLESIÁSTICO 8

¹Imallatapis ruwanaykipajqa unanchakuyraj Ama pleiteakuychu atiyniyoj runawan, ama makisninman urmanaykipaj.

²Amataj discutinakuychu qhapaj runawan. Ichapis qolqenwan atipasonqa. Qoreqa ashkha runasta chinkayman aparqa, rumiyacherqataj atiyniyojkunaj sonqosninkuta.

³Ama rimanakuychu ch'ajwaj runawan. Ninata jina enqhaykunman.

⁴Ama asirikuychu sonso runaswan. Ichapis paykunaqa ñaupa tatasniykipaj parlankuman.

⁵Ama k'amiychu juchasninmanta llakikoj runataqa. Yuyarikuy tukuy runasqa juchayojpuni kasqanchejta.

⁶Ama asirikuychu machu runamanta. Ichapis noqanchejpis machuyasunchej.

⁷Ama kusikuychu pililapis wañupusqanmanta. Yuyarikuy tukuy noqanchej wañupunanchej kasqanta.

⁸Ama asirikuychu yachayniyoj runas nisqankumanta. Nisqankuta sonqoykipi kutikipay. Paykuna allin kajkunata yachachisonqanku. Ajinamanta, atinki qayllayta patapi kaj runasman.

⁹Ama qhesachaychu machu runas yachachisqankuta. Paykunapis chayta yachakorqanku ñaupa tatasninkumanta. Paykunaqa yachachisonqanku umachakuyta parlaytataj maychus kajta.

¹⁰Ama enqhaychu sajra runaj ninanta. Ichapis ruphachikuwaj larwayninwan.

¹¹Phiña runawanqa ama phiñanakuychu. Nisqaykiwan urmachisunkiman.

¹²Ama mañaychu qanmanta aswan atiyniyojman. Mañanki chayqa, chay mañasqaykitqa chinkachinkiña.

¹³Ama garantiata qoychu kapususqanmanta astawan. Garantiata qonki chayqa, ch'inmanta pagallay.

¹⁴Juezwanqa ama pleitoman yaykuychu. Atipachikuwajpuni.

¹⁵Ama ñanta jap'iychu mana umayoj runawan khuska. Ichapis munayninman jina pusasunman. Payqa yuyasqanman jinalla tukuy imata ruwan. Qampis paywan khuska urmawaj.

¹⁶Ama discutinakuychu phiñakoj runawan. Amataj paywan khuska riychu ch'in pampaman. Payqa wañuchiymanta mana dakunchu. Yanapasoj mana kajtinkama, payqa qanman wijch'uykukonqa.

¹⁷Ama ni imallatapis willakuychu sonso runamanqa. Payqa mana ch'inllachu kanqa.

¹⁸Waj llajtayoj runaj ñaupaqempi, ama ni imata ruwaychu mana yachakunanta. Qanqa mana yachankichu imatachus ninanta.

¹⁹Sonqoykita ama kichariychu pillamampis. Ichapis manaña kusikuyniyojchu kawaj.