Read Quechua Bolivia DC Bible ISAÍAS 32 Bible Online

ISAÍAS 32 - Quechua Bolivia DC Bible bible

ISAÍAS 32

¹Uj rey kanqa cheqanta kamachej, kurajkunapis tukuy imata cheqanta kamachenqanku.

²Chay sapa ujninku kanqanku wayramanta pakakunapaj jina, llojlla para wayramanta pakakunapaj; ch'aki jallp'api qarpanapaj larq'as jina; ch'in pampapi jatun chhankaj llanthun jina.

³Rikojkunaj ñawisnenqa mana chharpuyanqachu, uyarejkunaj ningrisninkupis sumajta uyarenqanku.

⁴Wampu runasqa sumajta yachaqakuyta munanqanku; khakuta parlajkunapis apurata, sumaj sut'ita parlanqanku.

⁵Uj wampu runataqa mana sumaj runa nenqankuchu, nitaj ch'aukiyaj runatapis sumaj runapaj qhawanqankuchu.

⁶Wampu runaqa sonserasllata parlan, yuyaynimpi sajra imasta wakichin; mana allinta ruwayllata mask'an. Señorpa contranta llullasllata parlan; yarqhasqa kajtaqa mana imayojta ch'usajllata kacharpayan, ch'akichikojmampis mana yakuta jaywarinchu.

⁷Ch'auka runaqa mañasniyoj, llullakuspa ch'aukiyayta wakichin, llullakuykunawan wajcha runasta ch'aukiyanampaj, wajcha runa cheqan kajta mañajtin.

⁸K'acha runaqa k'acha imastapuni ruwayta yuyan, jinamanta k'acha ruwanastapuni ruwan.

⁹Qankuna, mana imata ruwaspa chukoj warmis, uyariwaychej kay nisqasuyta. Qhella sipaskuna, uyariwaychej kay palabrasniyta.

¹⁰Qankunaqa mana imamanta llakiyniyoj kashankichej; kay uj pisi watamantawan mancharikunkichej, imaraykuchus mikhunaykichejqa tukukaponqa, manaña uvaspis poqonqañachu.

¹¹Qankuna, mana imata ruwaspa chukoj warmis, manchachikuychej ari; mana imamanta llakiyniyoj warmis, kharkatiychej ari. Chay p'achasniykichejta lluch'ukuychej. Qhashqa p'achasta churakuychej llakisqa kasqaykichejta rikuchinaykichejpaj.

¹²Llakiyniyoj kasqaykichejta rikuchispa pechoykichejta takakuspa waqaychej, sumaj poqoj jallp'asniykichejmanta, uva huertasniykichejmantawan.

¹³Llajtaypeqa khishkaswan qhasi qhorasllawan wiñanku, may wasispischus sumaj kusiykuna karqa, chay kusikuna llajtapi.

¹⁴Reypa palacionqa ch'in pacha qhepakonqa, chay chhika runayoj llajtapis ch'in pacha kanqa, qhawana torreswan, pakakuna wasiswanqa wiñaypaj saqerpasqas qhepakonqanku. Chaypeqa k'ita burroslla mayta kanqanku, wakas ima chaypi mikhonqanku.

¹⁵Chanta Señorpa atiynin ujtawan noqaykuman jamonqa. Ch'aki ch'in pampaqa sumaj chajra poqonaman tukonqa. Sumajta chajra poqona jallp'astaj monteman tukonqa.

¹⁶Ch'in pampapeqa tukuy ima cheqan ruwaylla kanqa, sumajta poqoj jallp'aspipis cheqan ruwayllapuni kanqa.

¹⁷Chay cheqan ruwajpa poqoynenqa sonqo tiyakuy, chay cheqan kajqa apamun wiñaypaj samarikuyta.

¹⁸Runasneyqa sonqo tiyakuy wasispi tiyakonqanku, sumaj jark'asqa tiyakunaspi, chaypitaj munayninman jina samarikonqa.

¹⁹Chejchi para urmamonqa chayqa, montesllaman urmanqa, llajtataj pampachasqa kanqa.

²⁰Yakusniyoj tarpojkunaqa kusisqas tiyakunkichej, burrosniykichejtawan, wakasniykichejtawantaj mana llakikuspa kacharparinkichej.