Read Quechua Bolivia DC Bible ISAÍAS 2 Bible Online

ISAÍAS 2 - Quechua Bolivia DC Bible bible

ISAÍAS 2

¹Amospa wawan Isaiasqa, kayta mosqoypi jina rikorqa Judamanta, Jerusalenmantawan:

²Qhepa p'unchaykunapi kay jina kanqa, Señorpa wasin lomaqa tukuy orqosmanta aswan patapi sayachisqa kanqa, oqharisqataj kanqa tukuy orqosmanta aswan pataman. Tukuy nacionestaj chaymampuni jamonqanku.

³Ashkha runakuna jamuspa nenqanku: Jakuchej, Señorpa lomanman wicharinachej, Jacobpa Diosnimpa wasinman, pay ñankunasninmanta yachachinawanchejpaj, chaki ñankunasnimpi purinanchejpaj, imaraykuchus leyqa Sionmanta llojsenqa, Señorpa palabrampis Jerusalenmanta.

⁴Señortaj nacionesta juzganqa, ashkha runastataj cheqanchanqa. Espadasninkuta arado rejasman tukuchenqanku, fierro choqanasninkumanta hocesta ruwakaponqanku. Nitaj mayqen naciompis maqanakunasninta waj naciompa contranta wakichikonqachu, nitaj ch'ajwapajpis oqharikonqachu.

⁵Jakuchej, Jacobpa ayllun, Señorpa k'anchaynimpi purinachej.

⁶Qanqa, Señor, Jacobpa ayllun runasniykita saqerparinki. Jallp'ayki junt'a kashan inti llojsimuymanta kaj yatiriswan; jinallataj qoyllurkunamanta yachajkunawan, filisteos jina. Waj llajtayojkunawantaj tratosta ruwakunku.

⁷Jallp'ankoqa qoriwan, qolqewan junt'a kashan, waqaychasninkupis mana tukukoj. Jinallataj chay jallp'apeqa junt'a kashan caballos, imaymana qhatatina carros ima.

⁸Chantá lantiswan junt'allataj kashan, runasqa ima lantistachus ruwasqasninkuta yupaychanku, kikin makisninkoj ruwasqasninta.

⁹Chaykunaj ñaupaqempi runasqa pisichakunku, khuyay khuyaytataj qharispis qhawaykachanku; chayrayku paykunataqa ama perdonaychu.

¹⁰Chhankaman sat'iykukonqanku, jallp'a ukhumantaj pakaykukonqanku, Señorpa may jina kayninmanta, jatun kaynimpa lliphipiyninmantawan.

¹¹Jatunmanta qhawaykachayninkoqa k'umuykuchisqa kanqa, runaykachayninkutaj pampaman urmasqa kanqa. Chay p'unchaypeqa Señorlla jatunchasqa kanqa.

¹²Chaypachaqa Tukuy Atiyniyoj Señorpa p'unchaynin jamonqa, runaykachajkunaj contrampi, jatunmanta qhawaykachajkunaj contrampi, may kasqankuta yuyakojkunaj contrampi, chinkachisqa kanampaj;

¹³Libanomanta tukuy patakama oqharisqas cedrospa contrampi, chayri Basanmanta encina nisqa sach'aspa contrampi;

¹⁴Jatun orqospa contrampi, oqharisqa lomaspa contrampi;

¹⁵tukuy jatun torrespa contrampi, sinch'i perqaspa contrampi;

¹⁶Tarsismanta tukuy buquespa contrampi, ashkha qhatunapa imasniyoj barcospa contrampi ima.

¹⁷Runaj wapuykachaynenqa k'umuykuchisqa, runaj machu machu kaynenqa urmachisqa kanqa. Chay p'unchaypeqa Señorlla jatunchasqa kanqa.

¹⁸Lantistaj chinkachisqas kanqanku.

¹⁹Chanka jusk'usman sat'iykukonqanku, jallp'aj lajesninman lajrasninman ima, Señorpa may jina jatun kayninmanta, jatun kaynimpa lliphipiyninmantawan, jallp'a kharkatiychej jamojtin.

²⁰Chay p'unchaykunapi runasqa, qorimanta, qolqemanta ima yupaychanankupaj ruwakusqanku lantista, juk'uchasman, ch'iñisman ima wijch'onqanku.

²¹Sat'ikonqanku qaqa jusk'usman, chhanka jusk'usman, pakakuspa Señorpa may jina jatun kayninmanta, jatun kaynimpa lliphipiyninmanta ima, jallp'ata kharkatichej jamojtin.

²²Ama runamanta dakuychejchu. Payqa senqaj samaynillan. Imapajtaj pay allin kasqari?