Read Quechua Bolivia DC Bible ISAÍAS 14 Bible Online

ISAÍAS 14 - Quechua Bolivia DC Bible bible

ISAÍAS 14

¹Señorqa Jacobpa ayllunmanta khuyakonqa, israelitastaqa ajllakonqaraj, jallp'ankupitaj watejmanta tiyachenqa. Karu llajtayojkuna paykunaman ujchakonqanku, Jacobpa ayllunwantaj tiyakonqanku.

²Ashkha naciones israelitastaqa yanapanqanku, jallp'ankumantaj pusaponqanku. Chay runastataj israelitasqa Señorpa jallp'ampi kamachisninkupaj jap'enqanku. Chanta israelitasñataj pikunachus ñak'aricherqanku, chaykunata presochanqanku, munayninkupitaj apaykachanqanku, paykunata llakichej kanku chaykunata.

³Israel ayllu, maypachachus Señor samarikuyta qosojtin chay jinata ñak'arisqaykimanta, phutikusqaykimanta, chay jina sinch'i llank'aymanta ima, chaypachaqa, kay jina asikuna palabrasta Babilonia reypa contranta ninki: Qhawariychej ñak'arichejqa imapichus rikhurisqanta, runaykachajqa imaynatachus tukukusqanta.

⁵Señorqa sajra runaspa wajtanan k'aspita p'akirparin, ñak'arichej runaspa tojnuntapis.

⁶Payqa phiñakuyninwan nacionesta jasut'ej, mana sayk'uspataj seq'oj; phiñakuyninwantaj nacionesta ñak'arichej, mana khuyaspa qhatiykachaj.

⁷Kunanqa tukuy runas samarikuypi kashanku, sonqo tiyakuypitaj, kusiywantaj takishanku.

⁸Pino sach'aspis, Libanopi cedro sach'aspis kusikunku, qan wañusqaykimantapacha, manaña pipis k'utoj jamuwaykuñachu, nispa.

⁹Ukhupachapi wañusqaspis qannejta mancharikunku; rijch'arinkutaj qanta taripasunampaj. Tukuy kay pachapi wañusqas kamachejkuna jatarimonqanku. Reyestaj tiyanankumanta sayarikonqanku.

¹⁰Paykunataj qhaparispa nisonqanku: Qampatapis kallpaykeqa pisiyallantaj, noqayku jinallamantaj tukunki.

¹¹Wapu kayniykeqa arpasniykej waqayninwan wañusqakunaj tiyanankuman urmaykamunku. Camaykeqa khuruslla, qhatakunaykipis khuruslla.

¹²Sut'iyay ch'aska, kay jinatachu cielomantaqa urmamunki! Qanqa nacionesta atipaj kanki, kunantaj pampapi wijch'usqa rikhurinki.

¹³Qanqa sonqoykipi nej kanki: Cieloman wicharisaj, Diospa qoyllurkunasninmanta aswan patapi, kamachinaypaj tiyanayta churasaj orqospi, patanejpi, maypichus dioskuna tantakunku chaypi.

¹⁴Phuyus pataman wicharisaj, Patapi kaj Diosmantaj rijch'akusaj, nispa.

¹⁵Astawampis, qanqa wañusqas kashanku chayman wijch'usqa kanki, ukhu ukhupachaman.

¹⁶Pischus rikusojkunaqa t'ukuspa qhawasonqanku, nenqankutaj: Kaychu tukuy mundontinta kharkatichej runaqa? Kaychu tukuy nacionesta manchachej runaqa?

¹⁷Kaychu mundontinta ch'impachata saqej? Kaychu llajtasta ch'inyachej, presostapis mana kacharej?

¹⁸Tukuy nacionesmanta reyesqa sumajta samarikunku, sapa ujninku sepulturasninkupi.

¹⁹Qanrí sepulturaykimanta millay q'opa jina wijch'usqa kanki, sarusqa aya jinapis kawaj jina. Espadawan wañuchisqa runaswan tanta, sepultura ukhuman choqasqa jina.

²⁰Qantaqa mana chay waj reyesta jinachu p'ampasonqanku; llajtaykita chinkachisqaykirayku, runasniykitapis wañuchisqaykirayku. Sajra runaspa mirayninkoqa mana jayk'ajpis yuyarisqachu kanqa.

²¹Wakichiychej wawasninkuta wañuchinaykichejpaj, tatasninku juchallikusqankurayku; amaña oqharikuspa jallp'ata jap'ikunankupaj, nitaj kay pachata llajtaswan junt'achinankupaj.

²²Tukuy Atiyniyoj Señorqa nin: Noqa oqharikusaj paykunaj contrankupi. Noqa Babiloniaj sutinta chinkachisaj, paykunamanta puchojkunata, wawasninkuta, allchhisninkuta ima.

²³Chayta yaku qhochisman tukuchisaj, ch'useqaspa tiyakunankutataj ruwasaj. Chaymantaqa chinkachiy pichanawantaj picharparisaj. Ajinata nin Tukuy Atiyniyoj Señorqa.

²⁴Tukuy Atiyniyoj Señorqa juraspa nin: Cheqamanta imatachus yuyasqayqa junt'akonqapuni, imastachus nisqasniypis ruwakonqapuni.

²⁵Jallp'aypi asiriostaqa chinkachisaj, orqo puntasniypitaj saruykusaj. Aylluyman yugonta churasqanmantataj librasaj, chay jinata ñak'arichiyninkutawan.

²⁶Kaymin chay yuyasqayqa tukuy jallp'aj contrampi. Makeyqa tukuy llajtasta jasut'inampaj wakichisqa kashan.

²⁷Kaytaqa Tukuy Atiyniyoj Señorpuni nin ajina kananta. Chaytaqa mana pipis pantachiyta atinchu. Makenqa oqharisqallapuni kashan, mantaj pipis jark'ayta atinchu.

²⁸Rey Acazpa wañupusqan watapi Isaiasqa kay willayta sut'incharqa: Filistea nación, qanqa ama kusikuychu, ima k'aspiwanchus wajtasqa karqanki chay p'akikojtenqa; imaraykuchus uj katari wañojtenqa waj katari jamonqa chaypa uñantaj phawaj katari kanqa.

³⁰Wajchaspa kuraj wawasninkoqa jallp'asniypi poqojta mikhonqanku, mana imayoj runaspis sonqo junt'asqa kakonqanku. Noqataj runasniykitaqa yarqhaywan wañurachisaj, mashkhachus qhepakonqanku chaykunata.

³¹Filistea llajtas, alqo jina qhapariychej, nanaywan qhapariychej, manchariywan kharkatitiychej, imaraykuchus patanejmanta manchay q'osñi phuyu jina jamusonqachej, manañataj ni ujpis tantakunasniykichejpi qhepakunkichejchu.

³²Nacionesmanta willajkuna jamojtinkoqa ima ninkichejtajri? Sión llajtataqa Señormin ruwarqa. Chayrayku llakisqasnenqa chay llajtapipuni pakakonqanku.