Read Quechua Bolivia DC Bible ECLESIÁSTICO 9 Bible Online

ECLESIÁSTICO 9 - Quechua Bolivia DC Bible bible

ECLESIÁSTICO 9

¹Warmismanta Munakusqayki warmiykimantaqa ama sajrata yuyaychu, ama mana allin kajta ruwachichikunaykipaj.

²Ama saruchikuychu warmiwan. Ichapis munasqanman jina purichisunman.

³Ama riychu mana allin puriyniyoj warmiwan. Urmachisunkiman.

⁴Ama puriychu takej warmiwan. Ch'ipasninwan jap'ichikuwaj.

⁵Ama qhawaychu sipasta. Ichapis paywan juchallikuspa paganayki kanqa.

⁶Ama riychu juchasapa warmispaman. Ichapis kapuyniykita chinkachiwaj.

⁷Llajtapi purispa ama warmista qhawapayaychu. Amataj ch'in k'uchusman riychu.

⁸K'acha warmiwan tinkukojtiyki waj ladoman qhaway. Ama munapayaychu ajeno warmita. Ashkha qharis chinkayman chayarqanku k'acha warmisrayku. Munakoyqa nina jina ruphaykun.

⁹Ama tiyakuychu casado warmej ladompi mikhoj. Ama chimpaychu paywan khuska ujyaj. Ichapis sonqoyki payta munakunman, chinkaymantaj chayawaj. Ama pillawampis puriychu

¹⁰Ama saqerpariychu unay amigoykita. Kunallan chayamoj chay waj amigoqa, mana chay ñaupa amigoyki jinachu. Mosoj amigoqa mosoj vinoman rijch'akun. Mauk'ayachunraj. Chaypacha gustoykiman ujyallanki.

¹¹Ama envidiakuychu sajra runamanta. Mana yachankichu imachus pasananta.

¹²Ama kusikuychu sajra runasman allinta risqanmanta. Yuyarikuy kay pachapeqa castigasqaspuni kanankuta.

¹³Karunchakuy wañuchej sonqo runamanta. Ajinamanta, wañuymantaqa mana manchachikunkichu. Payman chimpanki chayqa, allinta qhawaykuy. Pajtataj wañuchisunkiman. Yachallay ñanniykipi misk'achinastaj ch'ipastaj kasqanta.

¹⁴Runa masiykiwan sumajta kausay atisqaykiman jina. Yachayniyojkunawan puriy.

¹⁵Parlarikuy umayoj runaswan. Paykuna ukhupi kausaqesniykita mask'ay.

¹⁶Mikhunasniykiman wajyay cheqan sonqoyoj runasta. Diosta yupaychaspa kusikuyniykita tariy.

¹⁷Runaj makinwan ruwasqataqa runasqa alabanku. Runasta kamachejqa allinta parlanan tiyan.

¹⁸Llajtapi runasqa manchachikunku sumajta parlajmanta. Anchata parlajtaj chejnichikun.