Read Quechua Bolivia DC Bible ISAÍAS 30 Bible Online

ISAÍAS 30 - Quechua Bolivia DC Bible bible

ISAÍAS 30

¹Señorqa ajinata nin: Ay, mana kasukoj wawasniymanta. Paykunaqa imatapis wakichikunku mana tapuwaspalla. Paykunaqa tratota ruwakunku mana noqaj yuyaychasqallay. Chay jinamanta juchamanta jucha yapakunku.

²Usqhay usqhayta Egiptoman rinku mana noqata tapuriwaspalla, faraonwan yanapachikuyta munaspa, Egiptoj ojllaynimpi pakasqa kayta munaspa.

³Faraompaj kallpanman atienekusqaykichejtaj p'enqaypi rikhurichisonqachej, Egiptoj ojllaynimpi pakakuyta munasqaykichejtaj k'umuykachanaykichejpaj kanqa.

⁴Qankunamanta parlamojkunata, Zoán llajtaman, Hanes llajtamanwan kachajtiykichejpis.

⁵Tukuyninku p'enqaypi rikhurenqanku chay mana kaj nacionespi atienekuspa. Chayqa mana yapanqachu, manataj ima allin kajtapis qonqachu; mana chayqa paykunapaj llakiylla, p'enqaylla kanqa.

⁶Neguevpi animalesmanta sut'inchay: Llakiy ñak'ariy jallp'anejta, maypichus leoneslla imaymana phawaj kataris ima tiyanku, chaynejta tukuy kapuyninkuta, qhapajyayninkutawan burrospi, camellospi ima apanku mana yanapayta atej Egipto llajtaman.

⁷Cheqamanta Egiptoj yanapaynenqa qhasi mana kaj. Chayrayku noqaqa chay llajtata sutichani: Mana kaj millay khuru, nispa.

⁸Kunanqa, jamuy, kay mosqoypi jina rikusqayki palabrasta uj qelqanaman qelqay, qhepa p'unchaykunapaj kanampaj, chay nisqasqa wiñaypaj kanampaj.

⁹Kay runasqa mana kasukoj kanku llulla wawas jina. Diospa kamachisqanta mana uyariyta munajkuna wawas jina kanku.

¹⁰Paykunaqa sut'inchajkunata ninku: Ama qankunaqa mosqoypi jina rikuychejchu, nispa. Chaymanta profetastañataj ninku: Qankunaqa ama cheqan kajtaqa sut'inchawaykuchu; k'acha palabrasllata niwayku, llulla imasllatataj sut'inchawayku.

¹¹Ñanmanta pantakuychej, cheqan chaki ñanta saqeychej. Israelpa Santo Diosninmantataj amaña uyarichiwaykuchu.

¹²Chayrayku Israelpa Santo Diosnenqa nin: Qankunaqa kay k'acha palabrasta qhesachankichej. Qankunaqa mana allin ruwaykunaman, sajra ruwaykunaman ima atienekunkichej. Chay sajra imasman sayasqa qankunaqa kankichej.

¹³Chayrayku qankunaj juchaykichejqa, uj alto thanta perqa lajrasqa urmashajmanña rijch'akun. Chay perqaqa mana yuyasqallamanta urmaykonqa.

¹⁴Chayqa t'unasqa kanqa uj t'uru qeru jina, mana khuyaspa t'unasqa ajina. Chay jinatapuni p'akikojtenqa mana uj chhikan k'anallallapis puchonqachu, q'onchamanta ninata orqhonallapajpis, nitaj allinchu yakuta wisinallapajpis.

¹⁵Israelpa Santo Señor Diosnenqa ajinata nin: Kutirimuwaspa, tukuy sonqo samarikuspataj qankunaqa salvo kankichej. Ajinata ni imamanta llakiyniyoj, tukuy sonqo atienekuspa kallpayoj kankichej. Qankunataj chaytaqa mana munarqankichejchu.

¹⁶Mana chayqa qankunaqa nerqankichej: Mana, astawanqa caballospi ayqesqayku. Ayqellaychej ari. Chaymanta nillarqankichejtaj: Sumajta correj carretasman wicharisqayku. Arí, qhatisojkunaqa usqhayllata jap'irparisonqachej.

¹⁷Uj enemigota rikuspalla waranqa runas ayqekunkichej, phishqa enemigosta rikuytawan tukuyniykichej ayqekunkichej, uj orqopi sapan sayashaj k'aspi jinalla qhepakunaykichejkama, chayrí uj lomapi uj wiphayla jina qhepakunaykichejkama.

¹⁸Chaywampis, Señorqa qankunaman khuyakuyninta rikuchinasuykichejpaj suyashasunkichej. Chayrayku, payqa mayta suyashasunkichej munakuyninta rikuchisunaykichejpaj. Señorqa cheqanta ruwajmin. Paypi atienekojqa kusikuyniyojmin.

¹⁹Jerusalempi tiyakoj Sión llajta, manaña astawan waqankichu. Khuyakoj Señorqa waqasqaykita uyarispa khuyakusonqa, nisqaykita uyarispataj kutichisonqapacha.

²⁰Señorqa ñak'arina t'antata, jinallataj uj llakiy yakuta qoshajtimpis, yachachejniyki Señorqa mana jayk'ajpis pakakusonqachu, mana chayqa kikin ñawisniykiwan rikunki.

²¹Chantaqa wasaykipi kay palabrasta nishajta uyarinki: Kaymin cheqan ñanqa; chayninta riy, ama pantaychu pañaman, nitaj lloq'emampis.

²²Chaymantaqa qhesachanki qolqemanta lantisniykita, jinallataj qoriwan lluchhisqa lantisniykitapis. Qanqa chaymanta millayta jina qhawanki, uj q'opata jinataj, ninkitaj llojsiy jawaman, nispa.

²³Señorqa chajrasniykipaj parachimonqa, jallp'aman tarpojtiykikama. Jallp'ataj tarpojtiykikama trigota sumajta poqochenqa. Chaypacha wakasniykeqa sumaj pasto pampaspi michisqa kanqanku.

²⁴Chaypacha llank'aj wakasniyki, burrosniyki ima, sumaj llimphu pastota mikhonqanku.

²⁵Maypachachus manchay wañuchinakuy p'unchay chayamonqa, torrespis urmaranqanku chaypacha, jatuchaj orqospi, juch'uy lomaspi ima, yakusqa mayus jina phajcharimonqanku.

²⁶Chaypacha, killaj k'anchaynenqa intej k'anchaynin jina kanqa. Inteqa chay k'anchayninmanta qanchis kutitawan jina k'anchanqa, qanchis intispis ujllapi k'anchamushanman jina. Chaypacha Señorqa ayllumpa nanasqasninta jampenqa, mayqenkunatachus payllataj nanaykucherqa.

²⁷Señorqa pay kikin karumantapacha jamun; uyanqa nina larway imatapis ruphaykoj jina; simimpis manchay phiñakuywan junt'a kashan; qalluntaj q'olaykoj nina jina kashan.

²⁸Paypa samaynenqa uj yaku mayu llump'irishaj jina, kunkakama chayaj. Payqa nacionesta suysunampaj jamun, tukuy nacionespa simisninkuman pantachej frenosta churanampaj ima.

²⁹Qankunapajqa takiykuna kanqa jatun fiesta ch'isipi jina. Sonqoykichejqa kusisqa kanqa, qenata tocarispa, israelitaspa pakakunan Señorpa orqonman rejpata jina.

³⁰Señorqa jatunmanta parlasqanta uyarichenqa, makimpa sajmasqanta rikuchenqa, manchay phiñasqa kayninta rikuchispa, manchayta q'olarparej ninawan, llojlla parawan, manchay muyoj wayrawan, jatuchaj rumi jina chejchiwan ima.

³¹Señorpa parlasqanta uyarispa, jasut'inta jap'ispa ima Asiriaqa manchachikuywan kharkatitenqa.

³²Asiriata sapa seq'ojtin, cajaswan arpaswan sonanqanku. Ajinata Señorqa manchay ch'ajwata ruwaspa paykunawan maqanakonqa.

³³Unaymantapacha, Asiriapaj, reynimpajwan ñak'arina cheqa wakichisqa kashan manchay jatun, ukhutaj. Chay ruphachinaqa ashkha llant'ayoj ninayoj ima kashan. Chaymantaj Señorqa azufre mayuta jina samayninwan jap'iykuchenqa.