Read Quechua Bolivia DC Bible ISAÍAS 27 Bible Online

ISAÍAS 27 - Quechua Bolivia DC Bible bible

ISAÍAS 27

¹Chay p'unchaypi Señorqa, manchay atiyniyoj espadanwan manchayta phawaj Leviatán katarita jasut'enqa, manchayta ch'aukiyaj Leviatán katarita. Chantá mar qochapi kashaj dragontapis wañuchenqa.

²Chaypacha Señorqa nenqa: Sumaj misk'i kaj uva huertamanta takirikuychej.

³Noqa Señor waqaychani, noqa sapa kuti qarpani. Tuta p'unchay waqaychani, ama pipis imananampaj.

⁴Manaña phiñasqachu kani. Sichus chaypi khishkas, chayri chaypi qhoras kanman chayqa, noqa saruspa q'olachimusaj.

⁵Sichus jark'asunayta munanki chayqa, noqawan allinyakunachej. Arí, noqawan allinyakunachej.

⁶Qhepa p'unchaykunaman Jacobqa sumajta saphinchakonqa, ajinamanta Israelqa ch'illchispa t'ikanqa, chay poqoynintaj mundontinman junt'aykonqa.

⁷Diosqa mana Israeltaqa jasut'inchu, imaynatachus ñak'arichejkunasninta jasut'ej ajinataqa. Manataj israelitastaqa wañuchinchu, imaynatachus paykunata wañuchej kanku ajinataqa.

⁸Diosqa jasut'in ayllunta karu llajtaman apachispa. Payqa apachin wayrawan jina, inti llojsimuymanta sinch'i wayraway jina.

⁹Ajinamanta Jacobpa millay juchasnenqa perdonasqa kanqa. Chaytaj ruwasqa kanqa kay jinata ruwanan kajtin: Tukuy altaresninta cal rumista jina jallp'aman tukuchinan kajtin, amaña yupaychana k'ulluspis kachunchu, amataj intiman rijch'akoj lantispis.

¹⁰Chay sumaj jark'achisqa llajtaqa ch'impacha kanqa, ch'usajpachataj mana imayoj, nitaj runayoj. Chayqa kanqa wakasta michinallapajña. Chay uywas chaypi sach'a ramasta mikhonqanku, samarikonqankutaj.

¹¹Sach'aj ramasnin ch'akipojtin p'akiranqanku; warmistaj pallaytawan ninaman enqhanqanku. Chay runasqa mana imata yachankuchu. Chayrayku, paykunata Ruwajqa mana paykunamanta khuyakonqachu, manataj sonqontapis nanachikonqachu ruwajnin jina.

¹²Jaqay p'unchaypi Señorqa erata jina trillanqa Eufrates mayumanta, Egipto mayukama. Qankuna Israelpa wawasnintaj ujmanta tantasqas kankichej.

¹³Chaypacha putututa jatunmanta waqachenqanku, chayta uyariytawan Asiriaman wijch'usqa kajkuna jamonqanku, jinallataj Egiptopi kajkunapis. Chayamuspataj Jerusalempi Santo orqopi Señorta yupaychanqanku.