Read Quechua Bolivia DC Bible ISAÍAS 33 Bible Online

ISAÍAS 33 - Quechua Bolivia DC Bible bible

ISAÍAS 33

¹Ay, qanqa qhechoj runa, qanmantataj mana jayk'ajpis qhechusunkuchu; qan, suwaj runa, qanmantataj manaraj suwasunkurajchu. Qan qhechuyta tukojtiyki, qanmantapis qhechullasonqankutaj. Ajinata suwayta tukojtiykikama qanmantapis suwallasonqankutaj.

²Señor, noqaykumantaqa khuyarikuwayku ari. Noqaykoqa qantapuni suyayku. Qanqa tutamanta yanapawajniyku kay ari, llakiy tiempopipis salvajniyku kay ari.

³Manchay palabraykita uyariytawan runasqa ayqenku; qan sayarimojtiykikama nacionespis ch'eqeranku.

⁴Enemigosnenqa langostas jina urphurimonqanku, tukuynejmantataj correnku tukuy imasninkuta suwanankupaj.

⁵Señorqa jatunchasqa kanqa, imaraykuchus payqa patapi tiyakun, paylla allin kajwan, cheqan kajwantaj Sionman junt'achenqa.

⁶Qan kashajtiykeqa yachaywan, yuyaywan, salvacionwan kamachenqanku. Señorta manchachikoyqa uj qhapajyay jina kanqa.

⁷Uyariychej imaynatachus wapus kajkunaqa callespi qhaparisqankuta. Uyariychejtaj allinyakunapaj chay kachasqaspis sonqo nanayta waqasqankuta.

⁸Ñankunaspis ch'inman tukupunku, manaña pipis purej kanchu, trato ruwasqaspis p'akikunku, llajtaspis millachikapunku, manaña pi runatapis allimpaj qhawankuchu.

⁹Jallp'aqa llakisqa, onqosqataj kashan; Líbano orqoqa may p'enqaywan qawisqa kashan, Sarón jallp'aqa ch'impachaman tukupun, Basán jallp'awan, Carmelo jallp'awanqa t'ojrapacha kashan.

¹⁰Señorqa nin: Kunanqa sayarikusaj; oqharisqa, may jatunchasqataj kasaj, nispa.

¹¹Qankunaj yuyasqaykichej, ruwasqaykichej imaqa, ichhu q'opa jinalla, phukusqaykichej, ninataj q'olaykusonqachej.

¹²Chaypacha llajtasqa cal chayasqa jina kanqanku, khishka k'utusqa jina ninapi ruphachisqa kanqanku.

¹³Karupi kajkuna, uyariwaychej ruwasqasniyta; kayllapi kashajkunataj atiyniyta rikuychej.

¹⁴Juchasapasqa Siompi mayta kharkatiterqanku, puraj uyastapis t'ukuylla jap'erqa. Pitaj noqanchejmanta kay jina nina ukhupi kausanmanri, pitaj kay jinata wiñaypaj nina k'ajaj ukhupi tiyakunmanri?

¹⁵Pichus cheqanta ruwaspa purin, cheqantataj parlan, qhasimanta qolqe jap'inata chejnikun, mana qolqewan lluk'iykuchikuspa rantichikunchu, runata wañuchimuna nejtinkupis ningrinta wisq'aykun, sajra imastapis rikushaspa mana rikojman tukun.

¹⁶Chaymá patapeqa wiñaypaj kausanqa; pakakunampis chhankapi kanqa, mikhunanwan, ujyanan yakuwanqa mana tukukoj kanqa.

¹⁷Uj reyta sumaj lliphipishajta rikunki, jallp'aj mojonesnintaqa karukama rikunki.

¹⁸Chay jina t'ukunapaj jina kasqanta rikuspa sonqoykipi ninki: Maytaj kunan impuestota yupajri? Maytaj kunan impuestota pesaj runari? Maytaj kunan torresta yupaj runari?

¹⁹Manaña wapuykachaj llajtata rikunkichu, chay parlasqankoqa mana unanchay atina, mana unanchay atina parlayninkuta ima.

²⁰Qhawariy Sionta mayta kusikunanchej llajtata. Qhawariy Jerusalén jark'asqa tiyakuna llajtata. Chayqa sumaj sayachisqa toldo jina kanqa, chay jap'ichina ch'akarpusnimpis mana sik'ikonqankuchu, nitaj jap'ichina waskasnimpis p'itikonqachu.

²¹Señorqa chaypimin atiyninta rikuchiwasun. Chay cheqaqa mayus jina kanqa, sumajta correshaj ashkha yakus jina; enemigosqa chayman mana yaykuyta atenqankuchu, juch'uy barcoswan, nitaj jatun barcoswampis.

²²Señorqa cheqanchawajninchej, Señorqa kamachiwajninchej, Señorqa reyninchej. Pay kikinmin salvawasunchej.

²³Chay barcospa watanasnenqa llauqheyanqa, patampi k'aspita mana sumajtachu jap'enqa, nitaj barco purichina toldotapis. Jinamanta enemigosmanta qhechusqa imatapis rak'inakuna kanqa; cojospis jap'illanqankupuni.

²⁴Mana pipis ima nenqachu: Onqosqa kani nispaqa. Sión llajtapi tiyakojkunaj juchasninkuta Diosqa pampachanqa.