Read Quechua Bolivia DC Bible ISAÍAS 1 Bible Online

ISAÍAS 1 - Quechua Bolivia DC Bible bible

ISAÍAS 1

¹Kayqa willasqa karqa Amospa wawan Isaiasman mosqoypi jina, Judamanta, Jerusalenmantawan, Uzías, Jotán, Acaz Ezequías ima, Judapi reyes kashajtinku:

²Janaj pacha, kay pacha ima, uyariychej Señorpa nisqanta: Wawasta uywarqani jatuchaj kanankukama, paykunataj contraypi sayaykukunku.

³Wakaqa dueñonta rejsin, burropis maypichus dueñon qarasqanta rejsillantaj; Israel aylluyrí mana rejsikapuwanchu, nitaj yuyayniyojchu.

⁴Ay, juchasapa runas, sajra kajta q'epirisqa ayllu, millay kajpa miraynin, qhenchachakoj wawas! Paykunaqa Señormanta karunchakunku, Israelpa cheqa kaj Diosninmanta t'aqakunku. Payta wasanchanku.

⁵Qankunaqa, contraypi sayaykukuytapuni munankichej. Cuerpoykichejpi manaña ch'usaj kanchu maynejpichus jasut'inaypaj. Tukuy umaykichejqa nanasqa, tukuy ukhuykichejpis llauch'ipacha.

⁶Chaki puntaykichejmanta, umaykichejkama nanasqa kankichej, llik'isqa, q'oyuyasqa, aycha rikhurishaj ima; ni pi jampichisunkichejchu, nitaj mayt'usunkichejchu, nillataj aceitewan jawiykurisunkichejchu nanasqasniykichejta.

⁷Jallp'aykichejqa ch'inman tukun, llajtaykichejtaqa ninawan q'olaykuchinku, kikin qankunaj ñaupaqeykichejpi enemigosniykichej tarpusqasniykichejta mikhunku. Tukuy ima qhepakun ch'impacha, imaynatachus Sodoma chinkachisqa karqa jina.

⁸Sionllaña sayashaj qhepakun, uvas chaupipi uj ch'ujlla jina, melón chaupipi ramada jina, enemigosninwan muyuykusqa llajta jina.

⁹Manachus Tukuy Atiyniyoj Señor noqanchejmanta wakinkunata qhepachinman karqa chayqa, kunampacha kashasunman karqa Sodoma jina, Gomorra jinataj.

¹⁰Sodomata kamachejkuna, uyariychej Señorpa palabranta. Gomorra llajta, allinta uyariy Diosninchejpa yachachisusqanta.

¹¹Señorqa nin: Imapaj apamuwankichej chay chhika rikuchikusta? Millachikuniña chay rikuchiku carnerosta, waka uñaspa wirasninta, millayta q'apaykuwan torospa yawarnin, jinataj ovejaspata, chivospata ima.

¹²Pitaj qankunamanta kaykunata mañukusunkichej, ñaupaqeyman apamojtiykichej, wasiy patiota sarunaykichejpajrí?

¹³Ama apamuwaychejchu mana walej rikuchikustaqa; millachikuniña chaykunaj q'osñinta. Qankuna tukuy runasta wajyankichej, qankuna tukuy runasta wajyankichej killa qallarikuy fiestata ruwanaykichejpaj, samakuna p'unchaytapis waqaychanaykichejpaj. Noqarí mana munanipunichu chaykunatawan, sajra imastawan ujllapi ruwanaykichejta.

¹⁴Chejnikuni mosoj killa qallarikuy fiestasniykichejta, tantakusqaykichejta ima. Chayqa anchataña phiñachiwan, manaña rikuyta munanichu.

¹⁵Qankuna mañakunaykichejpaj makisniykichejta oqharejtiykichej, mana qhawarisqaykichejchu; ashkha kutitapis mañakuychej, noqaqa mana uyarisqaykichejchu, imaraykuchus makisniykichejqa yawarwan may ch'ichichasqa.

¹⁶Llimphuchakuychej, mayllakuychejtaj. Ñawisniymanta chinkarichiychej sajra ruwayniykichejta. Saqeychej sajra ruwayta.

¹⁷Yachaychej allin kajta ruwayta, kallpachakuychej cheqan kajta ruwayta, yanapaychej sarusqa kajta. Wajcha wawapaj cheqanta ruwaychej, viudaman kutikuychej.

¹⁸Señortaj nin: Jamuychej parlasunchej. Juchasniykichejqa may jina pukapis kachunku, rit'i jina yuraj kanqanku; may jina kullipis kachunku, yuraj millma jina kanqanku.

¹⁹Kasukuyta munankichej chayqa, sumaj jallp'aj poqoyninta mikhunkichej.

²⁰Manapuni kasukuyta munankichejchu chayqa, espadawan wañuchisqas kankichej. Kikin Señormin chaytaqa nin.

²¹Sumajta purej llajta, imaraykutaj qhencha warmiman rijch'akunkiri? Ñaupajtaqa tukuy runasniyki allinta ruwaj kanku, cheqantataj kausaj kanku; kunanrí mana jinachu kanku, astawampis runa wañuchis kanku.

²²Qolqeyki q'opaman tukupun, vinoykipis yakuwan chajrusqa.

²³Kamachisojkunataj contraypi sayaykuwanku, suwaspa kausaqesnin kanku. Tukuy rantichikunku qolqewan, mask'ankutaj t'inkata qonankuta. Wajcha wawapaj mana cheqantachu ruwanku, viudaj willakusqantapis mana uyarillankupischu.

²⁴Chayrayku Tukuy Atiyniyojqa, Israelpa yanapajnin Señorqa nin: kutichikusaj enemigosniywan, paykunawantaj pagachikusaj.

²⁵Makiyta watejmanta oqharisaj qampa contraykipi, ruphachisajpuni tukuy q'opaykita, tukuy ch'ichiykimantataj llimphuchasqayki.

²⁶Watejmanta juecesniykeqa ñaupajta jina kanqanku, umallichisojkunapis qallariypi jina kanqanku. Chaymantataj nisonqanku: Cheqan kayniyoj llajta, Señorninman may k'asqasqa llajta, nispa.

²⁷Cheqan kaywan Sión llajtata kacharichisaj, jinallataj chaypi tiyakojkunata, jinallataj noqaman kutirikamojkunatapis.

²⁸Chaywampis phirita ruwasaj contraypi sayajkunata, juchasapastawan. Jinallataj Señorta saqejkunapis tukuchisqas kanqanku.

²⁹Chantá qankunaqa p'enqachikunkichej, encina sach'asta chhikatapuni munakusqaykichejmanta, may huertapichus kusikusqaykichejmantawan.

³⁰Qankunataj kankichej laqhesnin urmarasqa encina sach'a jina, mana qarpasqa huertamantaj rijch'akunkichej.

³¹Kallpayoj kajqa ichhuman tukonqa, ruwasqasnimpis nina phawajman tukonqa, iskaynintaj ujllapi larwarenqanku, nitaj pipis thasnoj kanqachu.