Read Quechua Bolivia DC Bible ISAÍAS 28 Bible Online

ISAÍAS 28 - Quechua Bolivia DC Bible bible

ISAÍAS 28

¹Ay, Samaria, machasqa llajta, Efraimpa runaykachajnin pillun qawisqa t'ikawan jina k'achanchasqa, sumaj valle jallp'aj patampi kaj, vinoj atipasqan llajta!

²Señorpa kachamusqan kallpasapa runa tiyan; chayqa chejchi paraj sonaynin jina, uj sinch'i wayra jina, llojlla para jina, ashkha yaku llump'imoj jinataj; makinwan jap'ispataj pampaman wijch'onqa.

³Efraimpa pillusnin machasqa machu machuykachaj runasqa chakiwan sarusqas kanqanku.

⁴Chay valle patapi kaj, qawisqa t'ikaswan kachanchasqa kajqa, higospa ñaupaj poqoynin jina kanqa. Chayta rikojqa, makinwan p'itiytawan mikhuykun.

⁵Chaypacha Tukuy Atiyniyoj Señorqa, puchoj ayllun israelitaspaj may sumaj lliphipishaj k'achanchasqa pillu jina kanqa.

⁶Jinallataj cheqanchajkunata yuyaychanqa, llajtata jark'aj soldadostapis kallpachanqa.

⁷Kaykunapis vinowan machaykuspa pantallarqankutaj, machana ujyanawan machaykuspa chankaykachanku, sacerdoteswan, profetaswanqa machaykuspa yuyayninkuta chinkachinku; chaymantataj aswan machachikoj ujyanasta ujyanku, imatachus mosqoypi jina rikusqankutataj pantasqata rikunku. Allinta cheqanchananku kashajtimpis paykunaqa machasqas kashanku.

⁸Mesasqa millay ajtuykukusqasninkuwan junt'a kashan, jinamanta mana uj cheqallapis llimphu kanchu.

⁹Paykunaqa noqamanta parlanku: Pimantaj kunanqa imastapis yachachenqari, pimantaj yachaykunamanta yachachenqari, ñuñoj wawasman jina?

¹⁰Palabramanta palabra, watejmanta watej, pisimanta pisi yachachiwayku.

¹¹Mana kasukojtinkoqa khaku parlajkunaj parlaynimpi, mana rejsisqa parlaypirajtaj Diosqa kay aylluman yachachenqa.

¹²Paykunaman Diosqa nisqañaqa: Kaypi samarikoyqa kashan; sayk'usqa kajqa samarikuchun. Paykunataj mana kasorqankuchu.

¹³Chayrayku Señorqa juch'uy wawasman jina parlanqa, palabramanta palabra, watejmanta watej, pisimanta pisi. Ajinata purishaspataj wasamanta wijch'ukonqanku, chaypitaj nanachikonqanku, ch'ipaman urmaspataj, presos qhepakonqanku.

¹⁴Chayrayku, uyariychej Señorpa palabranta, machu runas, Jerusalenta kamachejkuna.

¹⁵Qankunaqa ninkichej: Uj tratota wañuywan ruwayku, wañusqaspa tiyakunankuwan tratoyoj kayku; manchay jasut'i jamojtenqa mana chayamuwasqaykuchu. Chay pakakuyniykutaqa llullakuypi mask'ayku, jinallataj ch'aukiyaypi ima.

¹⁶Chayrayku Señorqa nin: Sión orqopi uj rumita sayachisaj. Chaytaj uj sumaj ajllasqa rumi, k'acha esquinasniyoj, wasi cimientopaj sumaj rumi. Pichus chaypi atienekojqa mana kuyurenqachu.

¹⁷Cheqan kajtaqa plomadata jina churasaj, maychus kajtataj hilota jina churasaj. Llullakojpa pakakunanta chejchi chinkachenqa, chay pakakunaykichej cheqatataj yakus apanqanku.

¹⁸Wañuywan trato ruwasqaykichejqa chinkachisqa kanqa, wañusqakunaj tiyakunanwan tratoyoj kasqaykichejpis mana sayanqachu. Manchayta jasut'iytaj jamonqapacha, qankunataqa p'ampaykusonqachej.

¹⁹Sapa kuti jamojtintaj, qankunaqa apasqas kankichej; chay jinata ch'isin paqarin jamonqa, chayta uyarispallaraj runasqa manchayta kharkatitenqanku.

²⁰Chayqa kanqa uj juch'uy camapi winkuykusunman jina, uj juch'uy qhatanawampis qhatakusunman jinataj.

²¹Señorqa Perazim orqopi jinamin ruwanqa, Gabaón vallepi jinmayta phiñakonqa, imachus ruwanan kajta ruwanampaj, mana jayk'aj ruwasqanta, mana rejsisqa ruwananta ruwanampaj.

²²Kunanqa ama alqochakuychejñachu ari. Pajtataj chay imawanchus watasqas kashankichej chay astawan mat'iykusunkichejman. Noqaqa uyarini Tukuy Atiyniyoj Señorqa kay tukuy llajtata chinkachinanta.

²³Sumajta uyariychej. Imatachus nisqayta allinta uyariwaychej. Palabrasniyta allinta uyariychej.

²⁴Tarpunampaj jallp'ata llank'ajqa, tukuy p'unchaynintinchu llank'anqa? Chay jatuchaj k'urpasta wajtaspa, llamp'uchaspatajchu kanqa?

²⁵Ajinata jallp'ata sumajta wakichiytawan, manachu chayman anista, chayri cominosta t'akan, chantá surk'asta ruwaspa chayman trigota t'akan, cantosninmantaj cebadata avenatawan?

²⁶Diosmin chayta yachachin imaynatachus ruwananta.

²⁷Anisqa mana trigo jinachu trillakun, cominotapis mana carretaj ruedanwanqa saruchinachu; manachayqa anista cominotawanqa uj k'aspiwan wataspa oqharina.

²⁸Trigotaqa trillaspa oqharina, manataj unaytachu trillana, manataj carretaj ruedasnimpis unaytachu saronqa, jinamanta granoqa t'akasqa kanqa mana ñut'uspalla.

²⁹Kay jinasta ruwanaqa Tukuy Atiyniyoj Señormanta llojsimun, pay yuyaychaynenqa t'ukunapaj, yachaynintaj jatun.