Read Quechua Bolivia DC Bible ISAÍAS 26 Bible Online

ISAÍAS 26 - Quechua Bolivia DC Bible bible

ISAÍAS 26

¹Chay p'unchaypi kay takiyta Judá jallp'api takenqanku: Kunanqa sumaj jark'achisqa llajta tiyapuwayku; chaypi pakakunaykupaj iskay perqaswan muyuykucherqa.

²Punkusta kichariychej chayninta cheqan runas yaykunampaj, imaraykuchus paykunaqa cheqan sonqoyoj kanku.

³Pichus qampi sonqo churajtaqa, sonqo tiyakuypi kachiy, imaraykuchus payqa qampipuni atienekun.

⁴Wiñaypaj Señorllapipuni atienekuychej, imaraykuchus payllamin wiñaypaj pakakunanchejqa.

⁵Payqa mayta runaykachajkunata urmachin, mayta runaykachaj llajtata k'umuykachachin, ajinata urmachiytawan jallp'aman tukuchin.

⁶Ajinamanta tukuy wajchas, llakisqa kajkunawan ima sarunankupaj.

⁷Cheqan runaj ñannenqa cheqampuni; allinta ruwaj kaj runaj ñannintaqa qanlla allinyachinki.

⁸Señor kamachisqasniykej ñannimpi yachakuyku allin kasqaykuta. Noqaykoj sonqoykoqa qanllapi yuyan.

⁹Ch'isenqa tukuy sonqo qanllapi yuyani, tukuy munakuyniywan sut'iyayta mask'ayki. Qan kay pachapi tukuy imata cheqanchajtiykeqa, jallp'a patapi kaj runas yachanqanku imachus cheqan kasqanta.

¹⁰Sajra runasta khuyanki chaypis, paykunaqa mana yachankuchu imachus cheqan kajtaqa; allinta ruwaj runaspa jallp'ampi paykunaqa sajra imasta ruwanku. Paykunaqa Señorqa jatun kayninta mana reparankuchu.

¹¹Señor, qanqa ñapis jasut'inaykipajña kashanki, paykunataj mana reparakunkuchu. Aylluykita munakusqaykita rikuspa p'enqaypi rikhurenqanku. K'ajaj phiñakuyniykej larwaynin enemigosniykita tukukuchichun.

¹²Señora, qanlla sonqo tiyakuytaqa qowasqayku; qanlla tukuy ruwasqasniykuta, noqaykupaj ruwanki.

¹³Señor Diosniyku, waj runaslla qan kamachinawaykumantaqa munayninkuman jina kamachiwayku; chaywampis qan Señornillaykumanta yuyarikuyku.

¹⁴Paykunaqa wañusqas kanku. Manaña ujtawan kausankumanchu. Paykunaqa llanthu jina kanku. Manaña ujtawan kausarimunkumanchu. Qanqa jasut'inki, pampachanki, paykunamanta yuyarikunatapis chinkachinki.

¹⁵Qanqa, Señor, chay nacionta jatunyachinki; qampa sutiyki jatunchasqa kanampaj jatunyachinki. Chay jallp'aj mojonesnintapis jatunman tukuchinki.

¹⁶Chay jina llakiypi tarikuspa qanta mask'asorqayku, Señor; ajinata jasut'iwajtiyki astawan mañakorqayku.

¹⁷Imaynatachus wijsayoj warmej onqokuynin chayamojtin, mayta q'ewiykachakuspa qhaparikuspataj waqakun, ajinata Señor noqaykupis ñaupaqeykipi waqayku.

¹⁸Wijsallikuyku, nanaywan onqoj warmiman jina tukuyku. Chaywampis wayrallata wachayku; chaywanqa chay llajtata mana libraykuchu, manataj kay pachapi tiyajkunapis kanqañachu.

¹⁹Chaywampis, wañusqasniykeqa kausarimonqanku, ayasninkupis kausarimponqanku. Jallp'a ukhupi puñojkunaqa rijch'arimonqanku, kusiywantaj mayta qhaparispa kusikonqanku. Qanqa k'anchayta chhulla parata jina apachimunki, chanta wañusqasqa jallp'a ukhumanta sayarimonqanku.

²⁰Kunanqa, ayllúy, riy ari, wasiykiman yaykuy, punkuykitataj wisq'aykakamuy. Chaypi uj pisita pakakuy, Señorpa k'ajaj phiñakuynin tukukunankama.

²¹Qhaway, Señorqa tiyakunanmanta llojsimonqa, jallp'a patapi tiyakojkuna paypa contranta juchallejkunata jasut'inampaj. Jallp'aqa manaña pakayta atenqachu yawar jich'asqata wañuchisqa kajkunatawan.