Read Quechua Bolivia DC Bible ISAÍAS 23 Bible Online

ISAÍAS 23 - Quechua Bolivia DC Bible bible

ISAÍAS 23

¹Tiroj contrampi willay. Tarsispi kajkuna barcos, waqaychej, imaraykuchus Tiroqa thuñisqa mana uj wasiyoj. Chayrayku ni mayman yaykunapaj kanchu. Quitim jallp'amantapacha chay imastaqa yachachimunku.

²Tiropi kaj runasqa ch'inlla kaychej, jinallataj Sidonmanta kaj qolqeta mask'ajkunapis. Paykunaj kamachisninku mar qochata chimpasharqanku, yaku qhallajkunaj patanta pasaspa.

³Mikhunankupajqa karqa chay chajrasninkumanta. Chaytaj wiñan Nilo mayu yakuwan. Chaypi poqoj chajraswantaj qhapajyaj kanku. Waj nacionesmampis vendej aparqanku.

⁴Sidón llajta p'enqakuy ari kunanqa, mar qochaqa jark'ajnin, kunanqa niy: Ni mayk'aj noqaqa wawastapis onqoj warmej nanayninwan jap'ichikojchu kani, nitaj wawatapis paqarichinichu. Manaña wayna wawasniy uywanaypaj kanchu, nitaj warmi wawasniypis uywanaypaj kanchu.

⁵Egiptomanta kajkuna, Tiro llajta urmasqanta yachaspa mayta llakikonqanku.

⁶Tarsiskama riychej, mar qocha cantospi tiyakojkuna, waqamuychej.

⁷Kaychu mayta kusikoj unayniyoj llajtaykichej? Kaychu runasninta tiyakunankupaj karuman kachaj llajta?

⁸Pitaj kayta unancharqa Tiroj contrantari? Chay llajtaqa reyespa llajtan, qhatojkunasnimpis kamachejkuna karqanku, vendejkunasnimpis chay jallp'api sumaj runaspaj qhawasqas karqanku.

⁹Kaytaqa Tukuy Atiyniyoj Señormin unancharqa, mayta machu machuykachasqankuta p'enqaypi rikhurichinampaj, jinallataj jallp'a patapi may atiyniyojkunatapis.

¹⁰Tarsis llajta, jallp'ata llank'ayta qallariy, imaraykuchus manaña barco ruwanayki kanchu.

¹¹Señorqa mar qocha pataman makinta oqharerqa, chaymantataj tukuy nacionesta kharkaticherqa; Canaampa sumaj jark'achisqa perqasnintapis thuñinankuta kamacherqa.

¹²Chantá nerqa: Manaña kusikunkichu astawan may ñak'ariypi jap'isqa Sidompa ususin. Sayariytawan Quitimman chimpay, chaypipis qanqa manapuni samarikuyta tarinkichu.

¹³Caldeospa jallp'ankuta qhawariy. Kay llajtaqa mana karqachu. Chay llajtataqa Asirios sayacherqanku ch'innejpi tiyakojkunapaj. Paykuna perqasninta perqarqanku; chaymantaqa palaciosninta ruwarqanku, Chaymantaqa paykunallataj thuñispa urmacherqanku.

¹⁴Tarsismanta kaj barcos waqaychej kunanqa, imaraykuchus pakakunaykichejqa thuñisqañamin.

¹⁵Chaypacha Tiro llajtaqa qanchis chunka watasta qonqasqa kanqa, uj reypaj kausanan tiempota. Chay qanchis chunka watas qhepata Tiro llajtaqa sajra purej warmej takiynin pasanqa.

¹⁶Qonqarparisqa sajra purej warmi, arpaykita oqhariy. Llajtata muyoj sumajta tocay, sumajtataj takiy, jinamanta yuyarisqa kanaykipaj.

¹⁷Chay qanchis chunka wata qhepata Tiro llajtataqa Señor watukonqa. Watejmantataj vendekuyta qallarenqa, kay jallp'a patapi kaj tukuy nacioneswantaj qhenchachakonqa.

¹⁸Chay vendekusqanmanta ganasqasnenqa Señorpaj kanqa. Chayqa mana waqaychasqachu kanqa, nitaj jallch'asqachu kanqa, manachayqa, Señorpaj kanqa, paykuna sajsakunankukama mikhunankupaj, sumajtataj p'achallikunankupaj.