Read Quechua Bolivia DC Bible ISAÍAS 24 Bible Online

ISAÍAS 24 - Quechua Bolivia DC Bible bible

ISAÍAS 24

¹Señorqa kay jallp'ata ch'usajllata, q'arallatataj saqenqa. Jallp'a patataj tijranqa, chaypi tiyakojkunatataj ch'eqerachenqa.

²Chay jinaqa tukuypaj kanqa llajtapi tiyakojkunapaj, sacerdotepaj, kamachipaj, patrompaj, warmi kamachipaj, patronapaj, rantikojpaj; jinataj vendejpaj, qolqeta manojpaj, manukojpajwan, reditoyojta manojpaj, reditoyojta manukojpajwan.

³Jallp'aqa ch'usajpacha kanqa. Tukuy iman kajta suwanqanku. Chaytaqa Señorpuni nin.

⁴Jallp'aqa ch'akipun, maytataj ch'akishan. Kay pachaqa onqospa urmasqan kashan. Janaj pachawan kay pachawanqa llakiywan junt'a kashan.

⁵Jallp'aqa chaypi tiyakojkunanejta ch'ichichasqa; imaraykuchus leyesta p'akinku, kamachisqasta mana kasunkuchu, wiñaypaj ruwasqa tratota p'akinku.

⁶Chayrayku maldicionqa jallp'ata tukuchin, chaypi tiyakojkunapis jasut'ichikunku. Chaynejta jallp'a patapi tiyakojkunapis pisiyachisqas kanqanku. Jinamanta pisillaña qhepakonqanku.

⁷Vinoqa pisiyan, uva sach'aspis onqoyta jap'in, tukuy kusisqa kajkunapis llakiywan junt'a kanku.

⁸Cajastawan, arpastawan tocaspa kusikojkunaqa ch'inyaponqanku, kausaqesninkuwan mayta qhollpikuspa kusikojkunapis ch'inyapunku.

⁹Vinotaqa manaña takispachu ujyanqanku. Chay ujyanaqa jayaman tukonqa.

¹⁰Chay tukuy ima ch'ichi imaswan llajtaqa thuñisqa kashan, tukuy wasispis wisq'akun ama pipis yaykunampaj.

¹¹Runasqa tukuy callespi vinomanta jina waqashanku. Tukuy kusiyninku llakiyman tukun. Chay kusiyninkoqa jallp'a patamanta qhechusqa kanqa.

¹²Llajtaqa raqayman tukun, punkuspis sinch'i phirisqas.

¹³Chay imasqa ajinapuni kanqa kay jallp'a patapi tukuy nacionespi, imaynatachus olivo poqoyta k'aspiwan wajtanchej ajina, chayri, imaynatachus cosecha pasayta uvas puchojkunata chajmanku, ajinata.

¹⁴Chaykunaqa manchay kusiywan jatunmanta qhaparispa takenqanku, mar qochaj cantosninmantapacha Señorpa jatun kayninmanta.

¹⁵Chayrayku inti llojsimuy jallp'aspi Señorta jatunchaychej ari. Israelpa Señor Diosnimpa sutinta tukuy mar qocha cantospi jatunchaychej.

¹⁶Kay mundoj k'uchusninmantapacha takejta uyariyku: Cheqanchajqa jatunchasqa kachun, nispa. Noqataj nerqani: Ay, kay llakiy kasqaymanta. Ay, kay llakiy kasqaymanta! Wasanchajkunaqa mana sayk'uspa wasanchanku.

¹⁷Jallp'a patapi tiyakoj runa, qampa pataykipiña kashan manchachikuyniyki, t'oqoman urmaykunayki, jarap'asqa kanayki ima.

¹⁸Pichus manchachikuymanta ayqejqa t'oqoman urmaykonqa. Chay t'oqomanta llojsimojtaj tojllapi preso rikhurenqa. Janaj pacha ventanasqa kicharikonqa, kay jallp'ataj tukuynin ikhakonqa.

¹⁹Kay jallp'aqa manchaytapuni kharkatitenqa, lajrakonqataj, chay chhikatapuni thalakusqampitaj t'unakonqa.

²⁰Jallp'aqa uj machasqa runa jina, chankaykachanqa, ch'ujlla jina kaynejman jaqaynejman wajtaykachakonqa. Juchasnenqa manchaytapuni llasaykun, urmachenqataj manañataj ujtawan sayarikonqankuchu.

²¹Chaypacha Señorqa janaj pachapi atiyniyojkunata jasut'enqa; jinallataj kay jallp'a patapi kaj reykunatapis.

²²Ujllaman tantaykuspa calabozoman wisq'aykonqa, carcelpitaj wisq'asqas kanqanku, unaymanta orqhomuspataj jasut'enqa.

²³Jerusalempi Sión orqopi Tukuy Atiyniyoj Señor kamachiyta qallarejtin, intiwan killawan laqhayaykonqanku. Chay llajtamanta kurajkunataj Señorpa atiyninta rikonqanku.